قر دەنساۋلىق ساقتاۋ ءمينيسترى الەكسەي تسوي رەسەيلىك كوروناۆيرۋسقا قارسى ۆاكتسينانى ساتىپ الۋ جوسپارلارى تۋرالى ايتتى. سونىمەن قاتار قازاقستاندىقتار ۆاكتسينادان زارداپ شەككەن جاعدايدا كىم جاۋاپتى بولاتىنىن ءتۇسىندىردى, دەپ حابارلايدى Egemen.kz.
"حالىق دەنساۋلىعى تۋرالى كودەكسكە سايكەس, بىزدە مىندەتتى جانە ەرىكتى ەكپەلەر بار. ءبىز كوروناۆيرۋسقا قارسى ۆاكتسينانى ەرىكتى ۆاكتسينانىڭ قۇرامىنا قوسۋ ماسەلەسىن قاراستىرامىز. ويتكەنى ۆاكتسينانىڭ ارادان جىلدار وتكەندەگى ناتيجەسى مەن اسەرى قالاي بولاتىنى ءالى تولىق زەرتتەلمەگەن. بىراق بىزدە رۇقساتناما جانە ۆاكتسينالاردى قازاقستاندا پايدالانۋ مۇمكىندىگى بولۋى ءتيىس", - دەدى تسوي.
مينيستر ۆاكتسينانىڭ تەك دەنساۋلىعىنا قاۋىپ ءتونىپ تۇرعان ادامدار ءۇشىن اقىسىز جاسالاتىنىن ايتتى. ياعني, ۆاكتسيناتسيالاۋ ۋاقىتىندا دارىگەرلەر, قارت ادامدار جانە سوزىلمالى اۋرۋلارى بار ناۋقاستارعا عانا تەگىن جاسالادى.
ء"بىز جاقىن ارادا رەسەيلىك ارىپتەستەرىمىزدىڭ كلينيكالىق زەرتتەۋ ناتيجەلەرىن كورۋ, باعالاۋ, بولاشاقتا قازاقستانعا تىركەۋ جانە جەتكىزۋ مۇمكىندىگى تۋرالى كەلىسۋ ءۇشىن رەسەيگە ۇشامىز. ياعني, بۇل ۇلگىلەردى الۋ ءۇشىن, ءبىز وزىمىزدە تەكسەرىپ كورەمىز. ەگەر ءبارى جاقسى بولسا, ونى قولدانا الامىز", - دەدى تسوي.
ەڭ ماڭىزدى ماسەلە - ۆاكتسينانىڭ ساپاسى مەن قاۋىپسىزدىگى ءۇشىن كىم جاۋاپتى بولادى؟ الەكتسەي تسوي سۇحباتىندا بۇل تۋرالى دا ايتتى.
"بىزدە ءدارى-دارمەكتەر مەن مەديتسينالىق بۇيىمداردى ساراپتاۋ ۇلتتىق ورتالىعى بار, ول كەز كەلگەن ءونىمنىڭ, ونىڭ ىشىندە ۆاكتسينانىڭ تيىمدىلىگى مەن قاۋىپسىزدىگىن باعالايدى. باعالاۋ حالىقارالىق زاڭناما بويىنشا وتەدى. اقش پەن ەو-مەن بىردەي تالاپتار قويىلادى", - دەدى مينيستر.
الايدا, جاعىمسىز رەاكتسيالار كەز كەلگەن دارىلىك زاتتاردى قولدانعاندا ورىن الۋى مۇمكىن ەكەنىن دە جاسىرمادى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.