تۇركىستان قالاسىن دامىتۋ شەڭبەرىندە مەملەكەت مۇقتاجى ءۇشىن جەر تەلىمدەرىن الۋ كەزىندە 33,5 ملن تەڭگە كولەمىندەگى بيۋدجەت قاراجاتىنىڭ جىمقىرىلعانىن تۇركىستان قالاسىنىڭ پروكۋراتۋراسى انىقتادى.
مەملەكەت مۇقتاجى ءۇشىن 6 جەر تەلىمىنىڭ يەلىكتەن شىعارىلعان وتەۋى رەتىندە اتالعان سومانى 2019 جىلى قالا اكىمدىگى جەكەلەگەن تۇلعالارعا تولەگەن. الايدا پروكۋرورلىق تالداۋلار بارىسىندا اتالعان جەر تەلىمدەرىنىڭ ءبىر بولىگىنە مەنشىك قۇقىعى مۇلدەم تىركەلمەگەنى, ال ەكىنشى بولىگى جالعان قۇجاتتاردىڭ نەگىزىندە راسىمدەلگەنى انىقتالدى.
ياعني «جەر كودەكسى» مەن «مەملەكەتتىك م ۇلىك تۋرالى» زاڭ تالاپتارىنا سايكەس (الىنۋعا جاتاتىن جىلجىمايتىن م ۇلىكتى) جەرگىلىكتى اتقارۋ ورگانىنىڭ لاۋازىمدى تۇلعالارى جەر يەلىگىنە قۇقىق كۋالاندىرۋىن بەرەتىن قۇجاتتاردى مۇقيات تەكسەرمەي, جىلجىمايتىن م ۇلىكتەردى تىزىمگە قوسۋ ارقىلى اتالعان جەرلەر ءۇشىن 33,5 ملن تەڭگەگە وتەماقىنى زاڭسىز تولەگەن.
پروكۋراتۋرانىڭ دەن قويۋ اكتىسى نەگىزىندە زاڭسىزدىقتارعا جول بەرگەن قالا اكىمىنىڭ وسى سالاعا جاۋاپتى ورىنباسارى ت.مۇساەۆقا «قىزمەتكە تولىق سايكەس ەمەستىگى تۋرالى ەسكەرتۋ» بەرىلدى. سونىمەن قاتار زاڭسىز قۇقىقتىق كۋالاندىرۋدى بەرەتىن قۇجاتتاردىڭ كۇشىن جويۋعا جانە كەلتىرىلگەن زالالدى وتەۋگە ءتيىستى شارالار قولدانىلۋدا.
بۇدان بولەك, جيناقتالعان قۇجاتتار نەگىزىندە قىلمىستىق كودەكستىڭ 366-بابىنا سايكەس (لاۋازىمدىق وكىلەتتىكتەردى تەرىس پايدالانۋ) تۇركىستان قالاسى اكىمدىگىنىڭ لاۋازىمدى تۇلعالارىنا قاتىستى سوتقا دەيىنگى تەرگەپ-تەكسەرۋ جۇرگىزىلۋدە.