جىل سايىن سارى-الا كۇزدىڭ باسى ماسكەۋ ءۇشىن ادەبي وقيعالارعا تولى بولادى. بۇل يگى ءداستۇر وسى جولى دا جالعاسىن تاۋىپ, 2 قىركۇيەكتە رەسەي استاناسىندا 33-ءشى حالىقارالىق كىتاپ جارمەڭكەسى باستالماق, دەپ حابارلايدى Egemen.kz.
الەم اۆتورلارى مەن ءتۇرلى باسپالاردىڭ باسىن قوساتىن اۋقىمدى شارا قالانىڭ مادەني وشاقتارىنىڭ ءبىرى – «مانەج» ورتالىق كورمە زالىندا وتەدى. قازىرگى زاماناۋي ادەبيەتتەگى جاڭا تۋىندىلار, لەكتسيا, ديسكۋسسيالىق وتىرىستار, تانىمال جازۋشىلارمەن كەزدەسۋلەر ءھام كىتاپ شىعارۋ ىسىندەگى اقىلداسۋلار – ەرتەڭگى جارمەڭكەنىڭ ءبىر بولىگى عانا. ايتا كەتەيىك, حالىقارالىق كىتاپ جارمەڭكەسى ونلاين جانە وففلاين فورماتىندا وتكىزىلەدى. جوسپارداعى ايدىك اۆتورلار كارانتيندىك شارالارعا بايلانىستى وقىرماندارمەن قاشىقتان اڭگىمە وربىتپەك.
بيىلعى كىتاپ جارمەڭكەسىنىڭ ارنايى قوناعى وڭتۇستىك كورەيا رەسپۋبليكاسى ەكەن. جانە ولار ادەبيەت مەيرامىنا ونلاين تۇردە دە قاتىسا الادى. بايقاۋىمىزشا, كىتاپ جارمەڭكەسى ۇزاق ۋاقىتقا سوزىلعان قاتاڭ كارانتيننەن كەيىنگى ءومىردىڭ اقىرىنداپ قالىپقا كەلە باستاۋىنا ىقپال ەتەتىن سياقتى.
كۇزدىڭ باسىن الا الەمنىڭ تۇكپىر-تۇكپىرىنەن ماسكەۋگە قاراي اعىلاتىن مادەني جۇرتتىڭ قاتارىندا ءبىزدىڭ «فولليانت» باسپاسى دا بار ەدى. الايدا, وسى جىلى كارانتينگە بايلانىستى قازاقستاندىق باسپا قاتىسا المايدى. تەك «فولليانتتىڭ» ماسكەۋدەگى وكىلدەرى جارمەڭكەگە اتسالىسپاق.
33-رەت وتكىزەلەتىن ماسكەۋ حالىقارالىق كىتاپ جارمەڭكەسى 6 قىركۇيەككە دەيىن سوزىلادى.