نۇر-سۇلتانداعى كوشەلەرگە ارتىلعان شامادان تىس جۇكتەمەنى ازايتۋ ءۇشىن جولايرىقتار, كوپىرلەر مەن وتكەلدەر سالىنىپ جاتىر. بيىل 150 كوشە جوندەلىپ, كەيبىرەۋى جاڭادان سالىنادى. وسى جىلى جوسپارلانعان جول جۇمىستارىنىڭ 70%-ءى ەلدى-مەكەندەردە جۇرگىزىلەدى. جوندەۋ جولدارىنىڭ قۇرىلىسى اكىمدىكتىڭ باقىلاۋىندا. بۇل تۋرالى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ حابارلايدى.
"Nova City اۋماعى, №39 (تاۋەلسىزدىك) كوشەسىنەن №27 كوشەنىڭ ءبىر بولىگىندە جول سالامىز. بۇل كوشە اۋەجايعا مەن "تەلمان" ەلدى-مەكەنىنە قاراستى جولدى جالعاۋعا مۇمكىندىك بەرەدى. ەلدى-مەكەن تۇرعىندارىنىڭ قالاعا جول ءجۇرۋ ۋاقىتى ەداۋىر قىسقارادى. سونىمەن قاتار, ماڭگىلىك ەل جانە ۇلى دالا داڭعىلدارىنداعى جۇكتەمەنى ازايتۋعا مۇمكىندىك بەرەدى. وسى جاڭا كوشەدەن ەسىل وزەنى مەن نۇرا – ەسىل كانالى ارقىلى وتەتىن ەكى كوپىر بولادى, قازىر قۇرىلىس جۇمىستارى ءجۇرىپ جاتىر. كوپىرلەر وڭ جانە سول جاعالاۋدى جالعاپ, قالانىڭ ەكى بولىگىن اينالما ەتۋگە مۇمكىندىك بەرەدى", - دەدى ەلوردا اكىمى التاي كولگىنوۆ.
ەلوردا اكىمى التاي كولگىنوۆ تۇرعىندارمەن كەزدەسۋ, ازاماتتاردى قابىلداۋ جانە ەسەپ بەرۋ كەزدەسۋلەرىندە قالا تۇرعىندارى جولداردى اسفالتتاۋ ماسەلەسىن كوتەرگەنىن اتاپ ءوتتى.
ء"بىز بارلىق ۇسىنىستاردى جيناپ, كەستە قۇردىق, بارلىق قىستا دايىندىق جۇمىستارىن جۇرگىزدىك. بيىل جوندەلىپ جاتقان جولدار بىرنەشە كريتەريلەر بويىنشا تاڭدالدى: بۇرىن اسفالت بولماعان جولداردى تاڭدادىق. مۇنداي جولداردىڭ كوبى ەلدى-مەكەندەردە ورنالاسقان. سونىمەن قاتار, جاڭا اۆتوبۋس باعىتتارىن ىسكە قوسىلاتىن كوشەلەر مەن قوزعالىس قارقىنى جوعارى كوشەلەر قامتىلدى.
ساپاسىز جولداردى قابىلدامايمىز. جول ساپاسىز بولعان جاعدايدا مەردىگەرلەر ءوز ەسەبىنەن جولدى قايتا جاسايتىن بولادى", - دەپ اتاپ ءوتتى ەلوردا اكىمى التاي كولگىنوۆ.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.