Nur Otan پارتياسى سولتۇستىك قازاقستان وبلىستىق فيليالى توراعاسىنىڭ ءبىرىنشى ورىنباسارى اسەم راحمەتوۆا جۋرناليستەرگە ارنالعان بريفينگتە پرايمەريز باستالعان العاشقى 4 كۇندە سولتۇستىكقازاقستاندىق 400-دەن استام ادام وعان قاتىسۋعا نيەت بىلدىرگەنىن جەتكىزدى.
– بارلىق ءوتىنىش بىلدىرگەن 405 ادامنىڭ 173-ءى ايەل, سونىڭ ىشىندە جەتەۋى كوپبالالى انا, – دەدى ءا.راحمەتوۆا. – كانديداتتاردىڭ جاستارىنا كەلەتىن بولساق, 35-تەن 50 جاسقا دەيىنگى كانديداتتاردىڭ ۇلەسى – 46 پايىز, ال 35-كە دەيىنگىلەر – 24 پايىز. قىزمەت ەتۋ سالالارىن الاتىن بولساق, 49 پايىزدىق ەڭ ۇلكەن ۇلەستى ءبىلىم سالاسىنىڭ قىزمەتكەرلەرى الىپ وتىر. ودان كەيىنگى ورىندا شوب وكىلدەرى. ولار 12 پايىزدىق ۇلەستى يەلەنگەن. سونىمەن بىرگە اۋىل شارۋاشىلىعى, دەنساۋلىق ساقتاۋ, سپورت, مادەنيەت سالاسىنىڭ وكىلدەرى دە بار.
ەسكە سالا كەتەتىن بولساق, پرايمەريزگە قاتىسۋشىلاردىڭ ۇگىت-ناسيحات جۇمىستارى 7 قىركۇيەكتەن باستالىپ, 3 قازاندا اياقتالادى. ونى كانديداتتار وزدەرىنىڭ جەكە قارجىلارىنىڭ ەسەبىنەن جۇرگىزەدى. شەتەلدىك زاڭدى تۇلعالار مەن ازاماتتارىنىڭ قارجىلاندىرۋىنا تىيىم سالىنعان. سونداي-اق مەملەكەتتىك ورگانداردىڭ قارجىلاندىرۋىنا دا بولمايدى.
ءا.راحمەتوۆا ءوزىنىڭ سوزىندە كانديداتتاردىڭ دەباتتارعا قاتىسىپ, وزدەرىنىڭ باعدارلاماسىن ايتۋى مىندەتتەلەتىنىن ەسكەرتتى.
– ولارعا كەز كەلگەن قاتىسۋشى سۇراقتار قويا الادى. دەباتتىڭ ۇزاقتىعى 90 مينۋتتان اسپايدى. قالالىق جانە اۋداندىق ماسليحاتتارعا قاتىسۋشىلار كەم دەگەندە ءبىر دەباتقا, وبلىستىق ماسليحاتقا وتۋدەن ۇمىتكەرلەر ەكى دەباتقا جانە ءماجىلىس دەپۋتاتى بولۋدى قالايتىندار ءۇش دەباتقا قاتىسۋى كەرەك, – دەدى ول.
ۇمىتكەرلەرگە داۋىس بەرۋ 1-3 قازان ارالىعىندا وتەدى.
سولتۇستىك قازاقستان وبلىسى