جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ زالىندا سەنات دەپۋتاتىن سايلاۋ وتكىزىلدى, دەپ حابارلايدى Egemen.kz قازاقپاراتقا سىلتەمە جاساپ.
تاڭداۋشىلار مەن وبلىستىق اۋماقتىق سايلاۋ كوميسسياسىنىڭ بىرلەسكەن وتىرىسىنا وڭىردەگى 191 دەپۋتاتتىڭ 183-ءى قاتىستى.
وبلىستىق سايلاۋ كوميسسياسىنىڭ توراعاسى عايسا قاپاقوۆتىڭ ءمالىم ەتكەنىندەي, "ورال گۋمانيتارلىق كوللەدجى" مم-نىڭ قارجى ديرەكتورى لياززات رىسبەكوۆاعا 128 دەپۋتات (70 پايىزى) داۋىس بەردى.
"باتىس سۋ ارناسى" جشس ديرەكتورىنىڭ ورىنباسارى اقىلبەك امانعاليەۆ 30 داۋىس (16,4 پايىز), وبلىستىق بالالار-جاسوسپىرىمدەر ءتۋريزمى جانە ەكولوگيا ورتالىعىنىڭ ديرەكتورى عالىم بەكقاليەۆ 24 داۋىس (13,3 پايىز) جينادى.