ايماقتا جىل باسىنان بەرى 157 جول-كولىك وقيعاسى تىركەلىپ, ناتيجەسىندە 23 ادام قازا تاۋىپ, 214 ادام ءتۇرلى دارەجەدەگى جاراقات العان. بيىل 7 اي ىشىندە پوليتسيا دەپارتامەنتىنە قاراستى جول-تەحنيكالىق ينسپەكتسياسىنىڭ ماماندارى اۆتوكولىك جولدارىنا مىڭعا جۋىق تەكسەرۋ جۇرگىزىپتى, - دەپ حابارلايدى Egemen.kz.
"تەكسەرۋ شارالارىنىڭ قورىتىندىسى بويىنشا 1014 كەمشىلىك انىقتالىپ, ونى جويۋ تۋرالى ۇيعارىم شىعارىلدى. اۆتوموبيل جولدارىن قاناعاتتانارلىق جاعدايدا ۇستاماعانى جانە جول قوزعالىسى قاۋىپسىزدىگىن قامتاماسىز ەتپەگەنى ءۇشىن 97 لاۋازىمدى تۇلعا جاۋاپقا تارتىلىپ, 2639 100 تەڭگە سوماسىنا ايىپپۇل سالىندى. «قازاۆتوجول» اق قوستاناي وبلىستىق فيليالى, «قازاقاۆتوجول» جشس قوستاناي وبلىستىق فيليالى جانە قوستاناي وبلىسىنىڭ جولاۋشىلار كولىگى جانە اۆتوموبيل جولدارى باسقارماسى وكىلدەرىمەن بىرلەسىپ, وبلىسى اۋماعى ارقىلى وتەتىن اۆتوموبيل جولدارىن كەشەندى تەكسەرۋ جوسپارلانۋدا", - دەدى اكىمشىلىك پوليتسيا باسقارماسىنىڭ باستىعى اندرەي گريگورەۆسكي.