قر پارلامەنتى ءماجىلىسىنىڭ دەپۋتاتى, الەۋمەتتىك-مادەني دامۋ كوميتەتىنىڭ مۇشەسى ناتاليا جۇمادىلداەۆا قىزىلوردا قالاسىنداعى جالپى ءبىلىم بەرۋ مەكەمەلەرىنىڭ جوندەۋ جۇمىستارى جانە وقۋ جىلىنا دايىندىق بارىسىمەن تانىستى.
ءبىلىم وردالارى "جۇمىسپەن قامتۋ – 2020" باعدارلاماسى اياسىندا جوندەۋدەن وتكىزىلۋدە. باعدارلاما اياسىندا قىزىلوردا قالاسىندا 4 مەكتەپ, 2 بالاباقشا جوندەلۋدە. ودان بولەك, "اۋىل ەل بەسىگى" باعدارلاماسى اياسىندا ن. ماحامبەتوۆ اۋىلىنداعى №143 مەكتەپ, حالىقارالىق گرانتتار نەگىزىندە قالا ورتالىعىنداعى №1مەكتەپ-گيمنازيا, №4 ءىت مەكتەپ-ليتسەي جانە №176 ورتا مەكتەپتە جوندەۋ جۇمىستارى جۇرگىزىلۋدە.
ەڭ الدىمەن دەپۋتات قالا ورتالىعىنداعى ج. قيزاتوۆ اتىنداعى №23 مەكتەپ-ليتسەيىنىڭ جوندەۋ جۇمىستارىمەن تانىستى. ج. ماحانبەتوۆ اتىنداعى №43, ن. احمادەەۆا اتىنداعى №112, ءا. مولداعۇلوۆا اتىنداعى №173 ورتا مەكتەپتەردەگى جوندەۋ جۇمىستارىن دا كوردى.
ن. جۇمادىلداەۆا مەكتەپتەردىڭ جاڭا وقۋ جىلىنا دايىندىعىن باقىلاپ, كەزەكشى سىنىپتاردى ەنگىزۋ, مەكتەپتە كارانتيندىك تالاپتاردى ساقتاۋ بويىنشا ۇسىنىستار ايتتى. مەكتەپ ديرەكتورلارىنىڭ وقۋلىقتار جانە ءبىلىم بەرۋدىڭ ونلاين فورماتىنا اۋىسۋ ماسەلەسى تۋرالى پىكىرلەرىن تىڭداپ, شەشۋ جولدارىن تالقىلادى.