ونەر دەپ سوققان جۇرەگى

تامىرى مىقتى اعاش جەمىستى دە ءورىستى بولاتىنى سەكىلدى كەز كەلگەن تىرشىلىك يەسىنىڭ بويىنداعى قابىلەت كىندىك قانى تامعان توپىراعىنان داريدى. بۇل – بابا ءداستۇرىنىڭ ءبىر وزەگى. كەرمەدەگى جۇي­رىكتى تۇرىسىنا قاراپ سىناعان قازاقتىڭ بولار بالانى بەسىگىنەن تانيتىنى سودان. بۇگىنگى ءبىزدىڭ كەيىپكەرىمىز دە كەشەگى اسان قايعى بابامىز «جەر ءجانناتى» دەپ ايدار تاعىپ, ات قويعان الىپ مەكەننىڭ پەرزەنتى. قاراپايىم وتباسىندا قانات جايعان جاستىڭ اكەسى قۇرىلىسشى بولسا, اناسى ۇلاعاتتى ۇستاز. وسىنداي ماۋەلى شاڭىراقتا تاربيەلەنگەن ول جاسىنان قاعىلەز, ونەرگە ءبىرتابان جاقىن بولدى. ءارتۇرلى مامان يەلەرىنىڭ داستارقان باسىندا ايتاتىن قىزىقتى اڭگىمەلەرىن, قۇيما قۇلاق ۇل جادىندا توقىپ, جاق­سىلىققا باستاۋحات قىلعان. ونى ءوزى دە جاسىرمايدى.

– ءبىزدىڭ وتباسىنداعى ءاربىر كەزدەسۋىمىز ۇزاق اڭگىمەگە جالعاساتىنىنىڭ بىردەن ءبىر سەبەبى, ارقايسىسىمىزدىڭ ءارتۇرلى ماماندىق يەسى بولعاندىعىمىزدان بولار. بۇل وزىڭە بەيمالىم الەمنىڭ ەسىگىن اشقانمەن بىردەي سەزىم. ءوزىمنىڭ تۋعان جەرىم پانفيلوۆ اۋدانىنا قاراستى نا­دەك اۋىلىنداعى ورتا مەكتەپتە ءبىلىم ال­دىم. كەيىن بەلگىلى ايتىسكەر اقىن ايتا­قىن بۇلعاقوۆتىڭ باسشىلىعىمەن بولعان ارنايى ىرىكتەۋدەن ءوتىپ, تالدى­قورعان قالاسىنداعى ونەر مەكتەبىنە قابىلداندىم. وسى تۇستا اكەم مەن انام­نىڭ ەڭبەگى ولشەۋسىز. ولار استىما كولىك مىنگىزىپ, ءۇي الىپ, ۇستىمە قىمبات كيىم اپەرگەن جوق. بىراق ەڭ باستىسى ارماندارىما كەدەرگى كەلتىرمەي, ماعان تاڭداۋ قۇقىعىن بەردى. سول ءۇشىن مەن ولارعا قاتتى ريزامىن جانە العىس ايتامىن, – دەيدى ن.الىبەك.

تالدىقورعان قالالىق دارىندى بالا­لارعا ارنالعان ونەر مەكتەبىن ء«داستۇرلى ءان-تەرمە» سىنىبى بويىنشا جانە دانەش راقىشەۆ اتىنداعى وبلىستىق دارىندى بالالارعا ارنالعان مەكتەپ-ينتەرناتىن ۇزدىك بىتىرگەن سوڭ, بالا ارمانىن جەتەكتەپ الىپ شاھار الماتىعا كەلەدى. باق پەن بابى قاتار شاۋىپ, ءوزى ماقسات ەتكەن ت.جۇرگەنوۆ اتىنداعى  قازاق ۇلتتىق ونەر اكادەمياسىنىڭ  «ەسترادا ءارتىسى (ميۋزيكل)» ماماندىعى بويىنشا پروفەسسور نۇرقانات جاقىپباي شەبەرحاناسىنا وقۋعا قابىلدانادى. بۇل ونىڭ ومىرىندەگى ەڭ بيىك باسپالداقتىڭ ءبىرى ەدى. سەبەبى تەاتر مايتالمانى ن.جاقىپبايعا شاكىرت بولۋ كەز كەلگەن جاس ءارتىستىڭ قولى جەتە بەرمەيتىن شىڭ. ۇستازى جاقسىنىڭ ۇستامى جاقسى دەگەندەي, جاس مامان بۇگىندە سارىارقا تورىندەگى جاستار تەاترىنىڭ بەلدى ءارتىسى. جەتكەن جەتىستىگى دە كول-كوسىر. اتاپ ايتساق,            2016 جىلى تاۋەلسىزدىگىمىزدىڭ 25 جىلدىعىنا ارنالعان XXIV تەاتر­لار فەستيۆالىندە «موتسارت» ميۋزيكلى گران-پري جۇلدەسىنىڭ يەگەرى اتاندى. 2018 جىلى وڭتۇستىك كورەيا «DIMF XII» حالىقارالىق ميۋزيكل فەستيۆالىنىڭ ارنايى ديپلومىن قانجىعاسىنا بايلاپ قايتتى. ر.سەيتمەتوۆتىڭ 80 جىلدىعىنا ارنالعان قازاقستان دراما تەاترلارىنىڭ  ءXXVى رەسپۋبليكالىق فەستيۆالى «ۇزدىك سپەكتاكل» – گران-پريىنە يە بولدى. تۇركيانىڭ كونيا قالاسىندا وتكەن «مىڭ تىنىس – ءبىر داۋىس» حالىقارالىق تەاترلار فەستيۆالىنىڭ العىس حاتىمەن ماراپاتتالدى.

كيەلى ساحنا قاراپايىم اۋىل بالاسى ءۇشىن جارقىن بولاشاققا جەتى­قاراقشىداي جول كورسەتتى دەۋىمىزگە نەگىز بار. «ۇلكەن ساحناعا العاش تابانىم تيگەن ساتتەن باستاپ مەنىڭ ءبىر تۇسىنگەنىم, تەك قانا ەڭبەكتەنۋ كەرەك ەكەن. مەيلى سەن قاتەلەس, مەيلى دۇرىس جاساما, ەڭ باستىسى, ءبىر ورىندا تۇرىپ قالماۋ. «كورىنگەن تاۋدىڭ الىستىعى جوق» دەگەندەي, الدىڭداعى كەز كەلگەن شىڭعا بەت الىپ جۇرە بەرۋ ەرلىكپەن پارا-پار» دەيدى كەيىپكەرىمىز. ونەر اكادەمياسىندا جۇرگەندە دە ەرەكشەلىگىمەن كوزگە ءتۇسىپ, ءوز توبىن وڭتۇستىك كورەيا ەلىنە ەكى رەت بارۋعا مۇمكىندىك جاساعانىن دا ايتپاي كەتۋگە بولماس. قازىر دە كوپتەگەن قويىلىمداردا باستى رولدەردە جوعارى دارەجەدە ويناپ, كورەرمەننىڭ كوزايىمىنا اينالىپ ۇلگەردى. كينو الەمىندە دە وزىندىك قولتاڭباسىن قالدىرىپ كەلەدى.

«بوس ۋاقىتىمدى كىتاپ وقۋعا ارنا­عاند­ى جاقسى كورەمىن. نە بولماسا وڭا­شا قالىپ, ازداپ ولەڭ جازاتىن ادەتىم بار. ءوزىمدى اقىن دەپ سانامايمىن, تەك كوڭىل تولقىعان ساتتە ويلارىمدى قاعاز بەتتەرىنە تۇسىرگەندى ۇناتامىن. وزىمە ۇلكەن شابىت الاتىن كەزىم ءتۇن جانە تىنىشتىق. ال مەنىڭ ومىرلىك ەنەرگيام – كىشكەنتاي بالدىرعاندار. ءسابي كورسەم الەمنىڭ بار قيىندىعىن ۇمىتامىن. ولار وزدەرىنىڭ بەيقام ومىرىنە جەتەلەي جونەلەتىندەي بولىپ تۇرادى. بولاشاقتا «كوپ بالالى اكە» دەگەن اتقا يە بولعىم كەلەدى. ۇرپاعىم ءبىلىمدى بولۋ ءۇشىن ايەلىم ەكەۋىمىز ءبىلىمدى بولۋىمىز كەرەك دەگەن پىكىردەمىن». سەرتكە بەكەم سەرى جىگىت ويىنداعى ارۋدى ءالى ىزدەپ كەلەدى.

ساحنا سىرتىنداعى نۇربەكتىڭ ءومى­­­رى جۇرەك ەلجىرەتەدى. ول «التىن جەبە» ۆولونتەرلىك ۇيىمىنىڭ نەگىزىن قالاۋشىلاردىڭ ءبىرى. ۆولونتەرلىك توپتىڭ باستى مىندەتى – ونكولوگيامەن اۋىراتىن بالالاردى شەتەلدە جاسالاتىن وپەراتسيامەن قامتاماسىز ەتۋ. اشىعىن ايتقاندا, قارجى جيناۋ. ارينە وسى ۋاقىتقا دەيىن كىشىگىرىم توپپەن قۇرىلعان توپتا قازىر 50 ەرىكتى تۇراقتى جۇمىس ىستەيدى. قارتتار ۇيىنە, بالالار ۇيىنە, جاعدايى تومەن وتباسىلارعا جاردەمدەسىپ, جۇمىسسىز قالعان جان­دارعا قولۇشىن بەرەدى. مەكتەپكە بال­دىرعانداردى دايارلاۋ جۇمىستارىن تۇگەلدەي دەرلىك وسى ۆولونتەرلىك ۇيىم ءوز موينىنا الىپ, ءبىر كىسىدەي ەڭبەك ەتىپ كەلەدى. جانىنا شيپا ىزدەگەن جاندارعا قارلىعاشتىڭ قاناتىمەن سۋ سەۋىپ جۇرگەن ەرىكتىلەرگە العىستان باسقا ايتارىمىز جوق.

كەيىپكەرىمىزدىڭ ەرەكشە قىرى, ديپ­لوماتيالىق قارىم-قاتىناس ورناتا بىلۋىندە. قازىرگى تاڭدا جاستار تەاترىندا اكتەرلىكتەن بولەك, «جارناما» ءبولىمىنىڭ جانىنان قۇرىلعان «حالىقارالىق قاتىناستار» بولىمىندە قىزمەت اتقارادى. بۇل دەگەنىڭىز – تەاتردىڭ ءبىر جىلدىق شەتەلگە جاسالىناتىن گاسترولدىك ساپارلارى مەن فەستيۆالدارى تۇگەلدەي دەرلىك نۇربەكتىڭ جەتەكشىلىگىمەن جۇزەگە اسىرىلادى دەگەن ءسوز. «مەن ىستەمەسەم كىم, بۇگىن ىستەمەسەم قاشان؟» دەگەن ۇستانىمدى قازىق ەتكەن جالىندى جاس ءالى تالاي بيىكتەردى ەڭسەرەتىنىنە ەش كۇمانىمىز جوق. جانىنا شۋاق شاشقان نۇربەك سياقتى جانداردىڭ قاسىمىزدا جۇرگەنىن ۇمىتپايىق.