انشەيىندە بەينەتى مول مال شارۋاشىلىعى نازىك جاندىلار ءۇشىن تىم-تىم اۋىر بولىپ كورىنەتىنى بار. بىراق قولعا السا ەڭسەرىلمەيتىن ءىس جوق ەكەن. كوپبالالى انا الميرا «باستاۋ بيزنەس» باعدارلاماسىنىڭ شاراپاتىمەن قوراسىن مالعا تولتىرىپ وتىر.
ادال ەڭبەگىمەن ءوز ءتولىنىڭ ەسەبىنەن كوبەيتكەن مالى ءبىر باسىنا جەتىپ-اق جاتىر. قازىر ءسۇتى بۇلاقتاي ءۇش سيىرى, ەلۋدەن استام قويى, جۇزگە جۋىق قازى بار. وسىنىڭ بارلىعى شيەتتەي بالالارىنىڭ نەسىبەسى. ولار دا انالارىنىڭ بار جان-ءتانىن سالىپ, وتباسىنىڭ ىرىزدىعىن مولايتۋعا ۇمتىلىپ جۇرگەنىن كورگەن سوڭ ويىن بالاسى ەكەندىكتەرىن ۇمىتىپ, ورتاق ءىستى العا سۇيرەۋگە كومەكتەسەدى. بەس پەرزەنتى دە مال جايعاپ, قورا تازالاپ, كومەكشى بولۋعا جاراپ قالدى. انا بولسا كىشكەنتايلارىنىڭ ەڭبەكپەن ءپىسىپ, جۇمىس ىستەۋگە جاندارىن سالاتىنىن كورگەن سايىن سۇيسىنەدى. اتام قازاقتا, «جاس وسپەي مە, جارلى بايىماي ما» دەيتۇعىن ءۇمىت وتىن تۇتاتاتىن قاستەرلى ءسوز بار. ءۇي شارۋاسىنا وڭقاي اسىقتاي ىڭعايلى بولىپ ءوسىپ كەلە جاتقان باۋىر ەتى بالالارى ەرتەڭ-اق قاتارعا قوسىلىپ كەتەتىنىنە سەنەدى.
ءبىر جاعىنان بالالارىنىڭ ۇيىمشىلدىعىنا رازى بولسا, ەكىنشى جاعىنان مەملەكەت تاراپىنان كورسەتىلگەن كومەك تە كوپبالالى انانى قوس قولتىعىنان پەرىشتەدەي جەبەپ, قيىندىق اتاۋلىنى ەڭسەرۋگە سەپتىگىن تيگىزۋدە. وتكەن جىلى «باستاۋ بيزنەس» باعدارلاماسى بويىنشا قىسقا مەرزىمدى كۋرستى وقىپ بىتىرگەننەن كەيىن گرانتقا يە بولدى. ويعا كەلمەگەن ولجا ەدى. قىسقا ءجىپ كۇرمەۋگە كەلمەي تۇرعان شاقتا ويدا جوقتا ورالا كەتكەن نەسىبە ەدى. اۋەلى وتىز قوي ساتىپ الدى. ءىرى قارا مەن جىلقىدان گورى ۇساق مالدى باعۋ وڭايىراق كورىنگەن.
كەيىن وڭ-سولىن باعامداپ وتىرسا, كۇش-قۋاتى جەتىپ جاتسا, سيىر ۇستاعان دا ءتيىمدى ءتارىزدى. بالا-شاعا اعارعان ىشسە, نەسى جامان؟ وسى ويمەن ءۇش سيىر الدى. مال تولدەپ, باسى كوبەيە باستادى. بىرتە-بىرتە قارا جۇمىسقا توسەلە باستاعان شارۋاقور انا ەندى رەتى كەلىپ جاتسا كوبىرەك نەسيە الىپ, ساۋىن سيىردىڭ باسىن كوبەيتپەك. ويتكەنى كورشى-قولاڭنان ىدىسىن ۇستاپ كەلىپ, ءسۇت سۇراۋشىلار كوبەيگەن. اۋىلدا دا تازا, مايلى, ءدامدى ءسۇت سۇرانىسقا يە ەكەن. ۇيدەگى وي جۇزەگە اسىپ, ساۋىن سيىرىن كوبەيتە السا, شاراپاتى وزىنە عانا ەمەس, وزگەگە دە تيمەك. اۋىلداستارى ءۇشىن قوسىمشا جۇمىس ورنى اشىلماي ما؟
ەل ىشىندە مال ۇستاۋ ءۇشىن ەڭ الدىمەن مال ازىعىن ۋاقتىلى قامداپ الۋ وتە ماڭىزدى شارۋا. بالكىم, ەڭ قيىنى دا وسى. ءبىر تىركەمە ءشوپتىڭ باعاسى 25-30 مىڭ تەڭگەنىڭ توڭىرەگىندە. ءبىر باس قارا مالعا قىسى ۇزاق بۇل وڭىردە كەمىندە ەكى تىركەمە ءشوپ قاجەت. جالعىز ءشوپ جۇعىم بولمايدى, جەمدەمەسە ءتول دە, ءسۇت تە بولماۋى ابدەن مۇمكىن. وسى ماسەلەنى وڭىنان شەشسە, وزگەسى جول-جونەكەي جۇگىن تىكتەي بەرمەك. ايتەۋىر قول قۋسىرىپ قاراپ وتىرعاننان جاقسى. ءبىر ءوسىپ السا ءتورت ت ۇلىك بار شىعىندى تولىمەن-اق اقتاپ شىقپاي ما؟ ال ءسۇت-قايماعى كۇندەلىكتى قاجەتىنە جاراتاتىن قاراجات.
– «باستاۋ بيزنەس» باعدارلاماسىنىڭ ەكىنشى باعىتى بويىنشا وقۋعا ەلۋ ادام جىبەرىلدى. ولاردىڭ 27-ءى سەرتيفيكاتتارىن الدى. نەسيە الۋ ءۇشىن «قارجىلىق قولداۋ» قورىنا 27 ادام جىبەرىپ ەدىك, بۇگىن سونىڭ 23-ءى 87 ملن 400 مىڭ تەڭگە كولەمىندە نەسيە راسىمدەدى, – دەيدى اۋداندىق جۇمىسپەن قامتۋ ورتالىعىنىڭ مامانى رۇستەم قويشىعۇلوۆ.
اۋداندا تامىز ايىنان قازان ايىنا دەيىن 505 مىڭ تەڭگە كولەمىندە قايتارىمسىز مەملەكەتتىك گرانتتار بەرىلگەن ەكەن. «ەڭبەك» باعدارلاماسىنىڭ ەكىنشى باعىتى بويىنشا اۋدانداعى ەلدى مەكەندەردىڭ 80 پايىزى قامتىلعان. كوڭىلگە دەمەۋى, العا ۇمتىلعان اۋىل تۇرعىندارى مال شارۋاشىلىعىن دامىتۋ ءۇشىن شاعىن نەسيەلەر الا باستاپتى. سونىڭ ارقاسىندا بوساعالارىنا ۇيىرىلەتىن بەرەكەنى مولايتا تۇسپەك.
اقمولا وبلىسى,
جاقسى اۋدانى