شىمكەنت قالاسىندا جىل باسىنان بەرى «ەڭبەك» باعدارلاماسى اياسىندا 600-گە جۋىق مۇمكىندىگى شەكتەۋلى ازامات جۇمىسقا ورنالاستىرىلدى. ونىڭ 279-ى تۇراقتى جۇمىسقا ورنالاسقان بولسا, 12-ءى الەۋمەتتىك جۇمىسقا, 190 ازامات قوعامدىق جۇمىستارعا, 80 ازامات ينفراقۇرىلىمدىق جۇمىسقا جىبەرىلگەن. ال 29-ى جاستار پراكتيكاسى جوباسى كومەگىمەن العاشقى تاجىريبە جيناقتادى. بۇل تۋرالى قالا اكىمدىگىنىڭ حالىقتى جۇمىسپەن قامتۋ ورتالىعى مالىمدەدى.
حالىقتى جۇمىسپەن قامتۋ ورتالىعى ەڭبەككە قابىلەتى بار بارلىق مۇمكىندىگى شەكتەۋلى ازاماتتارعا جۇمىسپەن قامتۋ سالاسىندا مەملەكەتتىك قىزمەتتەر ءتۇرىن ۇسىنادى. اتاپ ايتقاندا جۇمىسپەن قامتۋعا ىقپال ەتۋ, كاسىبي دايارلاۋ, جۇمىسپەن قامتۋدىڭ بەلسەندى شارالارىنا قاتىسۋعا, جاڭا بيزنەس-جوسپارىن دامىتىپ گرانت الۋعا, ارنايى جۇمىس ورىندارىن قۇرۋ سىندى قىزمەتتەر كورسەتەدى.
جالپى ءى,ءىى,ءىىى توپتاعى مۇگەدەكتەر جۇمىسقا جارامدى انىقتامالارى ارقىلى جۇمىسقا ورنالاسا الادى. ونىڭ ءى, ءىى توپتاعىلارىنىڭ تولىق ەمەس جۇمىس ۋاقىتى بەلگىلەنگەن, ياعني 8 ساعات ەمەس 6-ساعات جۇمىس جاسايدى.
قازىرگى تاڭدا شىمكەنت قالاسىندا 38 124 مۇمكىندىگى شەكتەۋلى ازامات تىركەلگەن. ونىڭ ىشىندە 3 681-ءى ءبىرىنشى توپتاعى مۇگەدەكتەر بولسا, 16 مىڭنان استامى ەكىنشى توپتاعى مۇگەدەكتەر, ال 12283-ءى ءۇشىنشى توپتاعى مۇگەدەكتەر.