تاسقىن سۋدان زارداپ شەككەن تۇركىستان وبلىسىنىڭ ماقتاارال جانە جەتىساي اۋداندارىندا 3,4 مىڭ گا جەر قايتا وڭدەلىپ, اۋىل شارۋاشىلىعى داقىلدارى ەگىلدى. اتاپ وتەر بولساق ماقتا, باقشا ونىمدەرى مەن جۇگەرى, كۇرىش ەگىلىپ, جۇمىستار جالعاسۋدا.
وزبەكستانداعى ساردوبا سۋ قويماسى بوگەتىنىڭ جارىلۋىنان ايماقتا 11 ەلدىمەكەندە 1031 تاۋار ءوندىرۋشىنىڭ 5,9 مىڭ گا ەگىستىك القابى زارداپ شەككەن بولاتىن. اۋىلشارۋاشىلىعى سالاسى ماماندارىنىڭ قاتىسۋىمەن جاسالعان ەسەپكە سايكەس, جالپى شىعىن كولەمى 1,142 ملرد تەڭگەنى قۇرايدى.
كەلتىرىلگەن شىعىن كولەمى «قازاق ماقتا شارۋاشىلىعى عزي» جشس تاراپىنان ۇسىنىلعان تەحنولوگيالىق كارتاسى نەگىزىندە 1 گا ەگىستىڭ شىعىنى مەن وتكەن جىلى الىنعان ءونىمنىڭ 1 كگ-نا ناقتىلانعان ستاتيستيكالىق باعاسى نەگىزىندە ەسەپتەلىپ, وبلىستىق اۋىلشارۋاشىلىعى باسقارماسى تاراپىنان ۇكىمەتتىڭ قاراۋىنا ۇسىنىلعان. توتەنشە جاعدايدىڭ زاردابىن زالالسىنداندىرۋعا وزبەكستان رەسپۋبليكاسىنان 43 اۋىل شارۋاشىلىعى تەحنيكالارى مەن 243,6 توننا تۇقىمدىق شيت جەتكىزىلگەن.
سونىمەن قاتار, شىعىنعا ۇشىراعان تاۋاروندىرۋشىلەرگە 1,2 ملرد.تگ. قارجى وتەماقى تولەندى. اۋماقتا ۆەتەريناريالىق قاۋىپسىزدىك ساقتالا وتىرىپ, اۋىل شارۋاشىلىعى اۋماقتارى تولىعىمەن زالالسىزداندىرىلدى.