فەدەرالدى رەزەرۆ فەدەرالدى قورىنا پايىزدىق مولشەرلەمەنى جىلدىق 0%-دان 0,25% ارالىعىندا ۇستاپ تۇردى, دەپ حابارلادى فەدەرالدى اشىق نارىق كوميتەتى (FOMC) جينالىستان كەيىنگى مالىمدەمەدە. 29 شىلدە FOMC شەشىمى ەكونوميستەر مەن نارىق قاتىسۋشىلارىنىڭ بولجامدارىمەن سايكەس كەلدى», دەپ حابارلايدى Egemen.kz فرج سايتىنداعى اشىق دەرەككوزدەرگە سىلتەمە جاساپ.
ونى كوميتەتتىڭ بارلىق ون مۇشەسى ءبىراۋىزدان قابىلدادى. "كوروناۆيرۋستىڭ ءورشۋى امەريكا قۇراما شتاتتارى مەن بۇكىل الەمدە ۇلكەن ادامي جانە ەكونوميكالىق قيىندىقتار تۋعىزۋدا", دەلىنگەن FOMC حابارلاماسىندا. قۇجاتتا سوڭعى ايلاردا اقش-تاعى ەكونوميكالىق بەلسەندىلىك پەن جۇمىسپەن قامتۋ كۇرت قۇلدىراعاننان كەيىن ازداپ جوعارىلاعانى, بىراق كوروناۆيرۋستىق پاندەمياعا دەيىن تىركەلگەن دەڭگەيدەن تومەن بولىپ قالعانى اتاپ وتىلگەن.
"مۇنايعا سۇرانىستىڭ السىرەۋى جانە ايتارلىقتاي تومەندەۋى تۇتىنۋشىلىق ينفلياتسيانى ۇستاپ تۇر. جالپى العاندا, سوڭعى ايلاردا قارجىلىق جاعداي جاقساردى, بۇل ءىشىنارا فرج-ءنىڭ ەكونوميكانى قولداۋعا جانە امەريكاندىق ءۇي شارۋاشىلىقتارى مەن بيزنەسكە نەسيە بەرۋىنە بايلانىستى", دەلىنگەن قۇجاتتا.
ەكونوميكانىڭ ودان ءارى تراەكتورياسى كوبىنە امەريكا قۇراما شتاتتارىنداعى ەپيدەميولوگيالىق جاعدايدىڭ دامۋىنا بايلانىستى بولادى دەپ حابارلايدى FOMC. فرج-ءنىڭ پىكىرىنشە, جالعاسىپ جاتقان ەپيدەميولوگيالىق داعدارىس قىسقا مەرزىمدى پەرسپەكتيۆادا امەريكا قۇراما شتاتتارىنداعى ەكونوميكالىق بەلسەندىلىككە, جۇمىسپەن قامتۋعا جانە ينفلياتسياعا ايتارلىقتاي قىسىم جاسايدى, جانە ول ورتا مەرزىمدى پەرسپەكتيۆادا ەكونوميكاعا ايتارلىقتاي قاۋىپ توندىرەدى.
"وسى وقيعالاردى ەسكەرە وتىرىپ, كوميتەت فەدەرالدى قاراجات مولشەرلەمەسىنىڭ ماقساتتىق اۋقىمىن 0-0,25% دەڭگەيىندە ۇستاپ تۇرۋ تۋرالى شەشىم قابىلدادى. كوميتەت ەكونوميكا سوڭعى وقيعالارعا توتەپ بەرىپ, جۇمىسپەن قامتۋدىڭ جوعارى دەڭگەيىنە جانە باعانىڭ تۇراقتىلىعىنا قول جەتكىزەتىنىنە سەنىمدى بولعانعا دەيىن وسى ماقساتتى اۋقىمدى ۇستايدى دەپ كۇتەدى, دەلىنگەن كومميۋنيكەدە.
اقشا-كرەديت ساياساتىنىڭ جاعدايىنا بولاشاق تۇزەتۋلەردى ەنگىزۋ مەرزىمدەرى مەن مولشەرىن انىقتاۋ كەزىندە كوميتەت ىسكە اسىرىلعان جانە كۇتىلەتىن ەكونوميكالىق جاعدايلاردى ماقساتتار بويىنشا: ماكسيمالدى جۇمىسپەن قامتۋ جانە ينفلياتسيانى 2% دەڭگەيىندە باعالايدى. بۇل باعالاۋ ەڭبەك نارىعىنىڭ كونيۋنكتۋراسىن, ينفلياتسيالىق قىسىم جانە ينفلياتسيالىق كۇتۋلەر ينديكاتورلارىن, سونداي-اق قارجىلىق جانە حالىقارالىق جاعدايلاردىڭ وزگەرۋى تۋرالى مالىمەتتەردى قامتيتىن كەڭ اۋقىمدى اقپاراتتى ەسكەرەدى", دەلىنگەن قۇجاتتا.