«بارسەلونا» – «باۆاريا» ماتچى ليونەل مەسسي مەن روبەرت لەۆاندوۆسكيدىڭ «التىن دوپقا» كىمنىڭ لايىق ەكەنىن كورسەتىپ بەرگەندەي. ارينە, فۋتبول تاريحىندا ارگەنتينالىق فۋتبولشىنىڭ ەسىمى, اتاق-داڭقى تانىمال. بىراق ليسسابوندا لەۆاندوۆسكي جانە ونىڭ كومانداسى قاي كەزدەدە مىقتى ەكەنىن دالەلدەي الدى.
ويىندى سۋرەتتەپ قايتەمىز, بارلىعىڭىز كورگەن شىعارسىزدار. بىراق, قارسىلاسىنان ءار تايمدا 4 گول جىبەرىپ الاتىن «بارسەلونانى» بۇرىن سوڭدى كورمەپپىن. ءسوز جوق مەسسي – فەنومەن! وسىنداي مىقتى ويىنشىسى بار كوماندانى جولدان تايدىرعان جانە 8:2 ەسەبىمەن ويسىراتا جەڭگەن «باۆاريادا» «ۇيات», «اياۋشىلىق» جوق دەۋشىلەر دە تابىلار. الايدا, بۇل – فۋتبول. فۋتبولدا اياۋشىلىق دەگەن بولمايدى.
وسىنداي كورىنىستى «نەمىس ماشينالارىنىڭ» قاتىسۋىمەن بۇرىن ءبىر جەردە كورگەن سياقتىمىن. سويتسەم, كەيىننەن ەسىمە ءتۇستى. 2014 جىلى وتكەن الەم چەمپيوناتى كەزىندە برازيليا ۇلتتىق قۇراماسىن 7:1 ەسەبىمەن تاس-تالقان ەتكەن نەمىستەردىڭ ۇلتتىق قۇراماسى كەيىننەن مۋنديال كۋبوگىن باسىنا كوتەردى. ءبىر قىزىعى, سول ماتچتا ەسەپتى ءبىرىنشى بولىپ نەمىستەر ساپىندا توماس ميۋللەر اشىپ, كومانداسىن جەڭىسكە جەتەلەگەن ەدى. بۇگىندە ويىننىڭ 4 مينۋتىندا ەسەپتى ءبىرىنشى بولىپ سول باياعى ميۋللەر اشىپ وتىر.
ويىن ستاتيستيكاسى:
«بارسەلونا» – «باۆاريا» 2:8
الابا 7 ء(وز قاقپاسىنا), سۋارەس 57 – ميۋللەر 4, 31, پەريشيچ 21, گنابري 27, كيمميح 63, لەۆاندوۆسكي 82, كوۋتينو 85, 89.
دوپتى يەلىك ەتۋ – 49% – 51%; سوققى – 8:26; ءدال سوققى – 5:26; بۇرىشتاما – 6:9; وفسايد – 4:2; سارى قاعاز – 3:3; ويىنشى الماستىرۋ – 2:5.
«بارسەلونا»: قاقپاشى – تەر شتەگەن; قورعاۋشىلار – البا, لەنگلە, پيكە, سەمەدۋ; جارتىلاي قورعاۋشىلار – دە يونگ, بۋسكەتس (فاتي), روبەرتو (گريزمانن); شابۋىلشى – ۆيدال, سۋارەس, مەسسي.
«باۆاريا»: قاقپاشى – نويەر; قورعاۋشىلار – كيمميح, بواتەنگ (زيۋلە), الابا, دەۆيس (ەرناندەس); جارتىلاي قورعاۋشىلار – گورەتتسكا (توليسسو), الكانتارا, گنابري (كوۋتينو), پەريشيچ (كومان); شابۋىلشىلار – ميۋللەر, لەۆاندوۆسكي.