وكىنشكە قاراي, الماتى وبلىسى تۇرعىندارىنىڭ اراسىندا قاتەرلى ىسىككە شالدىعۋشىلار قاتارى ازايماي تۇر. ايماقتاعى ونكولوگيالىق احۋالدى ەكى وبلىستىق كوپسالالى ديسپانسەر باقىلايدى. ونىڭ ءبىرى تالدىقورعان قالاسىندا بولسا, ەكىنشىسى الماتى قالاسىندا ورنالاسقان. مەگاپوليستەگى ديسپانسەر نەگىزىنەن وبلىستىڭ وڭتۇستىك ايماعىنداعى اۋدان تۇرعىندارىنا قىزمەت كورسەتەدى.
قازىر الماتى ايماقتىق كوپسالالى كلينيكادا 8976 پاتسيەنت تىركەۋدە تۇر. جالپى, جىل سايىن قاتەرلى ىسىككە شالدىققان 2 مىڭعا جۋىق ادام ەسەپكە الىنادى. ال بيىلعى 6 ايدا ديسپانسەرلىك 879 ادام تەكسەرىلىپ, 709 تۇرعىننان دەرتتىڭ العاشقى بەلگىلەرى انىقتالعان.
– جالپى ونكولوگيالىق اۋرۋعا شالدىققان ناۋقاستاردىڭ كوروناۆيرۋس ينفەكتسياسىن جۇقتىرۋ قاۋپى جوعارى. سوندىقتان قاۋىپسىزدىك شارالارىن تولىق ساقتاي وتىرىپ, پاتسيەنتتەردى امبۋلاتوريالىق جانە جوسپارلى تۇردە قابىلداۋدى توقتاتقان جوقپىز. الايدا جاڭا تارتىپپەن جۇمىس ىستەۋگە تۋرا كەلدى. ويتكەنى پاتسيەنتكە ەمدى ۇزدىكسىز جۇرگىزۋ قاجەت. ءتىپتى بلوك-بەكەتتەر ورناتىلعان كەزدە اۋدان ورتالىعى مەن اۋىلداردا تۇراتىن پاتسيەنتتەردى كلينيكاعا ارنايى جەدەل جاردەم بريگادالارى تاسىمالدادى. سونىڭ ناتيجەسىندە كارانتين ۋاقىتىندا 2593 ادام تولىققاندى ەم قابىلدادى, – دەيدى كلينيكانىڭ باس ديرەكتورى ساياحات ولجاەۆ.
وسى ايماقتىق كوپسالالى كلينيكانىڭ ماماندارى پاندەميا كەزىندە دە ناۋقاستارعا امبۋلاتولىق قابىلداۋ جۇرگىزىپ, دياگنوستيكالىق زەرتتەۋ جاساۋدى توقتاتقان جوق. سونىمەن قاتار, اۋدانداردا پاللياتيۆتىك جانە مەيىربيكەلىك كومەكتىڭ قولجەتىمدىلىگىن ارتتىرۋ ءۇشىن ءموبيلدى بريگادالار ۇيىمداستىرىلعان. ءموبيلدى بريگادانىڭ قىزمەتكەرلەرى كارانتين كەزىندە 4704 ناۋقاسقا كومەك كورسەتكەن ەكەن. ايتپاقشى, وبلىستا 165 جەدەل جاردەم بريگاداسى جۇمىس ىستەيدى. التى اي ارالىعىندا ءموبيلدى توپ 300 مىڭنان استام شاقىرۋعا قىزمەت كورسەتكەن. ياعني 2019 جىلدىڭ سايكەس مەرزىمىمەن سالىستىرعاندا شاقىرۋلار سانى 2 ەسەگە وسكەن. وبلىس اكىمدىگى تاراپىنان جەدەل جاردەم قىزمەتكەرلەرىنىڭ جۇكتەمەسىن جەڭىلدەتۋ كولىك سانىن كوبەيتۋ ءۇشىن قوسىمشا قارجى ءبولىنىپ وتىر. وسى ماقساتتا جىل سوڭىنا دەيىن قوسىمشا 100 جەدەل جاردەم كولىگى كەلمەك. اتاپ ايتقاندا, 70 كولىك ليزينگىمەن, 30 كولىك جەرگىلىكتى بيۋدجەت قارجىسىنا ساتىپ الىنباق.
اتى جامان اۋرۋدىڭ كۇرت كوبەيۋىن ونكولوگ دارىگەرلەر بىرنەشە فاكتورعا سىلتەيدى. تابيعي پاتالوگيانىڭ اسقىنۋى مەن سىرتقى جاراقات سالدارىنان پايدا بولاتىن وبىر تۇرلەرىن ايتپاعاندا, قازىر راك ىسىگىنىڭ اسقىنۋىنا الەۋمەتتىك جاعداي ءجيى اسەر ەتە باستاپتى. ادامنىڭ جۇيكەسىنە تۇسكەن سالماق پەن سالاماتتى ءومىر سالتىنىڭ ساقتالماۋى دەرتتىڭ پايدا بولۋىنا عانا ەمەس, ەم قونبايتىن دەڭگەيگە دەيىن جەتۋىنە سەبەپشى بولىپ وتىر ەكەن. قالاي بولعاندا دا ونكولوگيالىق اۋرۋعا شالدىققانداردىڭ قاتارى جىل سايىن ازايماي تۇرعانى اقيقات. ويتكەنى دۇنيەجۇزىلىك دەنساۋلىق ساقتاۋ ۇيىمىنىڭ دەرەگى بويىنشا قازىر عالامشاردا قاتەرلى ىسىك اۋرۋىنا شالدىققان 20 ميلليوننان استام ناۋقاس بار. ونىڭ ىشىندە اتى جامان دەرتتىڭ العاشقى بەلگىسى جىل سايىن 30 مىڭ ادامنىڭ بويىنان انىقتالادى. ال قازاقستاندا وبىر دياگنوزىمەن 180 مىڭنان استام تۇرعىن تىركەۋگە الىنعان.
الماتى وبلىسى