الماتىداعى ورتالىق قالالىق كلينيكالىق اۋرۋحانانىڭ دارىگەرلەرى وكپەسىنىڭ 88 پروتسەنتى زاقىمدانعان سىرقاتتى ەمدەپ جازدى. كوروناۆيرۋس ينفەكتسياسى سالدارىنان 59 جاستاعى ناۋقاس وزدىگىنەن تىنىس الۋ قابىلەتىنەن ايىرىلعان. بۇل تۋرالى «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالى حابارلادى.
الماتىلىق ۆلاديمير شەستاكوۆ قاۋىپتى ۆيرۋسپەن ءبىر ايدان استام ۋاقىت كۇرەستى. ەكى وكپەسى بىردەي قابىنعان پاتسيەنت ەكى اپتاسىن جان ساقتاۋ بولىمىندە وتكىزگەن.
ناۋقاستىڭ قىزى ولگا چيستياكوۆانىڭ سوزىنشە, اكەسى بيىلعى جىلدىڭ 25-ماۋسىمىندا سىرقاتتانعان. باستاپقىدا دارىگەرلەر وتكىر رەسپيراتورلىق ۆيرۋستىق ينفەكتسيا جۇقتىردى دەگەن دياگنوز قويىپتى. بىراق تاعايىندالعان ەمنەنەش ناتيجە بولماعان سوڭ, كومپيۋتەرلىك توموگرافيا جاسالعان. كت ناتيجەسى وكپەنىڭ 88%-دان استامى زاقىمدانعانىن راستاسا, پتسر-تەست سىرقاتتىڭ COVID-19 ۆيرۋسىن جۇقتىرعانىن كورسەتكەن.
«اكەمدى بىردەن ءىىم گوسپيتالىنە جاتقىزدى. بىراق بەتى بەرى قاراي قويماعان سوڭ, ورتالىق قالالىق كلينيكالىق اۋرۋحاناعا اۋىستىرۋ تۋرالى شەشىم قابىلداندى. اۋرۋحانا دارىگەرلەرى اكەمدى ەمدەپ جازامىز دەگەن سوزىندە تۇردى. ول ءوز اياعىمەن اۋرۋحانادان شىقتى. ورتالىق قالالىق كلينيكالىق اۋرۋحانادا التىن قولدى دارىگەرلەر جۇمىس ىستەيدى. سولاردىڭ ءبىلىمى مەن بىلىكتىلىگىنىڭ ارقاسىندا اكەم اۋىر ناۋقاستان قۇلان-تازا ايىقتى», - دەپ جازدى ولگا چيستياكوۆا مەديتسينالىق ساقتاندىرۋ قورىنىڭ Qoldau 24/7 ءموبيلدى قوسىمشاسىندا.
ەمدەۋشى دارىگەر مىڭجان مەڭلىبەكوۆتىڭ ايتۋىنشا, پاتسيەنت وقك اۋرۋحاناعا اۋىر حالدە تۇسكەن.
«كوروناۆيرۋس ينفەكتسياسىن جۇقتىرعان پاتسيەنتتىڭ وكپەسى زاقىمدانىپ, ۆيرۋستى پنەۆمونياعا شالدىعادى. بۇل پاتسيەنتتىڭ وكپەسى وتتەگى اپپاراتىنا قوسقانعا دەيىن 97 پروتسەنتكە دەيىن زاقىمدانىپ ۇلگەردى. بىردەن ءتيىستى ءدارى-دارمەكتەر بەردىك, وتتەگىگە قوسقاننان كەيىن جاعدايى ەداۋىر جاقساردى», - دەيدى م.مەڭلىبەكوۆ.
جىل باسىندا ىسكە قوسىلعان Qoldau 24/7 ءموبيلدى قوسىمشاسى حالىق اراسىندا ۇلكەن سۇرانىسقا يە بولا باستاعان. ازاماتتار Qoldau 24/7 ارقىلى شاعىم عانا ەمەس, ەمدەگەن دارىگەرلەر مەن مەديتسينا مەكەمەسى اتىنا العىستارىن دا جولداي الادى. قاڭتار ايىنان بەرى قوسىمشا ارقىلى 700-گە جۋىق العىس حات كەلىپ تۇسكەن.