قوستاناي قالاسىنداعى "Kostanay Plaza" ساۋدا-ساۋىق ورتالىعىنىڭ عيماراتى كەڭەيتىلىپ, قوسىمشا جاڭا نىسانداردىڭ قۇرىلىسى ءجۇرىپ جاتىر. مۇندا 5 باسسەيننەن تۇراتىن تەرموپارك, 30-عا جۋىق مونشا جانە ساۋنا تۇرلەرى, سونداي-اق فۋد-كورت سالىنادى, دەپ حابارلايدى Egemen.kz.
بۇل تۋرالى ايماق باسشىسى ارحيمەد مۇحامبەتوۆ ينستاگرام جەلىسىندەگى جەكە پاراقشاسىندا جاريا ەتتى.
"بۇگىن ساۋدا ورتالىعى قۇرىلىسىنىڭ ەكىنشى كەزەڭى بويىنشا سالىنىپ جاتقان نىسانداردىقاراپ شىقتىم. تەرموپارك - قازاقستاندا بالاماسى جوق بىرەگەي نىسان.
ءبىزدىڭ وبلىس قازاقستان تۋريستىك كارتاسىنىڭ توپ-50 نىسانىنا كىرگەنىن ەسكەرسەك, تەرموپارك اشۋ قوستاناي وبلىسىنىڭ تۋريستىك تارتىمدىلىعىن ارتتىرادى جانە سول ارقىلى قازاقستان رەسپۋبليكاسىنىڭ تۋريستىك سالاسىن دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىندا بەلگىلەنگەن ماقساتتار مەن مىندەتتەرگە قول جەتكىزۋگە مۇمكىندىك بەرەدى.
بۇگىندە "Kostanay Plaza" ساۋدا-ساۋىق ورتالىعى 500 ادامدى جۇمىسپەن قامتىپ وتىر. ال تەرموپارك پايدالانۋعا بەرىلگەن سوڭ, جۇمىس ورىندارىنىڭ سانى 1100-گە دەيىن ارتادى.
ساۋدا-ويىن-ساۋىق ورتالىعى مەن كاسىپكەرلىك سۋبەكتىلەرىنىڭ باسشىلىعى قوستاناي وبلىسىنىڭ سانيتارلىق دارىگەرىنىڭ قاۋلىسىمەن بەلگىلەنگەن بارلىق قاجەتتى سانيتارلىق-ەپيدەميولوگيالىق تالاپتاردى قامتاماسىز ەتكەنىن اتاپ وتكەن ءجون.
ءوڭىردىڭ تۋريستىك تارتىمدىلىعىن جاقسارتۋ بويىنشا ءجۇرىپ جاتقان جۇمىستار ءالى دە جالعاساتىن بولادى", - دەپ جازدى ا.مۇحامبەتوۆ.
قوستاناي وبلىسى