"بالالار ەۆروۆيدەنيەسى" بايقاۋىنىڭ ۇلتتىق ىرىكتەۋىنە ءوتىنىم قابىلداۋ باستالدى

اتالمىش بايقاۋعا قازاقستاننىڭ وسىمەن ءۇشىنشى مارتە قاتىسۋى  - «حابار»  اگەنتتىگىنىڭ 2016 جىلدان  بەرى  ەۋروپالىق حابار تاراتۋ وداعىنىڭ (ەۆU) قاۋىمداسقان مۇشەسى اتانۋىنىڭ ارقاسىندا مۇمكىن بولىپ وتىر. بيىل اتالمىش بايقاۋدىڭ وتۋىنە ەلىمىزدىڭ مادەنيەت جانە سپورت مينيسترلىگى قولداۋ بىلدىرۋدە.

بايقاۋعا 9 جاستان 14 جاسقا دەيىنگى ورىنداۋشىلار  قاتىسا الادى (فينال ۋاقىتى كەزىندە -  ياعني, 2020 جىلدىڭ 29 قاراشاسىندا ۇمىتكەردىڭ جاسى وسى كورسەتكىشتەن اسىپ كەتپەۋى كەرەك ).

 ۇلتتىق ىرىكتەۋ 4 كەزەڭنەن  تۇرادى.         

ءبىرىنشى كەزەڭ – وتىنىمدەردى قابىلداۋ. قاتىسۋشىلارعا ساۋالنامانى تولتىرىپ, ءوزى ورىنداعان ءاننىڭ بەينەجازباسىن ۇلتتىق ىرىكتەۋدىڭ  رەسمي سايتىنا  jevision.khabar.kz جۇكتەۋى كەرەك. وتىنىمدەر 20 تامىزعا دەيىن قابىلدانادى.

ەكىنشى كەزەڭ – بۇل  حالىقارالىق ءان بايقاۋلارىنىڭ جەڭىمپازدارى مەن تانىمال ورىنداۋشىلاردان  قۇرالعان ءادىل-قازى القالارىنىڭ شەشىمىمەن  ەڭ مىقتى دەگەن 30 قاتىسۋشىنى  ىرىكتەۋ كەزەڭى.

ءۇشىنشى كەزەڭ - jevision.khabar.kz سايتىنداعى ونلاين داۋىس بەرۋ ساتىسى. بۇل كەزەڭدە قازاقستاندىقتاردىڭ ارقايسىسى وزىنە ۇناعان قاتىسۋشىعا داۋىستارىن بەرە الادى. ونلاين داۋىس بەرۋ ناتيجەسى بويىنشا ۇلتتىق ىرىكتەۋدىڭ 12 ءفيناليسى انىقتالاتىن بولادى. 

ءتورتىنشى كەزەڭ – ۇلتتىق ىرىكتەۋدىڭ فينالى, بۇل كەزەڭدە  ەلىمىزدىڭ ەڭ تانىمال دەگەن كومپوزيتورلارىنىڭ قاتىسۋشىلارعا ارناپ جازعان ارنايى ءانىن ورىنداۋ ارقىلى, 12 فيناليست ءاندى شەبەر ورىنداۋ جاعىنان جارىسقا تۇسەدى. ءادىل-قازىلار القاسىنىڭ بەرگەن باعاسى مەن SMS داۋىس بەرۋ ناتيجەسىندە جەڭىمپاز  انىقتالاتىن بولادى. ەڭ كوپ ۇپاي جيناعان فيناليست ۆارشاۆادا وتەتىن "Junior Eurovision Song Contest"  حالىقارالىق ءان بايقاۋىندا قازاقستان اتىنان سايىسقا شىعاتىن بولادى.

ەستەرىڭىزگە سالا كەتەيىك, قازاقستان "بالالار ەۆروۆيدەنيەسى" بايقاۋىنا ءۇشىنشى رەت قاتىسۋدا. 2018 جىلى بايقاۋعا دانەليا تولەشوۆا "وزىڭە سەن" انىمەن قاتىسىپ, التىنشى ورىنعا يە بولدى. بىلتىرعى  جىلى ەرجان ماكسيم "ارمانىڭنان قالما" انىمەن ەكىنشى ورىن الدى (قازىلار القاسىنىڭ شەشىمى بويىنشا  ءبىرىنشى ورىن).