ەلىمىزدە بۇگىننەن باستاپ كارانتين جەڭىلدەتىلەدى

2020 جىلعى 17 تامىزدان باستاپ بارلىق وڭىرلەردە جۇمىسىن قايتا باستايتىن كاسىپكەرلىك سۋبەكتىلەرىنىڭ قىزمەت تۇرلەرىنىڭ تىزبەسى بەكىتىلدى.

ولار: سوسو, ساۋدا ۇيلەرى (بۋتيكتەر), ساۋدا جەلىلەرى, جابىق بازارلار (تولىمدىلىعى 30%-دان اسپاۋى ءتيىس, 1 كەلۋشىگە 4 ش. م); سۇلۋلىق سالوندارى, شاشتاراز, سپا ورتالىقتارى, كوسمەتولوگيالىق قىزمەت كورسەتەتىن نىساندار (الدىن الا جازىلۋ بويىنشا 1 كەلۋشىگە 4 ش.م.); باسسەينى جوق فيتنەس ورتالىقتارى (تولىمدىلىعى 50%-دان اسپاۋى ءتيىس, 1 كەلۋشىگە 5 ش.م.), باسسەينى جوق مونشالار مەن ساۋنالار (تولىمدىلىعى 50%-دان اسپاۋى ءتيىس, 1 كەلۋشىگە 4 ش.م.); بالالارعا ارنالعان تۇزەتۋ كابينەتتەرى, بالالار جانە ەرەسەكتەرگە ءبىلىم بەرۋ ورتالىقتارى (توپتاردا — 5 ادامنان ارتىق ەمەس, جازىلۋ بويىنشا); مەكتەپكە دەيىنگى بالالار مەكەمەلەرىنىڭ كەزەكشى توپتارى (15 ادامنان ارتىق ەمەس); اشىق اۋاداعى اتتراكتسيوندار (قاشىقتىقتى ساقتاۋ, ماسكا تاعى, ادامدار اعىنىن رەتتەۋ). جۇمىس بەرۋشىلەرگە قىزمەتكەرلەردىڭ كەمىندە 80% ءۇشىن قاشىقتان جۇمىس ىستەۋ فورماتىن ساقتاۋ ۇسىنىلادى.

ايتا كەتسەك, 13 تامىزدا پرەمەر-ءمينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا قالىپتاسقان ەپيدەميولوگيالىق جاعدايدى ەسكەرە وتىرىپ, كارانتين شارالارىن كەزەڭ-كەزەڭىمەن الىپ تاستاۋ جوسپارى قارالدى. الايدا, 17 تامىزدان باستاپ بىرقاتار نىسانداردىڭ جۇمىسىنا تىيىم ساقتالدى. ەسكە سالساق, قازاقستاندا شىلدە ايىنىڭ ورتاسىندا ەكى اپتاعا سوزىلاتىن كارانتين ەنگىزىلگەن ەدى.

29 شىلدەدە مەملەكەت باسشىسى قاسىم-جومارت توقاەۆ ەپيدەميولوگيالىق احۋالدى تۇراقتاندىرۋ جونىندە كەڭەس وتكىزىپ, كارانتين شارالارىن تاعى ەكى اپتاعا ۇزارتۋدى تاپسىرعان ەدى. قر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن وتكەن ۆەدومستۆوارالىق كوميسسيا پرەزيدەنت تاپسىرمالارىن ەرەكشە باقىلاۋعا الدى.