قوعامنىڭ دامۋى – ءبىلىم سالاسىنىڭ دامۋىنا تىكەلەي بايلانىستى ەكەندىگى ەش دالەلدەۋدى قاجەت ەتپەيتىن شىندىق. سوندىقتان كەز كەلگەن دامۋشى قوعام ءبىلىم مەن عىلىم ساپاسىن توقتاۋسىز, تولاسسىز جەتىلدىرۋگە تىرىسادى.
ەل بولىپ ەڭسە تىكتەگەن ساتتەن باستاپ ەلىمىزدە مەملەكەتتىك دەڭگەيدە ءبىلىم سالاسىنا بارىنشا كوڭىل ءبولىنىپ كەلەدى. الەمدەگى ەڭ وزىق ۇلگىلەر سىننان ءوتىپ, جەرگىلىكتى جاعدايعا ىڭعايلانىپ, كۇندەلىكتى ءىس-تاجىريبەمىزدە پايدالانۋعا ەنگىزىلگەندىكتەن, بۇگىندىككە سونىڭ وڭ ناتيجەلەرى جەمىسىن بەرۋدە. مەملەكەت باسشىسى ق.توقاەۆتىڭ ءبىلىم سالاسىنا ۇلكەن قولداۋ جاساپ, قامقورلىق كورسەتۋىن دە سەزىنۋدەمىز. ۇستازداردىڭ ۇسىنىستارى مەن تالاپ-تىلەكتەرىنە سايكەس ءبىلىم جانە عىلىم مينيسترلىگىنە وڭ وزگەرىستەر جاساۋ قاجەتتىلىگى جونىندە ءتيىستى تاپسىرمالار بەرىپ, ورىندالۋىن ءوزى باقىلاپ وتىرعانىن كۇندەلىكتى بۇقارالىق اقپارات قۇرالدارىنان ەستىپ, كورىپ وتىرمىز. بۇل ءۇشىن ءبىلىم سالاسى قىزمەتكەرلەرىنىڭ, سونىڭ ىشىندە قالىڭ ەلدىڭ ورتاسىندا جۇرگەن قاراپايىم ۇستازداردىڭ العىسى شەكسىز. الداعى ۋاقىتتا دا ءبىلىم جانە عىلىم سالاسىندا جاقسى دا جاعىمدى جاڭالىقتار كوبەيىپ, ءىس جۇزىنە اساتىنىنا سەنىمدىمىز. «مەملەكەتتىڭ بارلىق باستامالارى ءبىلىم سالاسىن جەتىلدىرىپ, پەداگوگ مارتەبەسىن ارتتىرۋعا باعىتتالعان. اتاپ ايتقاندا ءبىلىم سالاسى جاڭارتىلعان ءبىلىم مازمۇنىنا كوشتى, «پەداگوگ مارتەبەسى» تۋرالى زاڭ قابىلداندى, ۇلتتىق بىلىكتىلىك تەستىلەۋ ەنگىزىلدى, پەداگوگ كادرلاردىڭ جالاقىسى ارتتى, ديرەكتورلىق كورپۋستى تاعايىنداۋ ءتارتىبى وزگەردى, جاڭا مەملەكەتتىك ءبىلىم مەن عىلىمدى دامىتۋدىڭ باعدارلاماسى قابىلداندى. ءبىلىم جانە عىلىم مينيسترلىگىنىڭ ەلمەن ەتەنە ارالاسىپ, بەرىلگەن تاپسىرمالارعا سايكەس ءتيىستى ۇسىنىستاردى جۇزەگە اسىرىپ جاتقانىنا مۇعالىمدەر قاۋىمى ءدان ريزا.
شۇعا قاراتاەۆا,
مارتوك اۋىلىنداعى №2 مەكتەپ-گيمنازيانىڭ ماتەماتيكا ءپانىنىڭ مۇعالىمى,
ءبىلىم بەرۋ ءىسىنىڭ قۇرمەتتى قىزمەتكەرى:
«پەداگوگ مارتەبەسى تۋرالى» زاڭنىڭ قابىلدانۋى – بارلىق پەداگوگ قاۋىمى ۇمىتپەن كۇتكەن باستى جاڭالىق. ۇستازدار تاۋەلسىز ەل تاريحىندا تۇڭعىش رەت وسىنداي ۇلكەن مارتەبەگە يە بولىپ وتىر. زاڭ الدىمەن, ۇستازداردىڭ قۇقىقتارىن كەڭەيتىپ, قورعايتىن بولادى, ياعني مۇعالىمگە ءتان ەمەس جۇمىستان بوساتۋ, جۇكتەمەسىن ازايتۋ كوزدەلگەن.
وسى اتالعان باعىتتاعى ءىس-ارەكەتتى ۇجىم دا سەزىندى. ءبىز مەكتەپكە قاتىسى جوق ءىس-شارالاردان ارىلىپ, ۋاقىتىمىزدى ءبىلىم بەرۋگە, ءوزىمىزدى دامىتۋعا ارنادىق. ەكى قۇجاتتى – سىنىپ جۋرنالى مەن ساباق جوسپارىن عانا تولتىرامىن. سونداي-اق وقۋ جىلىنىڭ باسىندا كۇنتىزبەلىك-تاقىرىپتىق جوسپاردى دايىنداپ, ءار توقسان سوڭىندا كريتەريالدىق باعالاۋ بويىنشا قۇجاتتاردى دايىندايمىن. قالعان قۇجاتتىڭ ەش قاجەتى جوق.
گۇلجان ساديروۆا,
اقتوبە قالاسىنداعى №51 گيمنازيانىڭ مۇعالىمى,ء بىلىم بەرۋىسىنىڭ ۇزدىگى:
مەن جاڭارتىلعان ءبىلىم مازمۇنى كۋرسىنا قاتىسىپ, كاسىبي ءبىلىمىمدى جەتىلدىردىم. بۇل مەنىڭ بىلىكتىلىك ساناتىمدى ارتتىرۋعا ۇلكەن كومەگىن تيگىزدى. ەندى مەن – پەداگوگ-زەرتتەۋشىمىن, بىلىكتىلىك ساناتىما ساي ەڭبەكاقىما 40% ۇستەمەاقى الىپ وتىرمىن. بۇل مەنىڭ جانە بارلىق ارىپتەستەرىمنىڭ ەڭبەگىنىڭ باعالانۋى دەپ تۇسىنەمىن.
نۇرلان دجاكيباەۆ,
№1 شۇبارقۇدىق مەكتەپ-گيمنازياسىنىڭ مۇعالىمى, ى.التىنسارين توسبەلگىسىنىڭ يەگەرى:
– ءيا, ۇستاز ەڭبەگى وتە توزىمدىلىكتى, تاباندىلىقتى, سابىرلىلىق پەن شىعارماشىلىقتى قاجەت ەتەدى. مەن – سىنىپ جەتەكشىسىمىن. ارينە, قازىرگى سىنىپ جەتەكشىسىنە تولەنەتىن قوسىمشا اقى تاعى ەكى ەسەگە ارتاتىنى قۋانتادى. سەبەبى سىنىپ جەتەكشىسىنىڭ ەڭبەگى وتە كۇردەلى ءارى جاۋاپتى, ونىڭ ىشىندە اتا-انامەن دە جۇمىس جۇرگىزۋ بار. سوندىقتان بۇل وزگەرىس بىزگە ءتيىمدى بولىپ وتىر.
گۇلماراش مۋكاشەۆا,
№6 حرومتاۋ گيمنازياسىنىڭ ديرەكتورى, ى.التىنسارين توسبەلگىسىنىڭ يەگەرى:
– پەداگوگتىڭ ۇستازدىق قىزمەتپەن الاڭسىز اينالىسۋى ءۇشىن پەداگوگتەردىڭ بالالارىنا تۇرعىلىقتى جەرى بويىنشا مەكتەپكە دەيىنگى ۇيىمدارعا ءبىرىنشى كەزەكتە ورىن بەرۋ – بۇل دا بىزگە دەگەن مەملەكەتتىڭ قامقورلىعى دەپ تۇسىنەمىز. سونىمەن قاتار پەداگوگ ماماندىعىنا وقۋعا تۇسەتىن تۇلەكتەر ءۇشىن بالدى 60-تان 70-كە كوتەرۋ دە دۇرىس شارا جانە ونى ءبىز قولدايمىز. سەبەبى ەرتەڭ مەكتەپكە ءبىزدىڭ ءىسىمىزدى جالعاستىراتىن ساپالى ءبىلىمدى جاستار كەلەدى دەپ سەنەمىز.
التىناي اقداۋلەتوۆا,
قاراۋىلكەلدى ورتا مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى, ءبىلىم بەرۋ ءىسىنىڭ ۇزدىگى:
– قازىرگى ۋاقىتتا وليمپيادالارعا, عىلىمي جوبالاردى قورعاۋعا وقۋشىلاردىڭ قىزىعۋشىلىعى جوعارى, سايكەسىنشە قاتىسۋشىلار دا كوپ. رەسپۋبليكالىق, حالىقارالىق وليمپيادالار بويىنشا ءبىلىم جانە عىلىم مينيسترلىگىنىڭ تىزبەسى جاسالعان. وسى تىزبەدە وليمپيادا جەڭىمپازدارىن دايىنداعان مۇعالىمدەرگە ءار مەكەمەنىڭ ىشىندەگى ۇنەمدەلگەن قاراجات ەسەبىنەن 300 اەك كولەمىندە ۇستەمەاقى تولەۋ قاراستىرىلعان. بۇل ەلىمىزدە دارىندى بالالاردى قولداۋ, تالانتتاردى تانىتۋعا سەپتىگىن تيگىزەدى دەپ بىلەمىز. سونىمەن قاتار ۇستازدار ءۇشىن كەرەمەت موتيۆاتسيا ەكەنى ءسوزسىز.
ەستاي جايلىباي,
اقتوبە ونەركاسىپتىك تەحنولوگيالار جانە باسقارۋ كوللەدجىنىڭ ديرەكتورى, ءبىلىم بەرۋ ءىسىنىڭ ۇزدىگى:
– 1985 جىلى كاسىپتىك-تەحنيكالىق ءبىلىم بەرۋ سالاسىنا جۇمىسقا ورنالاسىپ, وقىتۋشىلىقتان باستاپ كوللەدج ديرەكتورىنا دەيىنگى بۇكىل ساتىسىنان ءوتتىم. ونى ايتىپ وتىرعانىم – وسى 35 جىل ىشىندە بۇل سالانىڭ بارلىق جەتىستىكتەرى مەن قيىنشىلىقتارىنىڭ كۋاگەرى بولىپ كەلە جاتىرمىن. قازىرگى تاڭدا ەلگە كەرەكتى ورتا بۋىن, جۇمىسشى مامانداردى دايارلاۋ قاجەتتىگى تۋىنداعان كەزدە مەملەكەت تاراپىنان ءبىلىم سالاسىنا قولداۋ كورسەتىلىپ جاتىر. «پەداگوگ مارتەبەسى تۋرالى» زاڭنىڭ قابىلدانۋىنىڭ ماڭىزى وتە زور. مۇعالىمدەردىڭ مارتەبەسى ارتتى, جالاقىلارى ءوستى. ولاردىڭ قوعامداعى ورنى كورنەكتى بولا باستادى. ءوزىم قىزمەت ەتەتىن اقتوبە ونەركاسىپتىك تەحنولوگيالار جانە باسقارۋ كوللەدجى رەسپۋبليكالىق «جاس مامان» جوباسىنا ەنىپ, ەكى ماماندىققا زاماناۋي تەحنيكالىق قۇرال-جابدىقتار الۋ مۇمكىندىگىنە يە بولدى. وسىنداي قولداۋدى جەتە سەزىنگەن ارىپتەستەرىمنىڭ بار كۇش-جىگەرىن قاجەتتى ءارى ساپالى ماماندار دايارلاۋعا ارنايتىنىنا سەنىمدىمىن.
ر.S. مىنە, جاڭا وقۋ جىلىنىڭ باستالۋىنا دا ساناۋلى كۇندەر قالدى. شاكىرتتەر مەن ۇستازدارعا وقۋ جىلىنىڭ باستالعانىن حاباردار ەتىپ, سىڭعىرلاي جونەلەتىن قوڭىراۋ ءۇنى بيىلعى وقۋ جىلىندا دا قاشىقتان ەستىلمەك. قوڭىراۋ ءۇنى قاشىق بولعانىمەن, ۇستازدار مەن وقۋشىلار اراسى جاقىن. ويتكەنى زاماناۋي تەحنولوگيالار جەتىستىگى ەكى اراداعى بايلانىستى جاقىنداتا ءتۇستى. وسى ارالىقتا ۇستازدار قاۋىمى تسيفرلى تەحنولوگيالار ارقىلى ءوز بەتىنشە ۇزدىكسىز ءبىلىم الىپ, سان الۋان اقپاراتپەن الماسۋ مۇمكىندىكتەرىن ابدەن يگەردى.
وبلىسىمىزدا جاڭا وقۋ جىلىنا دايىندىق جۇمىستارى قارقىندى تۇردە جۇرگىزىلىپ جاتىر. بارلىق وقۋشىلاردىڭ وتباسىلىق جاعدايىنىڭ الەۋمەتتىك كارتاسى جاسالدى. وسىنىڭ نەگىزىندە الەۋمەتتىك از قامتاماسىز ەتىلگەن وتباسىلاردىڭ وقۋشىلارىنا, باسقا دا قاجەتتىلىگى بار بالالارعا ءبىلىم بەرۋ ۇيىمدارىنداعى كومپيۋتەر, پلانشەت قۇرىلعىلارى ۋاقىتشا پايدالانۋعا بەرىلدى. ءالى دە جەتىسپەۋشىلىكتىڭ ورنىن تولىقتىرۋعا رەسپۋبليكالىق, وبلىستىق بيۋدجەت ەسەبىنەن قاراجات بولىنۋدە.
ءاربىر قيىندىقتىڭ سوڭىندا جاقسىلىعى بولادى. الەمدى جايلاعان ىندەت ءبىلىم سالاسىنا قاشىقتان وقىتۋ فورماتىن ەنگىزدى. پەداگوگتەر مەن مەكتەپ وقۋشىلارىنا اقپاراتتىق تەحنولوگيانىڭ ءتىلىن جان-جاقتى مەڭگەرۋىنە مۇمكىندىك تۋدى. پەداگوگ – وقۋشى – اتا-انا ۇشتىگى بۇل سىناقتان بىرلەسە شىنىعىپ شىعاتىنى انىق.
وبلىس ۇستازدارى مەن ءبىلىم سالاسى قىزمەتكەرلەرىنىڭ ءبىلىمى مەن كۇش-قۋاتى قانداي سىناقتى بولسىن ەڭسەرۋگە جەتەتىنىنە سەنىمدىمىز.
دينا جامانباەۆا,
اقتوبە وبلىستىق عىلىمي-ادىستەمەلىك ورتالىقتىڭ ديرەكتورى