كاۆاساكيگە ۇقساس سيندروم

دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ سوڭعى ءۇش اپتادا ەلىمىزدە كوروناۆيرۋس ينفەكتسياسى مەن پنەۆمونيا اۋرۋى بويىنشا جاعدايدىڭ تۇراقتانعانىن اتاپ ءوتتى. ونىڭ ايتۋىنشا, 3-9 تامىز ارالىعىندا 7108 ادام كوروناۆيرۋس ينفەكتسياسىن جۇقتىرىپ, 222 ادام قايتىس بولعان. 7940 ازامات پنەۆمونيامەن اۋىرىپ, سونىڭ سالدارىنان 122 ادام كوز جۇمعان. ال 10-16 تامىز ارالىعىندا كۆي پتر (+) دياگنوزى 3995 ادامدا, كۆي پتر (-) 5344 ادامدا انىقتالدى. بۇل جەردە ىندەت انىقتالعانداردان 151 ادام جانە پنەۆمونيادان 64 ادام قايتىس بولدى. سوڭعى اپتادا – 17-23 تامىز ارالىعىندا 1685 ادامدا COVID-19, 4138 ناۋقاستا پنەۆمونيا راستالدى. كۆي-دان 108, پنەۆمونيادان 40 ادام باقيلىق بولدى.

بريفينگكە بەينەبايلانىس ارقىلى قوسىلعان ەلىمىزدىڭ باس پەدياترى, پەدياتريا جانە بالالار حيرۋرگياسى عىلىمي ورتا­لىعىنىڭ باسقارما توراعاسى ريزا بورانباەۆا مۋلتيجۇيەلىك قابىنۋ سيندرومى – كاۆاساكي سيندرومى تۋرالى باياندادى.

«بالالار مەن جاسوسپىرىمدەردە كەزدەسەتىن مۋلتيجۇيەلىك قابىنۋ سيندرومى – ۋاقىتشا COVID-19 ىندەتىمەن قاباتتاسقان, اۋرۋدان جازىلعاننان كەيىن بولاتىن يممۋنولوگيالىق قۇبىلىس. ياعني COVID-19-عا شالدىققان بالالاردا 3-5 اپتا وتكەن سوڭ داميتىن ينفەكتسيادان كەيىنگى سيندروم. مۋلتيجۇيەلىك قابىنۋ سيندرومىنىڭ تاعى ءبىر اتاۋى – كاۆاساكيگە ۇقساس سيندروم. ويتكەنى مۇنىڭ كلينيكالىق بەلگىلەرى كاۆاساكي اۋرۋىنا ۇقسايدى, بىراق بەلگىلى ءبىر ايىرماشىلىقتارى بار. كاۆاساكي اۋرۋى بالالاردا ەرتە داميدى, ال مۋلتيجۇيەلىك قابىنۋ سيندرومى 21 جاسقا دەيىنگى جاسوسپىرىمدەر مەن جاستاردا دا تىركەلەدى. كاۆاساكي اۋرۋى بۇكىل الەمدە وتە سيرەك كەزدەسەدى, قازاقستاندا جىل سايىن 2-5 جاعداي انىقتالادى», دەدى ر.بورانباەۆا.

باس پەدياتردىڭ ايتۋىنشا, بۇل دەرتكە COVID-19 جۇقتىرعان بالالاردىڭ بارلىعى شالدىقپايدى. تەك كەيبىر بالالاردا كاۆاساكي اۋرۋىنا ۇقساس كلينيكالىق بەلگىلەر بايقالادى, ول اۋىر ءوتۋى مۇمكىن. سوندىقتان ەرتە دياگنوز قويىپ, تەراپيانى ۋاقتىلى باستاۋ وتە ماڭىزدى. 23 تامىزداعى جاعداي بويىنشا رەسپۋبليكامىزدا 16 بالاعا مۋلتيجۇيەلىك قابىنۋ سيندرومى دياگنوزى قويىلدى. ونىڭ ىشىندە 8 بالا جاقسى ناتيجەمەن ەمدەلىپ شىقسا, قالعاندارى كوپبەيىندى بالالار اۋرۋحاناسىندا ەمدەلۋدە.

دەنساۋلىق ساقتاۋ مينيسترلىگى COVID-19-بەن اۋىرعان بالالاردا مۋلتيجۇيەلىك قابىنۋ سيندرومىنىڭ بەلگىلەرى بولسا, بالا مىندەتتى تۇردە كوپبەيىندى بالالار اۋرۋحاناسىنا جاتقىزىلۋى كەرەك ەكەنىن ەسكەرتەدى. كاۆاساكيگە ۇقساس سيندرومى بار ناۋقاستاردى ينفەكتسيونيست, رەۆماتولوگ, كارديولوگ, گەماتولوگ, رەانيماتولوگ سياقتى پەدياتريالىق ما­ماندار توبى دياگنوستيكالاپ, ەمدەيدى.

كاۆاساكي سيندرومىنىڭ نەگىزگى كليني­كالىق بەلگىلەرى مىناداي:

– تەمپەراتۋرا 24 ساعات ىشىندە 38,5 گرادۋستان جوعارى بولادى;

– اسقازان-ىشەك جولدارىنىڭ زاقىمدانۋى – ءىش اۋىرادى, قۇسۋ, جۇرەك اينۋ, ديارەيا;

– تىنىس الۋ جۇيەسىنىڭ 50%-ى زاقىمدانۋى مۇمكىن. ياعني جوتەل, پنەۆمونيانىڭ اۋىر تۇرىنە بايلانىستى ەنتىگۋ;

– دەنەگە ءتۇرلى دارەجەدە بورتپەلەر شى­عادى;

–  كونيۋنكتيۆيت, ليمفا تۇيىندەرىنىڭ ۇل­عايۋى, الاقان, اياق ءىسىنۋى مۇمكىن;

– كەۋدەنىڭ ارتقى جاعىندا جۇرەك تۇسى اۋى­رادى, كارديوۆاسكۋليارلىق بەلگىلەر بولادى;

– ءتىل, ەرىن قىزارىپ, القىزىل بولادى.