بۇگىن وبلىس اكىمى گۇلشارا ابدىقالىقوۆا باق وكىلدەرىنىڭ باسشىلارى مەن رەسپۋبليكالىق تەلەارنا, باسىلىمداردىڭ مەنشىكتى تىلشىلەرىمەن كەزدەسۋ وتكىزىپ, جۋرناليستەردىڭ ماسەلەلەرىن تىڭداپ, ساۋالدارىنا جاۋاپ بەردى. گۇلشارا ابدىقالىقوۆا باق وكىلدەرىنە قازاقستان رەسپۋبليكاسى كونستيتۋتسياسىنىڭ 25 جىلدىعى قارساڭىندا جۇزدەسىپ وتىرعانىن, جۋرناليستەردىڭ قوعام الدىنداعى ورنى ەرەكشە ەكەنىن اتاپ ءوتتى, دەپ حابارلايدى Egemen.kz.
الدىمەن ايماق باسشىسى وبلىستاعى كورونوۆيرۋس ىندەتىنە قاتىستى احۋال مەن اۋرۋدى ورشىتپەۋ باعىتىندا قولعا الىنعان جۇمىستار جايلى ايتتى. سونىمەن بىرگە الداعى كەزەڭدە جاڭا جۇمىس ورىندارىن قۇرۋ, ونەركاسىپ وندىرىستەرىن كوبەيتۋ, شاعىن جانە ورتا بيزنەس سالاسىنداعى مەملەكەتتىك قولداۋ شارالارىن تارقاتىپ بەردى. مۇنان وزگە جىلۋ بەرۋ ماۋسىمىنا دايىندىق ماسەلەسى جانە جاڭا وقۋ جىلىن قاشىقتان ۇيىمداستىرۋ شارالارىنا ايرىقشا توقتالدى.
كەزدەسۋدە وبلىس اكىمى اۋىل شارۋاشىلىعى باعىتىنا ارنايى توقتاپ, كۇرىش ەكسپورتى, ەگىن شارۋاشىلىعىن ءارتاراپتاندىرۋ ماسەلەلەرىن قوزعاپ, وڭىردەگى اگرارلىق سالاداعى باسىمدىقتاردى اتادى.
باسقوسۋعا كەلگەن باق وكىلدەرى ايماق باسشىسىنا الەۋمەت, ءبىلىم, ەكونوميكا, اۋىل شارۋاشىلىعى سالالارىنداعى كوكەيدە جۇرگەن ساۋالدارىن قويدى. «قىزىلوردا قوعامدىق تەلەراديوكومپانياسى» جشس قۇرىلتايشىسى شاكيزادا ابدىكارىموۆ اقپاراتتى بەرۋ تاسىلىندە تالدامالى اقپاراتتاردى جەتىلدىرۋ قاجەتتىگىن جانە جەرگىلىكتى سالا باسقارمالارىنىڭ ءتيىستى ماسەلەلەرگە كەلگەندە اشىق ۇستانىمدارىنىڭ جەتپەي جاتقاندىعىن اتاپ ءوتتى. بۇل رەتتە ءاربىر سالا باسشىلارى جۋرناليستەرمەن تىكەلەي قارىم-قاتىناس ۇستاپ, اقپاراتتىق شەكتەۋلەرگە جول بەرمەۋ قاجەت دەگەن ۇسىنىسىن ورتاعا سالدى.
ال رەسپۋبليكالىق «ەگەمەن قازاقستان» گازەتىنىڭ مەنشىكتى ءتىلشىسى مۇرات جەتپىسباەۆ ەگىس القاپتارىنداعى سۋ تاپشىلىعى پروبلەماسىن العا تارتىپ, سۋدى ۇنەمدەۋ ماسەلەسىنە ەرەكشە نازار اۋدارۋدى سۇرادى. وبلىس اكىمى وزەكتى ساۋالعا ناق جاۋاپ بەردى.
- بيىلعى جىلدان باستالعان سۋارمالى سۋدىڭ تاپشىلىعى ەگىن شارۋاشىلىعىنا اسەر ەتپەي قويمادى. مۇنى ءبىز بىلەمىز. وسى جاعدايدى ەسكەرە كەلە, اۋىسپالى ەگىس جۇيەسىندەگى كۇرىش ەگىسىنىڭ كولەمىن 75- 80 مىڭ گەكتارعا تۇراقتاندىرىپ, مال ازىقتىق داقىلدار ەگىسىنىڭ كولەمىنە باسىمدىق بەرۋدى كوزدەپ وتىرمىز,–دەدى گۇلشارا ابدىقالىقوۆا.
كەزدەسۋدە رەسپۋبليكالىق «الىمساق» جۋرنالىنىڭ باس رەداكتورى نۇرلان كوبەگەن ۇلى اقپاراتتىق اشىقتىق, تاۋەلسىز باق وكىلدەرىنە مەملەكەتتىك تاپسىرىس بەرۋ ماسەلەسىن كوتەردى. باس رەداكتور وڭىردەگى سالا باسشىلارى اي سايىن ونلاين پلاتفورمالار ارقىلى جۋرناليستەرمەن كەزدەسۋ ۇيىمداستىرىپ, ورتاق ماسەلەلەردى تالقىعا سالاتىن كەرى بايلانىس تەتىكتەرىن ىسكە اسىرۋدى سۇرادى. ال, «حابار» تەلەارناسىنىڭ مەنشىكتى ءتىلشىسى نۇرلان جاقىپبەك مامان دايارلاۋ ماسەلەسىن قايتا قاراپ, جۋرناليستەرمەن تىكەلەي قىزمەت جاسايتىن ءباسپاسوز حاتشىلارىنىڭ جۇمىسىن جانداندىرۋ قاجەتتىگىن ايتتى.
سونىمەن بىرگە كەزدەسۋگە جينالعان اقپارات سالاسىنىڭ ماماندارى جۋرناليستيكا سالاسىنىڭ ارداگەرلەرىنە جانە وسى سالادا ايانباي ەڭبەك ەتىپ جۇرگەن تىلشىلەر قاۋىمىن ىنتالاندىرۋ باعىتىندا ءتۇرلى شارالار وتكىزۋدى ۇسىندى.
وبلىس اكىمى اقپاراتتىق قولجەتىمدىلىك باعىتىندا جۋرناليستەر تاراپىنان ايتىلعان ءاربىر ۇسىنىستى سارالاي كەلە ءتيىستى سالا باسشىلارىنا تاپسىرما بەرىپ, اقپاراتتىق اشىقتىقتى ۇستانۋدا جۇمىستى جۇرگىزۋدىڭ الگوريتمى بەكىتىلەتىنىن اتاپ ءوتتى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.