شىمكەنت قالاسىندا "Shymkent» اكك" اق-ى 65 ينۆەستيتسيالىق جوبا جۇزەگە اسىرماق. بۇگىنگى تاڭدا جالپى سوماسى 100 ملرد. تەڭگەدەن استام 32 جوبا جۇزەگە اسىرىلۋدا. ال, قۇنى 287 ملرد. تەڭگەنى قۇرايتىن 33 ينۆەستيتسيالىق جوبا بويىنشا اكك سەرىكتەستەرىمەن قۇجاتتار راسىمدەلۋدە. بۇل تۋرالى بۇگىن اقپاراتتىق-كوممۋنيكاتسيالىق ورتالىقتا وتكەن بريفينگتە "Shymkent" اكك" اق-ىنىڭ توراعاسى ب.كانكين ءمالىم ەتتى, دەپ حابارلايدى Egemen.kz
سپيكەردىڭ ايتۋىنشا, جوبالاردىڭ باسىم كوپشىلىگى ءبىلىم, دەنساۋلىق ساقتاۋ, تۇرعىن ءۇي كەشەنى مەن قىزمەت كورسەتۋ سالالارىندا ەكەن.
—2019 جىلى قالانىڭ نەگىزگى كاپيتالىنا سالىنعان ينۆەستيتسيالار كولەمى 195 ملرد. تەڭگەنى قۇراعانىن ەسكەرسەك, تەك تۇرعىن ءۇي قۇرىلىسىنىڭ جوبالارى وسى كورسەتكىشتىڭ وسۋىنە ايتارلىقتاي ۇلەس قوسادى. سوندىقتان الەۋمەتتىك كاسىپكەرلىك كورپاراتسيا تاراپىنان 2024 جىلعا دەيىن شامامەن جالپى الاڭى 700 مىڭ شارشى مەتردى قۇرايتىن تۇرعىن ءۇي پايدالانۋعا بەرۋ جوسپارلانىپ وتىر, - دەدى ب.كانكين.
الەۋمەتتىك سالاداعى جوبالار "Shymkent" الەۋمەتتىك كاسىپكەرلىك كورپاراتسياسىنىڭ باسىم باعىتتارىنىڭ ءبىرى ەكەنىن ايتقان توراعا بيىل 8 700 ورىندىق 9 مەكتەپ پەن 181 مىڭ تۇرعىندى مەديتسينالىق كومەكپەن قامتاماسىز ەتۋگە مۇمكىندىك بەرەتىن 6 ەمحانا قۇرىلىسى جۇرگىزىلىپ جاتقانىن اتاپ ءوتتى.