قاسىم-جومارت توقاەۆ «ەگەمەن قازاقستان» گازەتىندە جارىق كورگەن «اباي – رۋحاني رەفورماتور» اتتى ماقالاسىندا ۇلى اقىننىڭ مۇراسى مەن ونەگەسىنە قاتىستى پىكىر ءبىلدىردى.
« ۇلى دانىشپان ەلدىك مۇددەنى ءاردايىم جوعارى قويۋعا, العان ءبىلىم مەن تاجىريبەنى حالىق يگىلىگىنە جۇمساۋعا شاقىردى. بۇكىل ادامزات ءۇشىن دامۋ ءۇردىسىن وسىنداي ۇستانىم ارقىلى ۇعىنۋ ءاردايىم ماڭىزدى بولماق. اباي – ءبىزدىڭ ۇلتىمىز بەن جۇرتىمىزدى تانۋدىڭ توتە جولى. ۇلى اقىن بىزگە مازمۇندىق تۇرعىدان ولشەۋسىز, حالىقتىڭ رۋحاني ازىعىنا اينالعان مۇرا قالدىردى. ءححى عاسىرعا قادام باسساق تا, ابايدىڭ كوزقاراسى زاماناۋي ىزگىلىك قاعيداتتارىنا جانە قازاقستان قوعامىنىڭ باستى قۇندىلىقتارىنا, ونىڭ بىرلىگى مەن بەرەكەسىنە تولىقتاي ساي كەلەتىندىگىنە تاعى دا ءبىر مارتە كوز جەتكىزەمىز», - دەدى پرەزيدەنت.
سونداي-اق, مەملەكەت باسشىسى ۇلى كەمەڭگەر ۇلتتىڭ رۋحاني مادەني, ادامي بەت-بەينەسىن اسقان كورەگەندىكپەن سيپاتتاعان. ونىڭ ۇلىلىعى دا وسىندا ەكەنىن اتاپ ءوتتى.
«ابايدىڭ دانالىق سوزدەرى قازاق حالقىنىڭ التىن تۇعىرى, ءتۇپ نەگىزىمىزگە ءۇڭىلىپ, ۇلتتىق ۇستىنىمىزدى ىزدەگەن كوپتەگەن ۇرپاقتىڭ باسىن بىرىكتىرەتىن ماڭگىلىك رۋحاني تىرەك بولىپ قالا بەرمەك. ەلباسى نۇرسۇلتان نازارباەۆ «اباي ءسوزى – قازاقتىڭ بويتۇمارى» دەگەن بولاتىن. بۇل تۇجىرىم ءبىزدى اقىن الەمىنە تەرەڭ بويلاۋعا, جاڭاشا ويلاۋعا مىندەتتەيدى», - دەيدى ول.