قىزىلجاردا قازاق مەكتەبىنىڭ جاڭا عيماراتى اشىلدى

300 ورىنعا شاقتالىپ اشىلعان ەسكى مەكتەپ ءۇيى قىزىلجارداعى العاشقى قازاق مەكتەبى ەدى. ونىڭ قابىرعاسىنان سولتۇستىكتىڭ تالاي قىراندارى قانات قاققان. جانىنان ينتەرنات اشىلىپ, وندا ءبىر كەزدە بۇكىل وبلىستان كەلەتىن بالالار وقىعان. سوندىقتان دا ول قىزىلجارلىق قازاق زيالى قاۋىمى ءۇشىن كوزگە ىستىق, جىلى مەكەن. قازىر ونداعى وقۋشىلار سانى سىيىمدىلىعىنان 3 ەسە اسىپ كەتكەن. وسىنى ەسكەرگەن وبلىس, قالا باسشىلارى «جاس وركەن» دەپ اتالاتىن جاڭا ىقشام اۋدانعا سالىنعان جاڭا عيماراتتى وسى مەكتەپكە بەردى.

ەسىگىن ايقارا اشىپ, وقۋشىلارىن كۇتىپ وتىرعان زاماناۋي ۇلگىدەگى جاڭا  مەكتەپتى بۇگىن وبلىس اكىمى قۇمار اقساقالوۆ  ارالاپ, شاكىرتتەر مەن ۇستازدارعا ساتتىلىك تىلەدى.  «جاڭا مەكتەپتە وقۋشىلار زاماناۋي تالاپتارعا ساي ءبىلىم الىپ, ەلىمىزدىڭ بەلسەندى دە ءبىلىمدى ازاماتتارى بولۋىنا تىلەكتەستەسپىز. ەسكى مەكتەپتىڭ تار ەكەندىگىن ەسكەرىپ ءبىز ەكى جىل بۇرىن جاڭا عيمارات سالۋ جونىندە شەشىم قابىلداعانبىز. مىنە, ەندى ول وسكەلەڭ ۇرپاققا ەسىگىن ايقارا اشىپ وتىر. بۇل مەكتەپ وقۋشىلارى مەن اتا-انالارىنىڭ عانا ەمەس, بارشا قىزىلجار تۇرعىندارىنىڭ قۋانىشى», دەدى ول ءوزىنىڭ سوزىندە.

جاڭا عيماراتتا بالالارىن وقىتۋعا قازىردىڭ وزىندە 970 اتا-انا ءوتىنىش بىلدىرگەن ەكەن. بۇل جەر قالانىڭ جاڭا ۇلگىدەگى اسەم ۇيلەرى سالىنعان جاڭا ىقشام اۋدانى. وسى ارادا, جاڭا جىلدىڭ قارساڭىندا, س.مۇقانوۆ اتىنداعى قازاق سازدى-دراما تەاترىنىڭ جاڭا عيماراتى دا ەسىگىن اشاتىن بولادى. 

بيىل سولتۇستىك قازاقستاندا مەكتەپ تابالدىرىعىن العاش رەت اتتايتىن بۇلدىرشىندەر سانى 9 مىڭنان اسادى. بۇل بىلتىرعىدان 500-گە دەيىن ارتىق. وقۋشىلار سانىنىڭ وسكەنى حالىق سانى وسكەندىگىنىڭ ايعاعى ەكەنى حاق. قازىر قىزىلجاردا قازاق تىلىندە وقىتاتىن ون مەكتەپ بار. سونىڭ ءوزى وسكەلەڭ تالاپقا ساي كەلمەي, قازىردىڭ وزىندە ازدىق ەتۋدە. قالا ىرگەسىندەگى بەسكول اۋىلىندا دا بيىل 600 ورىندىق قازاق مەكتەبى ەسىگىن ايقارا اشاتىن بولادى.

ءوڭىر باسشىسى بۇگىن كوللەدجدەردە دە بولىپ, قوندىرعىلاردى جاڭارتۋ جۇمىسىمەن تانىستى. م.جۇماباەۆ اتىنداعى كوللەدجدە 3D مودەلدەۋ, روبوتوتەحنيكا, ۆەب ديزاين كابينەتتەرى اشىلدى. سونداي-اق «پەتروپاۆل كاسىبي كاسىبي-پەداگوگيكالىق كوللەدجىندە» اۆتوماشينالاردى جوندەۋ جانە تەكسەرۋ تسەحى اشىلدى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.