اقش-تىڭ ساۋدا پالاتاسى قازاقستان مەن امەريكا قۇراما شتاتتارى اراسىنداعى ساۋدا-ەكونوميكالىق ىنتىماقتاستىقتى ودان ءارى كەڭەيتۋ ماقساتىندا قازاقستاندىق-امەريكاندىق ىسكەرلىك كەڭەسى (USKZBC) ءوز جۇمىسىن باستاعانى جايلى رەسمي تۇردە جاريالادى. بۇل تۋرالى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ حابارلايدى.
ىسكەرلىك كەڭەستىڭ باستى ميسسياسى - اقش ساۋدا پالاتاسىنىڭ كەڭەيتىلگەن پلاتفورماسى ارقىلى ەكى ەل اراسىنداعى ەكونوميكالىق بايلانىستى ودان ءارى تەرەڭدەتۋ. كەڭەس توراعاسىنىڭ قىزمەتىن قازاقستان ەكونوميكاسىنا ەڭ ءىرى ينۆەستور بولىپ تابىلاتىن Chevron كومپانياسى اتقارادى. كەڭەستىڭ حاتشىلىعى ۆيتسە-پرەزيدەنت حۋش چوكسيدىڭ جالپى باسشىلىعىمەن اقش ساۋدا پالاتاسىنىڭ ارنايى اۋماقتىق دەپارتامەنتىندە ورنالاسادى.
ساۋدا پالاتاسىنىڭ حابارلاماسىندا قازاقستان مەن اقش اراسىنداعى تاۋار اينالىمى جىلىنا شامامەن 2 ميلليارد اقش دوللارىن قۇرايتىنى جانە اۋىل شارۋاشىلىعى, ەنەرگەتيكا, تاۋ-كەن ءوندىرىسى جانە ينفراقۇرىلىم سەكىلدى سالالاردا ءوزارا ساۋدانىڭ ودان ءارى وسۋىنە ۇلكەن مۇمكىندىكتەر بار ەكەندىگى ايتىلعان. قازىرگى ۋاقىتتا قازاقستاندا 700-دەن استام امەريكاندىق كومپانيالار جۇمىس ىستەيدى.
اقش ساۋدا پالاتاسىنىڭ ۆيتسە-پرەزيدەنتى مايرون بريلليانت اتاپ وتكەندەي, ەكى ەل اراسىنداعى ديپلوماتيالىق قاتىناستاردىڭ ورناعانىنىڭ 30 جىلدىعى قارساڭىندا ۇيىم ەكىجاقتى ساۋدا-ەكونوميكالىق ىنتىماقتاستىقتى دامىتۋعا بەلسەندى قاتىسۋعا نيەتتى.
"قازاقستاندىق-امەريكاندىق ىسكەرلىك كەڭەستىڭ اقش ساۋدا پالاتاسى قۇرامىنا كىرۋى بيزنەس قاۋىمداستىقتى وسى ماڭىزدى جانە ستراتەگيالىق قارىم-قاتىناستى دامىتۋ ءۇشىن قاجەتتى قۇرالدارمەن قامتاماسىز ەتەدى", - دەدى ەۋرازيا-تىنىق مۇحيتى ءوڭىرى بويىنشا Chevron كومپانياسىنىڭ پرەزيدەنتى نايدجەل حيرن.
قازاقستاننىڭ اقش-تاعى ەلشىسى ەرجان قازىحانوۆ ء"بىز اقش ساۋدا پالاتاسىندا قازاقستاندىق-امەريكاندىق ىسكەرلىك كەڭەستىڭ اشىلۋىن قازاقستان مەن اقش اراسىنداعى ساۋدا-ەكونوميكالىق سەرىكتەستىكتى كەڭەيتۋگە قۋاتتى سەرپىن بەرەتىن جانە ەكى ەلدە جاڭا جۇمىس ورىندارى مەن مۇمكىندىكتەردىڭ پايدا بولۋىنا ىقپال ەتەتىن تاريحي وقيعا دەپ باعالايمىز. ورتالىق ازياداعى جەتەكشى ەكونوميكا رەتىندە قازاقستان اقش-تىڭ سەنىمدى سەرىكتەسى بولىپ قالا بەرەدى جانە امەريكالىق كومپانيالارمەن ءوزارا ءتيىمدى ىنتىماقتاستىقتى ودان ءارى دامىتۋعا دايىن".
اقش ساۋدا پالاتاسى 3,5 ميلليونعا جۋىق امەريكاندىق كومپانيالاردىڭ, 3 مىڭ ايماقتىق پالاتالاردىڭ مۇددەلەرىن بىرىكتىرەدى جانە شەتەلدە 90-نان استام وكىلدىگى بار الەمدەگى ەڭ ءىرى ىسكەرلىك ۇيىم.