ماڭعىستاۋدا "جول اكتيۆتەرىنىڭ ۇلتتىق ساپا ورتالىعى" رمك فيليال قىزمەتكەرلەرى تۇپقاراعان اۋدانىنىڭ اقشۇقىر اۋىلىندا سالىنىپ جاتقان اسفالت جول قۇرىلىسىنىڭ ساپاسىنا باقىلاۋ جۇرگىزگەن ەدى. اسفالت جابىندىدان سىنامالار الۋ جۇمىستارى "ساپالى جول - ادالدىق الاڭى" باعدارلاماسى اياسىندا جاسالدى. بۇل تۋرالى اتالعان فيليالدىڭ ءباسپاسوز قىزمەتى حابارلادى.
باقىلاۋ شاراسىنا فيليال قىزمەتىنە تاپسىرىس بەرۋشى "تۇپقاراعان اۋداندىق تۇرعىن-ءۇي شارۋاشىلىعى, جولاۋشىلار كولىگى جانە اۆتوموبيل جولدارى" مەملەكەتتىك مەكەمەسىنىڭ باسشىسى ا.جەتكىزگەنوۆ, الگى جولدى سالۋعا جاۋاپتى مەردىگەر سەرىكتەستىك باستىعىنىڭ ورىنباسارى ب.ەلەشوۆ, "ادالدىق الاڭى" جوبالىق كەڭسەسىنىڭ وسى اۋدانداعى ارنايى مونيتورينگتىك توپ وكىلى م.شىراقباي قاتىستى.
باقىلاۋ شاراسى كەزىندە ب.سارسەنوۆ كوشەسىندەگى №31, №61 جانە №73 ۇيلەردىڭ جانىنداعى كولىك جولدارىنان ءۇش سىناما الىندى. شىققان قورىتىندى - جول ماتەريالدارىنىڭ ساپاسى نورماتيۆتىك-تەحنيكالىق قۇجاتتار تالاپتارىنا سايكەس كەلمەيدى.
انىقتالعان كەمشىلىكتەر قر سجقىقا ايماقتىق دەپارتامەنتىنە, تۇپقاراعان اۋداندىق تۇكش بولىمىنە قىزمەتتىك حات تۇرىندە, ال حاتتىڭ كوشىرمەسى "اق جول قۇرىلىس" جشس-گى مەن ارنايى مونيتورينگتىك توپ جەتەكشىسىنە جولداندى.
سونداي-اق فيليالدىڭ جول ينجەنەرلەرىمەن شەتپە اۋىلى "جاڭا ورپا" شاعىن اۋدانىندا سالىنىپ جاتقان جولدىڭ ساپاسى تەكسەرىلدى.
قازىر "جاڭا ورپا" اتتى شاعىن اۋدانداعى اۆتوموبيل جولىنا ورتاشا جوندەۋ جۇمىستارى ءجۇرىپ جاتىر. مەردىگەر مەكەمە - "ابات" جاۋاپكەرشىلىگى شەكتەۋلى سەرىكتەستىگى. ماڭعىستاۋ اۋداندىق تۇكش ءبولىمى ۇلتتىق جول ساپا ورتالىعى فيليالىمەن ارىپتەستىك كەلىسىمشارتتا وتىر.
جولدىڭ ساپاسىن باقىلاۋ شاراسىنا سەرىكتەستىك جانە مەملەكەتتىك مەكەمە وكىلدەرى ا.جۇماليەۆ پەن ب.اباەۆ, "ادالدىق الاڭى" جوبالىق كەڭسەسىنىڭ ارنايى مونيتورينگتىك توپ جەتەكشىسى س.مۇڭالباەۆ قاتىستى.
سونىمەن, "جاڭا ورپا" شاعىن اۋدانى №2 كوشەسى بويىنداعى اسفالت جولدان 6 سىناما الىندى. ونىڭ ەكەۋىنىڭ عانا ساپاسى نورماتيۆتىك-تەحنيكالىق قۇجاتتار تالاپتارىنا سايكەس. قالعانى تورتەۋىنەن بىرقاتار كەمشىلىك انىقتالدى.
باقىلاۋ شاراسىنىڭ قورىتىندىسى قۇزىرلى ورگانعا, الگى جولعا تاپسىرىس بەرۋشى مەملەكەتتىك مەكەمە جانە مەردىگەر مەكەمەگە قىزمەتتىك حات تۇرىندە جولداندى. باقىلاۋ شاراسى ءدال وسى كۇنى "اششىبۇلاق" شاعىن اۋدانىنداعى ە.قوسباەۆ اتىنداعى كوشە جولى مەن №7 ورتا مەكتەپ - "كاسپي تسەمەنت" زاۋىتى ارالىعىنداعى تراسسادا دا جۇرگىزىلدى.
ول جەردەن الىنعان 7 سىناماعا زەرتحانالىق جاعدايدا تالداۋ جاسالدى. ەشقايسى دا نورماتيۆتىك-تەحنيكالىق قۇجاتتار تالاپتارىنا سايكەس كەلمەيدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.