مەملەكەت باسشىسى قاسىم-جومارت توقاەۆ «ەگەمەن قازاقستان» گازەتىندە جارىق كورگەن «اباي – رۋحاني رەفورماتور» اتتى ماقالاسىندا ەلىمىزدە ابايتانۋمەن اينالىساتىن بىرنەشە عىلىمي-زەرتتەۋ ورتالىعىنىڭ جۇمىسىن جۇيەلەپ, ەلوردامىزداعى اباي اكادەمياسىنىڭ توڭىرەگىنە توپتاستىرۋ كەرەك ەكەنىن ايتتى.
«اكادەميا بارلىق زەرتتەۋ مەكەمەلەرىنىڭ جۇمىسىن عىلىمي تۇرعىدان ۇيلەستىرۋشى مىندەتىن اتقارا الادى. الداعى ۋاقىتتا گۋمانيتارلىق پاندەردىڭ بولىنبەس بولشەگى رەتىندە «ابايتانۋ» كۋرسىن وقىتۋ ماسەلەسىن قولعا الۋ كەرەك. جاڭا فيلوسوفيالىق جانە ساياسي ۇستانىم تۇرعىسىنان «ابايتانۋ» وقۋلىعى مەن حرەستوماتياسىن ازىرلەۋ قاجەت. سونداي-اق ابايدىڭ «تولىق ادام» ءىلىمى جان-جاقتى ءارى تەرەڭ زەرتتەلۋگە ءتيىس», - دەدى پرەزيدەنت.
قاسىم-جومارت كەمەل ۇلى ابايدى ءحىح عاسىردا ءومىر ءسۇرىپ, ءححى عاسىردىڭ ءسوزىن سويلەگەن دانىشپان رەتىندە الەمگە تانىتۋىمىز كەرەكتىگىن دە باسا ايتتى.
«سونىمەن قاتار ونى ۇلتتىق سانانى جاڭعىرتۋعا زور ىقپال ەتكەن رۋحاني رەفورماتور رەتىندە دارىپتەۋگە مىندەتتىمىز. تۇپتەپ كەلگەندە, ءاربىر قازاق ابايمەن ماقتانۋعا ءتيىس!», - دەگەن مەملەكەت باسشىسى قازاق حالقىن ۇلى اقىننىڭ تورقالى تويىمەن قۇتتىقتادى.