تابيعاتتى قورعاۋ – بارشاعا ورتاق مىندەت. ىلە الاتاۋى ۇلتتىق ساياباعىنىڭ جانىنان قۇرىلعان قوعامدىق كەڭەس «ايۋساي ۆيزيت ورتالىعى» جوباسىنىڭ جۇمىسىمەن تانىستى.
الاتاۋ باۋرايىنداعى اسەم الماتى تاعى دا ءبىر تاماشا دەمالىس ورنىمەن تولىعادى. ەكوتۋريزمدى تۇراقتى دامىتۋ جۇمىستارىنىڭ بارىسىن تەكسەرگەن ماماندار كوركىنە كوز تويمايتىن تۇمسا تابيعاتتى دەمالىس ءۇشىن ءتيىمدى پايدالانۋمەن قاتار قورشاعان ورتاعا زالال تيگىزبەۋ جايىن باسا نازارعا الۋىمىز كەرەك دەپ ەسەپتەيدى. ۇلتتىق ساياباق جانىنداعى قوعامدىق كەڭەسكە قۇرامىندا – تۋريستىك ۇيىمدار وكىلدەرى, عالىمدار, سپورتشىلار, كاسىپكەرلەر, ەكوبەلسەندىلەر, قوعام قايراتكەرلەرى بار 19 ادام ەنگەن.
ۇلتتىق ساياباق جانىنداعى قوعامدىق كەڭەس ورتالىقتىڭ قۇراستىرىلۋ ساتىلارىمەن تانىستى. «تۋرانگا گرۋپپ» كومانداسى تاياۋ ارادا «تامىر» تابيعات اياسىندا بولۋ مەكتەبىمەن بىرگە ەكى جاڭا سوقپاقتى قالىپتاستىرۋدى جوسپارلاپ وتىر. «جاس كايىڭ» دەپ اتالعان ءبىرىنشى سوقپاقتا اتا-انالار بالالارىمەن بىرگە, سونداي-اق ەگدە ادامدار جۇرە الادى. ەكىنشى سوقپاق قيمىل-قوزعالىسى شەكتەلگەن جاندار ءۇشىن ارنايى قۇرىلماق. كەلەشەكتە ءجۇرىس مۇمكىندىگى ارتتىرىلعان مۇگەدەك اربالار الۋ دا ويلاستىرىلىپتى.
الماتى ەكولوگيا دەپارتامەنتىنىڭ باسشىسى قونىسبەك بايدينوۆ: «ەكوتۋريزمدى دامىتۋ جوباسى وتە قاجەت. اسىرەسە وسكەلەڭ ۇرپاق ءۇشىن كەرەك. بالالاردى ەكولوگيالىق مادەنيەتكە جاستايىنان باۋلۋ, قورشاعان ورتانىڭ قۇندىلىعىن ۇقتىرۋ اسا ماڭىزدى», دەيدى.
جوبانىڭ باستى ارتىقشىلىقتارىنىڭ ءبىرى تاۋداعى «جابايى» ميگراتسيانى وزگەرتۋ تالپىنىسى ەكەنىن اتاپ وتكەن ءجون. ۇلتتىق ساياباق جانىنداعى قوعامدىق كەڭەس مۇشەسى راسۋل رىسمامبەتوۆ وسىعان قاتىستى قولداۋ پىكىرىن ءبىلدىردى.
– مەن قوعامدىق كەڭەسكە اتالعان جۇيەنىڭ تيىمدىلىگى قىزىقتىرعاسىن, بۇل جوبا كەلەشەكتە قانداي سوماعا جۇزەگە اسىپ, قانداي تابىس اكەلەرىن بىلگىم كەلگەندىكتەن كىردىم. سەبەبى قازاقستاندا ءبىر ەمەس, ون ءۇش ۇلتتىق ساياباق بار. سوندىقتان ەكوبيزنەستىڭ جەكە جوبا ۇلگىسىندە دامۋىن باقىلاۋ قىزىقتى بولماق. ونىڭ ۇستىنە تاۋعا ءجيى كەلەتىن الماتى قالاسىنىڭ تۇرعىنى رەتىندە بۇل جوبا قانداي وزگەرىس اكەلەتىنىن كورگىم كەلەدى, – دەيدى ول.
جوبا اياسىندا 155 شاقىرىم جاياۋ سوقپاق سالۋ مەن اباتتاندىرۋ كوزدەلىپ وتىر. سونداي-اق كەلۋشىلەرگە ۇلتتىق ساياباق تۋرالى اقپارات بەرەتىن 7 ۆيزيت ورتالىق ورناتۋ قاراستىرىلعان. كەلەشەكتە ەتنواۋىل, كەمپينگ, شاتىر لاگەر, 10-15 ورىندىق گلەمپينگ (تاۋ باسپاناسى) جانە ءبىر كاراۆانينگ (اۆتوۇيمەن ساياحات جاسايتىندارعا ارناپ جابدىقتالعان تۇراق ) پايدا بولماق.
الماتى