سەنات دەپۋتاتى ناريمان تورەعاليەۆ باتىس قازاقستان وبلىسىنىڭ الەۋمەتتىك نىساندارىن ارالادى. "قازسۋشار" كاسىپورنىنىڭ ايماقتىق فيليالىنىڭ باسشىلىعىمەن كەزدەسۋدە دەپۋتاتقا جايىق وزەنىندەگى سۋ دەڭگەيىنىڭ تومەندەگەنى ايتىلدى. ماماندار وزەن رەسەيدىڭ ورال تاۋلارىنان باستالاتىنىن, اعىندى سۋلاردىڭ ازايۋىنا بايلانىستى جايىقتاعى سۋ مولشەرى دە ازايعانىن جەتكىزدى, دەپ حابارلايدى Egemen.kz.
ناريمان تورەعاليەۆ "جايىق وزەنىندەگى سۋ دەڭگەيىنىڭ تومەندەۋى شاعان وزەنى اعىسىنداعى سۋ كولەمىنىڭ ازايۋىنا الىپ كەلەدى. ال شاعان وزەنىن بۇرۋ وبلىستىڭ وڭتۇستىك بولىگىن سۋمەن قامتاماسىز ەتەتىن جايىق-كوشىم يرريگاتسيالىق جۇيەسىنىڭ نەگىزگى كوزى رەتىندە ۇلكەن شارۋاشىلىق ماڭىزعا يە. سوندىقتان جايىق وزەنىندەگى جاعدايدى وڭىرلىك دەڭگەيدە ەمەس, مەملەكەتارالىق دەڭگەيدە شەشۋ قاجەت", دەپ اتاپ ءوتتى.
سونىمەن قاتار, سەناتور جايىق-كوشىم يرريگاتسيالىق جۇيەسىنىڭ قۇرامىنا كىرەتىن كيروۆ سۋ قويماسىن جاڭعىرتۋ قاجەتتىگىنە نازار اۋداردى. ناريمان تورەعاليەۆ الداعى ۋاقىتتا رەسپۋبليكالىق بيۋدجەتتەن قاراجات ءبولۋ تۋرالى ماسەلەنى كوتەرەتىنىنە سەندىردى.
سونداي-اق, دەپۋتات 50 بالاباقشانى, 106 ءبىلىم بەرۋ مەكەمەسىن, 22 مەديتسينالىق ۇيىمدى, 1 200 كوپ قاباتتى ءۇيدى جانە قالانىڭ 3,5 مىڭنان استام وزگە دە نىساندارىن سۋمەن قامتاماسىز ەتەتىن كاسىپورىن قىزمەتكەرلەرىمەن كەزدەستى. دەپۋتاتقا قالالىق كوللەكتورلاردىڭ كۇردەلى جوندەۋ جۇمىستارى تۋرالى دا ايتىلدى.
سونىمەن قاتار, سەناتور مۇمكىندىگى شەكتەۋلى جاندارعا ارنايى قىزمەت كورسەتۋ ورتالىعىندا بولدى. ناريمان تورەعاليەۆ مەملەكەت باسشىسىنىڭ جولداۋىندا ەرەكشە قاجەتتىلىكتەرى بار ازاماتتار ءۇشىن بارلىق ءتيىستى جاعدايلار جاساۋ تۋرالى ايتىلعانىن ەسكە سالدى. ورتالىق باسشىلىعى پسيحونەۆرولوگيالىق پاتولوگياسى بار 18 جاستان اسقان 493 ادامعا قىزمەت كورسەتەتىنىن حابارلادى.