سيريادا گاز قۇبىرى جارىلىپ, بۇكىل ايماق جارىقسىز قالدى. ەل بيلىگى جارىلىستىڭ قولدان جاسالعانىن, ونى ۇيىمداستىرعان دايش تەرروريستىك ۇيىمى بولۋى مۇمكىن ەكەنىن مالىمدەدى.
«ەنەرگەتيكا ءمينيسترى زۋحاير ءحاربوتليدىڭ سوزىنە سۇيەنسەك, داماسك ماڭىنداعى جارىلىس سالدارىنان بۇكىل ەل ايماعىندا ەلەكتر قۋاتى ءسونىپ قالعان. ال مۇناي ءمينيسترى ءالي گانەم جارىلعان گاز قۇبىرى ءۇش ەلەكتر ستانساسىن كوگىلدىر وتىنمەن قامتاماسىز ەتىپ وتىرعانىن حابارلادى.
بيلىك وكىلدەرى جارىق جۇيەسى قايتا قالپىنا كەلتىرىلگەنىن ايتىپ وتىر. جارىلىس اراب گاز قۇبىرى جەلىسىنىڭ بويىندا, اد-دۋماير جانە ادرا قالاسىنىڭ ورتاسىندا بولعان», دەپ حابارلايدى Reuters اگەنتتىگى.
اقش-تىڭ سيرياداعى ارنايى وكىلى دجەيمس دجەفرەي كەيىنگى ۋاقىتتا دايش سودىرلارى قايتادان كۇشەيە باستاعانىن ايتىپ, دابىل قاعىپ وتىر. ونىڭ سوزىنە قاراعاندا, قازىرگى تاڭدا تەرروريستەر ەلدىڭ وڭتۇستىك-شىعىس ايماعىندا كوبەيىپ بارادى.
«جارىلىستىڭ سالدارىن زەرتتەپ جاتىرمىز. بىراق شابۋىلدى دايش تەررورشىلارى ۇيىمداستىرعانى انىق», دەيدى د.دجەفرەي.
جارىلىس بولعان اراب گاز قۇبىرى ەگيپەتتەن باستالىپ, يوردانيا مەن سيريا اۋماعىنان وتەدى. وقيعادان كەيىن جەرگىلىكتى ارنالار وتقا ورانعان گاز قۇبىرىنىڭ ۆيدەوسىن جاريالاعان. Reuters اگەنتتىگىنىڭ مالىمەتىنشە, داماسكىدە جارىق كوپ ۇزاماي قايتا جانعان. جالپى, سيريا ءبىرىنشى رەت جارىقسىز قالىپ وتىرعان جوق. بۇعان دەيىن 2013 جىلى سودىرلار گاز قۇبىرىن زاقىمداپ, ءبىراز ۋاقىت تۇرعىندار ەلەكتر ەنەرگياسىنسىز قالعان ەدى.