قازاقستاننىڭ ۇيالى بايلانىس وپەراتورلارى قاشىقتان وقۋ ءۇشىن ارناۋلى تاريف ازىرلەدى. بۇل تۋرالى "كۇندەلىك" جشس باس ديرەكتورى مۇحتار ءىلياسوۆ ايتتى, دەپ حابارلايدى Egemen.kz قازاقپاراتقا سىلتەمە جاساپ.
"مۇنداي ءتاريفتىڭ بار ەكەنىن ناقتى ايتا الامىن. شىنىمەن دە جەتەكشى ۇيالى بايلانىس وپەراتورلارى ء«بىلىم» ءتاريفىن ازىرلەدى. قۇنى - 990 تەڭگە. ول جاڭا وقۋ جىلىنىڭ باسىندا قولجەتىمدى بولادى. ءبىز بۇل ماسەلەنى شەشۋگە بەلسەندى قاتىسقان ەدىك. بۇل تاريفتەن Kundelik.kz رەسۋرسىنا مەگابايت جۇمسالمايدى", دەدى ول ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا باق وكىلدەرىنىڭ ساۋالىنا وراي.
ەستەرىڭىزگە سالا كەتسەك, ارناۋلى ءتاريفتىڭ ىسكە قوسىلاتىندىعى وسى جىلدىڭ شىلدە ايىندا بەلگىلى بولعان ەدى. اتالعان تاريفتىك جوسپار بارىسىندا وقۋشىلار مەن ۇستازدار ءبىر-بىرىمەن تەگىن سويلەسە الادى.
مۇنان بولەك, وتاندىق ءبىلىم رەسۋرستارىن تەگىن قولدانۋعا بولادى. قازىرگى ۋاقىتتا ءبىلىم جانە عىلىم مينيسترلىگى 380 رەسۋرستى قولداپ وتىرعانى بەلگىلى.