پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا كونستيتۋتسيالىق كەڭەس اپپاراتىنىڭ باسشىسى باقىت نۇرمۇحانوۆ پەن كونستيتۋتسيالىق كەڭەس مۇشەسى ءۇنزيلا شاپاقتىڭ قاتىسۋىمەن «قازاقستان رەسپۋبليكاسىنىڭ كونستيتۋتسياسى – قوعام مەن مەملەكەتتى جاڭعىرتۋعا نەگىز» تاقىرىبىندا ءباسپاسوز ءماسليحاتى ءوتتى.
جيىن بارىسىندا اتا زاڭنىڭ ماڭىزى, كونستيتۋتسيالىق كەڭەستىڭ نەگىزگى مىندەتتەرى تۋرالى ايتا كەلە, كونستيتۋتسيانىڭ 25 جىلدىعىنا جوسپارلانعان شارالار جونىندە حابارلاندى. ءۇنزيلا شاپاقتىڭ ايتۋىنشا, كونستيتۋتسيالىق كەڭەستىڭ نەگىزگى قىزمەتى ازاماتتار قۇقىقتارىنىڭ ۇستەمدىگىن جانە جالپى مەملەكەتتىك قۇندىلىقتى بەكىتەتىن نەگىزگى زاڭنىڭ مىزعىماستىعىن قامتاماسىز ەتۋگە باعىتتالعان.
– 1996 جىلدان باستاپ بۇگىنگى كۇنگە دەيىن كونستيتۋتسيالىق كەڭەسكە 200 ءوتىنىش كەلىپ ءتۇستى. بارلىق ءوتىنىشتىڭ 29-ى پارلامەنت قابىلداعان جانە مەملەكەت باسشىسىنا قول قويۋعا ۇسىنىلعان زاڭداردىڭ كونستيتۋتسياعا سايكەستىگىن تەكسەرۋ بولعان. ال 15 ءوتىنىش بويىنشا جالپى العاندا 17 زاڭ اتا زاڭعا سايكەس ەمەس دەپ تانىلعان. كونستيتۋتسيالىق كەڭەس كونستيتۋتسيانىڭ نورمالارىن رەسمي ءتۇسىندىرۋ تۋرالى 100-دەن استام ءوتىنىشتى قارادى. ولار بويىنشا, 80-نەن استام نورماتيۆتىك قاۋلى قابىلداندى», دەدى ءۇ.شاپاق. ونىڭ سوزىنەن كونستيتۋتسيانىڭ ەنتسيكلوپەديالىق انىقتامالىعى جارىق كورگەنى بەلگىلى بولدى. ونى دايىنداۋعا قازاقستاندىق عالىمدار اتسالىسقان.
كونستيتۋتسيالىق كەڭەس اپپاراتىنىڭ باسشىسى باقىت نۇرمۇحانوۆ اتا زاڭنىڭ 25 جىلدىعىنا وراي جوسپارلانعان شارالارعا توقتالدى. ونىڭ حابارلاۋىنشا, ەڭ الدىمەن مەرەكەنىڭ بىرىڭعاي لوگوتيپى پايدالانىلادى. ەكىنشىدەن, كونستيتۋتسيانىڭ ۇستەمدىگىن قامتاماسىز ەتۋگە, ەلدىڭ تاۋەلسىزدىگىن نىعايتۋعا, ادام مەن ازاماتتىڭ كونستيتۋتسيالىق قۇقىقتارى مەن بوستاندىقتارىن قورعاۋعا قوسقان ەلەۋلى ۇلەسى ءۇشىن بىرقاتار قازاقستاندىق مەرەيتويلىق مەدالمەن جانە توسبەلگىلەرىمەن ماراپاتتالادى.
ودان كەيىن ب.نۇرمۇحانوۆ مەملەكەتتىك ورگاندار مەن قوعامدىق ۇيىمدارعا ماراپاتتاۋ ءۇشىن كۆوتالار بولىنگەنىن مالىمدەدى. سونداي-اق پاندەميامەن كۇرەسكە تارتىلعان كاسىپ وكىلدەرىنە ەرەكشە نازار اۋدارىلماق. ولاردىڭ قاتارىندا دارىگەرلەر, ۆولونتەرلەر قۇقىق قورعاۋ ورگاندارىنىڭ قىزمەتكەرلەرى جانە باسقالارى بار.
ۇلتتىق ءىس-شارالار جوسپارى اياسىندا كونستيتۋتسيالىق كەڭەس 24-30 تامىز ارالىعىندا «اتا زاڭ اپتالىعى» جوباسىن جۇزەگە اسىرادى. «جوبانىڭ ماقساتى – قوعام مەن مەملەكەتتى جاڭعىرتۋداعى كونستيتۋتسيانىڭ ءرولىن تەرەڭ ءتۇسىنۋ, حالىقتىڭ قالىڭ جىگىنىڭ نازارىن نەگىزگى زاڭعا اۋدارۋ, «رۋحاني جاڭعىرۋ» جالپىۇلتتىق باعدارلاماسى اياسىندا قوعامنىڭ كونستيتۋتسيالىق مادەنيەتىن ارتتىرۋ. ەلدەگى ەپيدەميالىق جاعدايدى ەسكەرە وتىرىپ, ولاردىڭ بارلىعى ونلاين رەجىمدە وتەدى. وسى جوبا اياسىندا بۇكىل ەل بويىنشا ونلاين كونفەرەنتسيالار, دوڭگەلەك ۇستەلدەر, تەگىن زاڭ كەڭەستەرى, ۆەبينارلار, قايىرىمدىلىق اكتسيالارى, جاڭا نىسانداردى پايدالانۋعا بەرۋ, پاتەرلەردىڭ كىلتتەرىن, جەكە كۋالىكتەردى تاپسىرۋ جانە باسقا دا ءىس-شارالار ۇيىمداستىرىلادى», دەدى ب.نۇرمۇحانوۆ.
ءىس-شارالار كۇنتىزبەسىن سايتتاردان جانە بىرلەسكەن ۇيىمداستىرۋشىلاردان الۋعا بولادى. كونستيتۋتسيالىق كەڭەستىڭ نەگىزگى سەرىكتەستەرى – اقپارات جانە قوعامدىق دامۋ مينيسترلىگى, وبلىستاردىڭ, نۇر-سۇلتان, الماتى جانە شىمكەنت قالالارىنىڭ اكىمدىكتەرى, «اتامەكەن» ۇلتتىق كاسىپكەرلەر پالاتاسى جانە باسقا دا ۇيىمدار.
جيىن سوڭىندا ۇلتتىق بانك جاڭا مەرەيتويلىق مونەتالاردى اينالىمعا شىعارۋدى جوسپارلاپ وتىرعانى ايتىلدى. گرافيكالىق كومپوزيتسيانىڭ نەگىزى رەتىندە كونستيتۋتسيانىڭ 25 جىلدىعىنىڭ رەسمي لوگوتيپى قولدانىلدى. نومينالى 200 تەڭگەلىك 3 مىڭ مونەتا جانە 50 مىڭ «100 تەڭگە» دايىندالدى.