شۆەيتساريانىڭ نون قالاسىندا فۋتبولدان ۋەفا چەمپيوندار ليگاسىنىڭ 2020/21 جىلعى ماۋسىمنىڭ جەرەبەسى تارتىلىپ, قاي كوماندالاردىڭ ءوزارا كۇش سىناساتىنى انىقتالدى, - دەپ حابارلايدى Egemen.kz.
اتالعان جارىستىڭ ءبىرىنشى ىرىكتەۋ كەزەڭىندە نۇر-سۇلتاننىڭ "استاناسى" بەلارۋستىڭ "دينامو-برەست" كلۋبىمەن شەبەرلىك بايقاسادى. بۇل كوماندانىڭ ىرگەتاسى وسىدان ءدال 60 جىل بۇرىن قالاندى. كسرو داۋىرىندە ولار تومەنگى ليگالاردا ويناسا, كەيىننەن ءبىرشاما ءتاۋىر ناتيجەگە قول جەتكىزە باستادى.
اتاپ ايتساق, 1992 جىلى بەلارۋس چەمپيوناتىندا قولا مەدالدى قورجىنعا سالسا, بىلتىر باس جۇلدەنى ولجالادى. ءۇش مارتە ەل كۋبوگىن يەلەندى. سۋپەركۋبوك جولىنداعى جارىستىڭ سوڭعى ءۇش ماۋسىمىندا قارسىلاس شاق كەلتىرگەن جوق. ءبىر رەت ۋەفا كۋبوگى جانە ەكى مارتە ەۋروپا ليگاسىندا باق سىنادى. بىراق حالىقارالىق دودالاردا "دينامو-برەستىڭ" جولى بولماي, ولار ىرىكتەۋ كەزەڭدەرىندە ىركىلدى.
قوس كوماندا 18 نەمەسە 19 تامىزدا كەزدەسەدى. ەكەۋارا ءبىر عانا ماتچ وتكىزەدى. وسى كەزدەسۋدە جەڭگەن ۇجىم كەلەسى كەزەڭگە جولداما السا, جەڭىلگەنى ەۋروپا ليگاسىندا وينايدى.