وتكەن سەنبىدە, ياعني 29 تامىزدا التاي اۋدانى, زۋبوۆسك كەنتىندە جەتى جاسار بالا جوعالىپ كەتكەن. ءىز-ءتۇزسىز كەتكەن بالانىڭ دەنەسىن پوليتسيا قىزمەتكەرلەرى ءبىر كۇننەن كەيىن كەنتتىڭ ماڭايىنان تاۋىپ العان.
«بالا جوعالدى» دەگەندى ەستىسەك, الدىمەن «پەدوفيلدىڭ جەتەگىندە كەتكەن جوق پا ەكەن؟» دەگەن كۇدىكتى وي ساناعا ساق ەتە قالادى. ويتكەنى پەدوفيلدەردىڭ قاندى شەڭگەلىنە تاپ بولعانداردىڭ از بولماي تۇرعانى ءبىزدى الگى سۇراققا ەرىكسىز جەتەلەيدى.
بۇل جولى اتالعان قايعىلى وقيعا قالاي بولدى ەكەن دەپ وبلىستىق پوليتسيا دەپارتامەنتىنە حابارلاسقانبىز.
– زاڭنىڭ «ادام ءولتىرۋ» بابى بويىنشا سوتقا دەيىنگى تەرگەۋ امالدارى باستالدى. تەرگەۋ ءىس-شاراسى بارىسىندا كۇدىكتى ازامات بالانى ولتىرگەندىگىن مويىندادى. ول قازىر التاي قالاسىنداعى ۋاقىتشا ۇستاۋ يزولياتورىنا قامالدى, – دەيدى وبلىستىق پوليتسيا دەپارتامەنتىنىڭ باستىعى ساعات ماديەۆ.
ال بالانىڭ ناقتى قالاي ولتىرىلگەنىن ساراپتاما ناتيجەسى كورسەتەدى. پوليتسيا دەپارتامەنتى ءباسپاسوز قىزمەتكەرلەرىنىڭ ايتۋىنشا, بالانىڭ دەنەسىندە پەدوفيلدىك قىلمىس بەلگىلەرى جوق.
29 تامىزدا التاي اۋدانى,
زۋبوۆسك اۋىلىندا جەتى جاسار بالانىڭ جوعالىپ كەتكەنى جونىندە پوليتسيا دەپارتامەنتىنە حابار تۇسكەن. بالاسىنا ىزدەۋ سالعان انانىڭ ايتۋىنشا, ۇلى ەدۋارد ادەتتە اۋلادا ەمىن-ەركىن ويناپ جۇرەتىن. بۇل جولى دا كەشكى ساعات تورتتەردە ويناۋعا شىعىپ, ءىز-ءتۇزسىز جوعالىپ كەتكەن. العاشىندا وزدەرى ىزدەپ, ودان ناتيجە بولماعان سوڭ ەرتەسىندە قۇقىق قورعاۋ قىزمەتكەرلەرىنە حابارلاسقان. حابار تۇسە سالا جوعالعان بالانى پوليتسەيلەر مەن ەرىكتىلەر, اۋىلداستارى شۇعىل ىزدەۋگە شىققان.
سارى شاشتى, قوڭىر كوزدى بالانىڭ كيگەنى سۇر جەيدە, مىنگەنى سۇر ۆەلوسيپەد ەدى. اتى-ءجونى ەدۋارد جيليەۆ. ەرىكتىلەر, پوليتسيانىڭ جەكە قۇرامى تولىق جۇمىلدىرىلىپ, اۋىلدى, اۋىلدىڭ ماڭايىن شارق ۇرىپ ىزدەگەن.
ىزدەۋ وپەراتسياسىن شىعىس قازاقستان وبلىستىق پوليتسيا دەپارتامەنتى باسشىلىعى ءوز باقىلاۋىنا العان. قۇقىق قورعاۋ قىزمەتكەرلەرى ەدۋارد جيليەۆتى تابۋ ءۇشىن بارلىق قاجەتتى ءىس-شارانى جۇرگىزىپ باققان. ءتىپتى جەدەل-ىزدەستىرۋگە وبلىستىق پوليتسيا دەپارتامەنتىنىڭ تاجىريبەلى ماماندارى دا كىرىسكەن. قىلمىستىق پوليتسيا قىزمەتكەرلەرى مەن ۋچاسكەلىك پوليتسيا ينسپەكتورلارى مۇمكىندىكتەرىنە قاراي زۋبوۆسك, سنەگيرەۆ ەلدى مەكەندەرىنىڭ ءار پۇشپاعىن ءسۇزىپ شىققان. قاراۋسىز قالعان عيماراتتاردى, قۇرىلىس الاڭدارىن, ساياباقتار مەن سكۆەرلەردى تۇگەلدەي تىنتكەن.
پوليتسيا قىزمەتكەرلەرى سۇراستىرا كەلە, كىشكەنتاي ەدۋارد ءوزى تانيتىن جىگىتپەن كەتكەنىن انىقتاعان. الگى جىگىت تە زۋبوۆسك كەنتىنىڭ جەرگىلىكتى تۇرعىنى ەكەن. بالانى بۇرىننان تانيتىن كورىنەدى.
اتا-اناسىنىڭ, اۋىلداستارىنىڭ بار تىلەگى – ۇلدارىنىڭ اماندىعى ەدى. وكىنىشكە قاراي بالانىڭ دەنەسى زۋبوۆسك كەنتىنىڭ ماڭايىنان تابىلدى. قازىرگى تاڭدا قايعىلى وقيعانىڭ ءمان-جايى انىقتالۋدا. ال ءتارتىپ ساقشىلارى زۋبوۆسك كەنتىنىڭ 20 جاستاعى تۇرعىنىن قاماۋعا العان.
مەرەي قاينار ۇلى
شىعىس قازاقستان وبلىسى