"مارقاكول" قورىعىنداعى مايقان بالىعىنا (ۋسكۋچ, حاريۋس) سۋ قۇزعىندارى قاۋىپ ءتوندىرىپ تۇر. قر ەكولوگيا, گەولوگيا جانە تابيعي رەسۋرستار مينيسترلىگىنىڭ شقو بويىنشا ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى قىزمەتكەرلەرىنىڭ ايتۋىنشا, وسىدان 2-3 جىل بۇرىن قورىق اۋماعىندا سۋ قۇزعىندارىنىڭ سانى 5-6 مىڭعا دەيىن جەتكەن, - دەپ حابارلايدى Egemen.kz.
مامانداردىڭ زەرتتەۋىنشە, ءبىر سۋ قۇزعىنى كۇنىنە 700-800 گرامم مايقان بالىعىنىڭ شاباقتارىن جەپ قويادى. مارقاكول ءوڭىرىنىڭ ماقتانىشىنا اينالعان - مايقان بالىعىنىڭ ءوسىپ, كوبەيۋىنە ايتارلىقتاي زالال كەلتىرىپ وتىر. قورىق قىزمەتكەرلەرى بالىقتاردىڭ ۋىلدىرىق شاشۋ ماۋسىمىندا سۋ قۇزعىندارىنىڭ سانىن ازايتۋ ءۇشىن پروفيلاكتيكالىق جۇمىستار جۇرگىزگەن. ماسەلەن, سۋ قۇزعىندارىنىڭ سانىن ازايتۋ ءۇشىن ولاردى ۇياسىنا قوندىرماي, شۋلى داۋىس شىعاراتىن زاتتارمەن ۇركىتۋ جۇمىستارى جۇرگىزىلگەن. مۇنداي ادىستەر ۇياداعى جۇمىرتقالاردىڭ تەز سۋىپ, بالاپان بولىپ شىقپاي قالۋىنا سەبەپ بولادى. سونداي-اق, ورمان ينسپەكتورلارى سۋ قۇزعىنىنىڭ جۇمىرتقالارىن تەسۋمەن دە اينالىسۋدا.
"مارقاكول" تابيعي قورىعىنىڭ ديرەكتورى تيمۋر ايكەنوۆتىڭ ايتۋىنشا, ەڭ ءبىرىنشى كەزەكتە تابيعاتقا ونىڭ ىشىندە ەرەكشە قورعالاتىن مايقان بالىعىنىڭ كوبەيۋىنە زالالى تيمەۋى ءۇشىن سۋ قۇزعىندارىن سانى رەتتەلەتىن جان-جانۋارلار ساناتىنا جاتقىزۋ كەرەك.
"تابيعي زاڭدىلىقتار بويىنشا سۋ قۇزعىنى ۇياداعى جۇمىرتقاسىنان بالاپان شىقپاسا, ول جەردەن اۋىپ كەتەدى. قازىر اتقارىلعان شارالاردىڭ ناتيجەسىندە مارقاكول تابيعي قورىعىنداعى سۋ قۇزعىندارىنىڭ سانى ايتارلىقتاي ازايدى. شامامەن 500-600 باس سۋ قۇزعىنى بار. مامانداردىڭ سوزىنشە, سۋ قۇزعىندارىنىڭ قاپتاپ كەتۋىنە ءبىرىنشى كەزەكتە اڭشىلارعا سۋ قۇزعىندارىن اتۋعا رۇقساتتىڭ جوقتىعى سەبەپ بولىپ وتىر. سوندىقتان, ول سانى رەتتەلەتىن قۇستاردىڭ ساناتىنا جاتقىزىلۋى كەرەك. تەك سوندا عانا اڭشىلار ولاردىڭ ارتىق سانىن اتىپ, پوپۋلياتسياسىن رەتتەپ وتىرادى",- دەدى تيمۋر ايكەنوۆ.
قورىق باسشىلارىنىڭ سوزىنشە, بيىلعى بالىقتاردىڭ ۋىلدىرىق شاشۋ ماۋسىمى ءساتتى وتكەن. ۋىلدىرىق شاشۋماۋسىمى كەزىندە زاڭسىز بالىق اۋلاۋ دەرەگى كوپ تىركەلمەپتى. ناقتىسىن ايتقاندا, بيىلعى جىلدىڭ 01.05-01.07 ارالىعىندا نەگىزگى ۋىلدىرىق شاشاتىن وزەندەردە تاۋلىك بويى جۇمىس ىستەيتىن 12 بەكەت قويىلدى.