الەۋمەتتى شۋلاتقان ءالي وقاپوۆ وتاۋ تىگىپ, ءانشى تورەعالي ءتورالىنىڭ قارىنداسىنىڭ ۇزاتۋ تويى ءوتتى» دەگەن اقپارات «جۇلدىزدى وتباسىلاردىڭ» سالتاناتتى راسىمدە تۇسكەن سۋرەتتەرى جانە بەينەبايانىمەن قوسا جەلىنى شارلاپ كەتتى.
ەل ءىشى ىندەتپەن كۇرەسىپ, «مالىم – جانىمنىڭ ساداعاسى» دەپ جاتقان كەزەڭدە تانىمال ارتىستەردىڭ مۇنىسى نەسى دەگەن جۇرتشىلىق ءالىپتىڭ ارتىن باعىپ, الاڭداسقان. بۇل اقپارات رەسمي ورگانداردىڭ نازارىنا ىلىگىپ, تەكسەرۋ امالدارى جۇرگىزىلگەنى بەلگىلى.
تانىمال شوۋ-بيزنەس وكىلدەرىنىڭ وتباسىنا قاتىستى اقپاراتقا وراي دەنساۋلىق ساقتاۋ مينيسترلىگىنىڭ رەسمي وكىلى ب.قوجاحمەتوۆ ماسەلەنىڭ مينيستر ا.تسويدىڭ باقىلاۋىنا الىنعانىن ءارى الماتىنىڭ باس سانيتار دارىگەرى ج.بەكشينگە دە ارنايى حابارلانعانىن ايتقان بولاتىن. ماسەلەنىڭ ءمانىسىن بىلمەك ماقساتتا الماتىنىڭ باس سانيتار دارىگەرىنە دە حابارلاستىق. ساۋالدارىمىزعا وراي دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ رەسمي وكىلى جاۋاپ بەرەدى دەگەننەن كەيىن ەرجان بايتاناەۆتان دا جاۋاپ كۇتتىك. بىراق ساۋالىمىزعا ازىرگە ناقتى جاۋاپ جوق.
الەۋمەتتىك جەلىدە تاراعان اقپاراتتى تەكسەرۋ جانە ناقتى سانيتارلىق نورمالاردىڭ بۇزىلعانىن انىقتاۋ ماقساتىندا الماتى قالاسى پوليتسيا دەپارتامەنتتىڭ رەسمي وكىلى س.ازىربەك الەۋمەتتىك جەلىدە تاراعان دەرەككە بايلانىستى پوليتسيا اقپارات جيناپ, ءتيىستى ورگاندارعا وتكىزگەنىن مالىمدەدى. انىقتالعان مالىمەتتەر بويىنشا ۋچاسكەلىك ينسپەكتورلار جيناعان ماتەريالداردى ءتيىستى ورگاندار قاراستىرعاننان كەيىن اكىمشىلىك كودەكستىڭ 425-بابىنا سايكەس شەشىم قابىلدانادى.
دەسەك تە, حالىق ءارتىسى روزا رىمباەۆانىڭ وزىنەن ماسەلەنىڭ ءمان-جايىن ۇعۋ ءۇشىن تەلەفون سوققانىمىزدا, الەۋمەتتىك جەلىدەگى سۋرەتتەر كەلىنگە سىرعا سالۋ راسىمىنە بايلانىستى ەكەندىگىن ەستىدىك. «وتباسى مۇشەلەرى عانا قاتىسقان سىرعا سالۋ ءراسىمىن دابىراداي توي وتكىزدى» دەگىزىپ, جەلىدە شۋلاتقان بلوگەرلەرگە رەنىشىن بىلدىرگەن روزا قۋانىشقىزى قازاقستاننىڭ ازاماتى رەتىندە ەل ىشىندە بەلگىلەنگەن كارانتين رەجىمىندەگى ءتارتىپ بارشاعا ورتاق ەكەندىگىنە توقتالدى. سوندىقتان دا جالپىعا ورتاق تالاپتاردى ساقتاي وتىرىپ, تويدىڭ نەگىزگى جورالعىسىن ەل ءىشى تىنىشتالىپ, ىندەتتىڭ بەتى اۋلاق كەتكەننەن كەيىن, ەلىمىز مامىراجاي تىرشىلىگىنە قايتا ورالعاندا عانا جاقىندارمەن اتاپ وتەرمىز دەگەن ويىن ورتاعا سالدى.
ال ۇزاتىلعان فاريزا ءتورالىنىڭ وتباسىمەن سويلەسۋدىڭ ءساتى تۇسپەدى. ءانشى تورەعالي ءتورالىنىڭ كومەكشىلەرى وتباسىنىڭ رەسمي اقپارات بەرمەيتىنىن جەتكىزدى.
بۇدان بۇرىن ءمالىم بولعانىنداي, ادىلەت مينيسترلىگى تاراپىنان كارانتين ءتارتىبىن ساقتاماي توي جاساعانداردىڭ جازالاناتىندىعى ەسكەرتىلگەن ەدى. مۇنداي جاعدايدا ءتيىستى زاڭ بابىنا سايكەس, العاشقى جاعدايدا ايىپتالۋشىعا 83 مىڭ تەڭگە كولەمىندە ايىپپۇل سالىنادى. ەگەر مۇنداي شارالاردىڭ بارىسىندا ازاماتتار جاپپاي ۆيرۋس جۇقتىرسا, ايىپپۇلدىڭ دا كولەمى ايتارلىقتاي كوپ بولادى. ال وقيعانىڭ سالدارى جاعىمسىز جاعدايعا اپارسا, قىلمىستىق ءىس تە قوزعالۋى ىقتيمال.
كوروناۆيرۋس ينفەكتسياسىنان قورعانۋدىڭ باستى تالابى – وقشاۋلانۋ مەن جەكە باس گيگەناسىن ساقتاۋ ەكەندىگىن ەسكەرەتىن بولساق, جۇرتشىلىق كوپ شوعىرلانعان اۋماقتاردا سانيتارلىق-ەپيدەميالىق ەرەجەلەردى قاتاڭ ساقتاۋ مىندەتتى. ەلىمىزدە بلوك-بەكەتتەر الىنىپ, ءدامحانا مەن مەيرامحانالار اشىلعاننان كەيىن دە توي-تومالاق وتكىزۋگە رۇقسات بەرىلمەيتىندىگىن ەلىمىزدىڭ باس سانيتار دارىگەرى ا.ەسماعامبەتوۆا دا مالىمدەگەن بولاتىن. وندا وتباسىلىق شارالاردى وتكىزۋگە تىيىم سالىنعاندىعىن جەتكىزىپ, ءدامحانا-مەيرامحانالارعا, ءتىپتى 20-30 ادام دا شاقىرۋعا رۇقسات بولمايتىنىن اتاپ وتكەن-ءدى. قاتاڭ تالاپتار كارانتيننىڭ ەكىنشى كەزەڭىندە جەڭىلدەگەنىمەن دە, جاپپاي ۇجىمدىق شارالاردى وتكىزۋگە بولمايتىندىعى تاعى دا ەسكەرتىلدى. ەلىمىزدىڭ باس سانيتار دارىگەرى سونىمەن بىرگە ەلدەگى ەپيدەميالىق جاعداي توي-تومالاق, ءدىني جانە وتباسىلىق شارالاردى وتكىزۋگە مۇمكىندىك بەرمەيتىنىن دە اتاپ وتكەن بولاتىن.
الايدا تويقۇمارلارعا توقتام بولماي تۇر. الماتى قالاسى پوليتسيا دەپارتامەنتى ءتيىستى قوعامدىق ءتارتىپتى ساقتاۋ, قالانىڭ سەگىز اۋدانىندا كوشەدە جانە قوعامدىق ورىنداردا قۇقىق بۇزۋشىلىق پەن قىلمىستىڭ ۋاقتىلى الدىن الۋ جانە جولىن كەسۋ ماقساتىندا اعىمداعى جىلدىڭ 25-27 تامىز كۇندەرى «قۇقىق ءتارتىبى» جەدەل الدىن الۋ ءىس-شاراسىن قولعا الدى. «قۇقىق ءتارتىبى» الدىن الۋ ءىس-شاراسىنا بارلىق اۋدانداردىڭ پوليتسيا قىزمەتكەرلەرى, ۇلتتىق ۇلاننىڭ اسكەري قىزمەتشىلەرى, سونداي-اق پوليتسيانىڭ قوعامدىق كومەكشىلەرى جۇمىلدىرىلعان. كۇندىز دە, تۇندە دە پاترۋلدىك باعىتتار جۇمىس ىستەيدى. جەدەل الدىن الۋ ءىس-شاراسىنىڭ مىندەتتەرى – ەسەپتە تۇرعان ادامداردى تەكسەرۋ, زاڭسىز پاتەر جالداپ تۇرعان ادامداردى انىقتاۋ, قارۋ يەلەرىن تەكسەرۋدى ماقسات ەتەدى. دەپارتامەنتتىڭ تاياۋداعى اقپاراتىنا جۇگىنسەك, ارنايى مونيتورينگ توبى 3423 ادامدى اكىمشىلىك جاۋاپقا تارتىپ, رەيد كەزىندە بىرقاتار زاڭسىز ىستەگەن نىسانداردى انىقتاعان. ونىڭ ىشىندە 5 ساۋنا, 7 تۇنگى كلۋبى, 32 كافە, 17 مەيرامحانا, 12 ماسساج بولمەسى جانە 7 كاراوكە كلۋبى بار. قازىرگى كەزدە ولاردىڭ يەلەرىنە قاتىستى اكىمشىلىك كودەكس بويىنشا 236 ايلىق ەسەپتىك كورسەتكىش رەتىندە 39 ملن تەڭگە ايىپپۇل سالىنعان.
بۇگىندە مۇنداي دەرەكتەر الماتى عانا ەمەس, ەلىمىزدىڭ باسقا دا وڭىرلەرىندە انىقتالىپ, جاسىرىن توي وتكىزىپ جاتقانداردىڭ ارەكەتى اشكەرە بولۋدا. تۇركىستان وبلىسىندا كارانتيندە جاسىرىن جاسالعان 12 توي توقتاتىلىپ, توي وتكىزگەندەرگە 30 ايلىق ەسەپتىك كورسەتكىش كولەمىندە ايىپپۇل سالىنسا, قىزىلوردا وبلىسىندا دا 13 جەكە تۇلعا اكىمشىلىك جاۋاپقا تارتىلعانى بەلگىلى. مۇنداي دەرەكتەر پەتروپاۆل قالاسى مەن باتىس قازاقستان, ت.ب. بىرقاتار وڭىردە دە تىركەلدى.
مەملەكەت باسشىسى اتاپ وتكەنىندەي, حالقىمىزدىڭ تاعدىرى تاريح تارازىسىندا تۇرعان ساتتە, توي تويلاپ جۇرەتىن ۋاقىت ەمەس. بىراق تىيىم-شەكتەۋلەردى ەلەمەي جۇرگەندەردى ەل مەن جۇرتتىڭ جايى تولعاندىرا قويمايتىن ءتارىزدى. ىرگەمىزدەن ىندەتتىڭ اۋىلى ءالى الىستاعان جوق. الەم ابىگەرگە ءتۇسىپ الەك. بىراق كارانتيننىڭ كەلەسى كەزەڭى كەلگەنشە توي جاساپ الايىق دەپ جۇگىرگەن جۇرتقا توقتام بولماي تۇر.