نۇر-سۇلتاندا ەكى ەكولوگيالىق ساياباق سالىنادى. بۇل تۋرالى نۇر-سۇلتان قالالىق ساۋلەت, قالا قۇرىلىسى جانە جەر قاتىناستارى باسقارماسى حابارلادى. سونىڭ ءبىرى تالدىكول كولىنىڭ جانىندا بولادى. جوسپارلانعان اۋماق قالانىڭ وڭتۇستىك-باتىس بولىگىندە ورنالاسقان. ونىڭ اۋماعى 5700 گەكتاردى قۇرايدى, دەپ حابارلايدى Egemen.kz
سونداي-اق اۋماق بويىندا بولاشاق بيولوگتار مەن ورنيتولوگتار ءۇشىن كورۋ الاڭدارى مەن ەكسكليۋزيۆتى ءبىلىم بەرۋ ورتالىقتارىن سالۋ جوسپارلانۋدا. وسىلايشا, ينفراقۇرىلىمدى قۇرۋ كەزىندە تالدىكول ساياباعى ەكولوگيالىق ءتۋريزمدى دامىتۋ ورتالىعىنا اينالۋى مۇمكىن.
"استانا باس جوسپارى" عزجي" جشس قىزمەتكەرلەرى قازاقستاننىڭ بيوالۋانتۇرلىلىگىن ساقتاۋ قاۋىمداستىعىمەن بىرگە ۇلىبريتانياداعى ارىپتەستەرىمەن بىرلەسە وتىرىپ لوندوننىڭ باتپاقتى سۋ ايدىنى ورتالىعى, Rainham Marshes تابيعي پاركى, شەرۆۋد ورمانى, Minsmere Reserve قورىعى ۇلگىسىندە تابيعي ساياباقتاردى جوبالاۋ مەن سالۋداعى حالىقارالىق تاجىريبەنى زەرتتەپ, جەتەكشى ورنيتولوگ ماماندارمەن كەزدەسۋلەر وتكىزدى. تابيعي ساياباقتىڭ قۇرىلۋى قىزىل كىتاپقا ەنگەن جانۋارلار مەن سيرەك كەزدەسەتىن قۇستاردىڭ تابيعي ورتاسىن ساقتاۋعا مۇمكىندىك بەرەدى.
تالدىكول – تاريحي ماڭىزعا يە ورنيتولوگيالىق ايماق. ماۋسىمدىق قونىس اۋدارۋ كەزەڭىندە كولدە جانە وعان جاقىن جەرلەردە قۇستاردىڭ 200-گە جۋىق تۇرلەرىن كورۋگە بولادى. ولاردىڭ اراسىندا پەليكان, اق قۇيرىق, سۇڭقىلداق اققۋ, اق قۇيرىقتى بۇركىت بار. بوتانيكالىق زەرتتەۋلەر ناتيجەسىندە كولدەرگە ىرگەلەس جەرلەردە 98 وسىمدىك ءتۇرى تىركەلدى.
مايبالىق كولىندەگى ەكىنشى ەكوپاركتە سول سياقتى تارتىمدى ورىن بولماق (اۋەجاي باعىتىنىڭ وڭتۇستىك-شىعىس جاعى). ونىڭ جالپى اۋدانى – 400 گەكتار, سۋ قويمالارى – 120 گەكتار. ساياباق كەشەنىندە بالىق اۋلاۋعا ارنالعان جاساندى سۋ قويمالارى, ەرەكشە قورعالاتىن جاعالاۋ ايماقتارى, سەرۋەندەۋ جانە ۆەلوسيپەد جولدارى, سپورتتىڭ بەلسەندى تۇرلەرى ءۇشىن ايماقتار جانە اۋماقتىڭ بىرەگەي ەكوجۇيەسىن ساقتاۋعا ارنالعان الاڭدار قۇرۋ قاراستىرىلعان.
تۋريستەردى جانۋارلار دۇنيەسىنىڭ الۋان تۇرىمەن تانىستىرۋعا ارنالعان ەكولوگيالىق مارشرۋتتار مەن سوقپاقتار جاساۋ جوسپارلانۋدا.
مايبالىق كولىنەن شىعىسقا قاراي ورنالاسقان اۋماقتا تۋريستەر مەن قالا تۇرعىندارى ءۇشىن تارتىمدى زاماناۋي تابيعي ايماق ۇيىمداستىرۋدىڭ الەۋەتى جوعارى. ۇسىنىلىپ وتىرعان ايماق بارلىق تابيعي ەرەكشەلىكتەردى – كليماتتى, فلورانى, فاۋنانى ەسكەرە وتىرىپ, ەكولوگيالىق پارك قۇرۋعا قولايلى. بۇل تەرريتوريادا وسىمدىكتەردىڭ 100-گە جۋىق ءتۇرى وسەدى, قۇستاردىڭ 200-دەن استام ءتۇرى تىرشىلىك ەتەدى. ونىڭ ىشىندە ۇيا سالاتىن جانە جىل قۇستارى, سۇتقورەكتىلەردىڭ 30-دان استام ءتۇرى بار. بۇل اۋداندا بالىق ءوسىرۋ جوسپارلانىپ وتىر. ساياباقتا بالىق مەيرامحاناسى جۇمىس ىستەيدى. ساياباقتىڭ ەرەكشەلىگى – مۇندا مەكەندەيتىن جانۋارلار مەن قۇستاردىڭ ەركىن جاعدايدا جانە جەرگىلىكتى تابيعات زوناسىنا ءتان بولۋى.
ات سپورتى كلۋبىن اشۋ جوسپارلانۋدا. بۇل دەگەنىمىز, ساياباق اۋماعىن ات ۇستىندە ارالاۋعا بولادى. مايبالىق كولىنىڭ اۋماعى ەرەكشە قورعالاتىن ايماق بولادى. ودان شىعاتىن ارنالار ء"تىرى ارتەريالار" سياقتى بارلىق ازاماتتارعا كولگە ەمىن-ەركىن جەتۋگە مۇمكىندىك بەرەدى. بولاشاقتا ورمان ساياباعى قارقىندى دامىپ كەلە جاتقان قالانىڭ جاسىل ورتالىعىنا اينالادى. بۇل ەلوردانىڭ جاسىل كاپيتال يدەياسىن جالعاستىرۋ ءۇشىن ماڭىزدى قادام.
قازاقستاندىق بيوالۋانتۇرلىلىك قاۋىمداستىعى جوباعا ساراپتامالىق قولداۋ كورسەتەدى. قاجەت بولسا, شەتەلدىك ماماندار تارتىلادى. قاۋىمداستىق پەن RSPB قىزمەتكەرلەرى بيولوگيالىق جانە لاندشافتتىق ارتۇرلىلىكتى تۇگەندەۋگە باعىتتالعان بىرقاتار عىلىمي زەرتتەۋلەر جۇرگىزەدى. ولاردىڭ جۇمىسىنىڭ ناتيجەلەرى ەكولوگيالىق پاركتى قۇرۋدىڭ كەلەسى كەزەڭدەرىنە نەگىز بولادى.
نۇرلان ۋرانحاەۆ, ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى:
"بۇگىندە قالا "نۇر-سۇلتان – جايلى قالا" باس جوسپارى اياسىندا دامىپ كەلەدى. وسى قۇجاتتىڭ مىندەتتەرىنىڭ ءبىرى – ەلوردا تۇرعىندارى مەن قوناقتارىنىڭ جايلىلىعى ءۇشىن تارتىمدى ورتالىقتار قۇرىپ, ىشكى ءتۋريزمدى دامىتۋ. وسىنداي ەكو-پاركتەر نۇر-سۇلتاننىڭ جاسىل بەلدەۋىن قالىپتاستىرۋ جوباسىنا سايكەس كەلەدى جانە دەمالۋشىلاردىڭ سۇيىكتى ورنىنا اينالۋى مۇمكىن. جوبانىڭ تۇجىرىمداماسى – بارلىق بيوالۋانتۇرلىلىك پەن تابيعي كورىنىستەرمەن بەلگىلى ءبىر قورعالاتىن اۋماق قۇرۋ. ەكولوگيالىق ءتۋريزمدى ات مارشرۋتتارىن قۇرا وتىرىپ دامىتۋ جوسپارلانۋدا. وسى ماقساتتا ساياباقتىڭ قوناقتارى ءۇشىن ارنايى سوقپاقتار جاسالادى", دەيدى ول.