فۋتبولدان قازاقستان قۇراماسىنىڭ باس باپكەرى ميحال بيلەك فەدەراتسيانىڭ رەسمي سايتىنا سۇحبات بەرىپ, ەل چەمپيوناتى مەن ۇلتتىق قۇرامانىڭ ويىندارى تۋرالى كوزقاراسىن ورتاعا سالدى.
– وكىنىشكە قاراي, پاندەميا ومىرىمىزدەگى بارلىق سالاعا ارالاسىپ, ءبىز ونىڭ ىقپالىندا قالۋعا ءماجبۇرمىز. ونىڭ ىشىندە فۋتبول دا زارداپ شەكتى. ماۋسىمدىق جارىستارعا كەرى اسەرىن تيگىزدى. سۋپەركۋبوك پەن ۇلتتىق بىرىنشىلىكتىڭ ءۇش تۋرىنىڭ ويىندارى جارىستىڭ از عانا بولىگى. بارلىق كوماندا وقۋ-جاتتىعۋ جيىنىنىڭ ورنىن تولتىرىپ, قايتادان بوي ۇيرەتۋى كەرەك.
جارىسقا قاتىسۋشىلار ءۇشىن باستى ماسەلەنىڭ ءبىرى – جارىستىڭ قاشان قايتا جالعاساتىنىنىڭ بەلگىسىز بولۋى. كوماندالاردىڭ بارلىعى دايىندىقتارىن جۇرگىزىپ جاتىر. تۋرنير بولماعان سوڭ فۋتبولدان ءمان كەتەدى. سول سەبەپتى وسى كەزەڭ فيزيكالىق جانە پسيحولوگيالىق تۇرعىدان اۋىر. الايدا ويىنشىلار مەن باپكەرلەر ءۇمىت ءجىبىن ۇزگەن ەمەس.
پاندەمياعا قاتىستى ەلدەگى جاعداي تۇراقتالىپ, كارانتين اياقتالىپ, ىندەت جۇقتىرعاندار جازىلىپ شىعادى دەپ ۇمىتتەنەمىز. ءار ازاماتتىڭ دەنساۋلىعى جاقسارعاننان كەيىن وڭ وزگەرىستەر بولادى. جەڭىل ويلانباي, سانيتارلىق-ەپيدەميالىق ەرەجەلەر مەن حاتتامالاردى قاتاڭ ساقتاۋ قاجەت ەكەنىن قولدايمىن. دارىگەرلەردىڭ كەڭەستەرىنە مۇقيات قۇلاق اسقان ءجون.
پاندەميا سالدارى حالىقارالىق كۇنتىزبەگە دە اسەر ەتتى. ماسەلەن, ۋەفا ەۋروپا چەمپيوناتىن شەگەردى. ەۋروكۋبوك پەن قۇرلىقتىق ىرىكتەۋ تۋرنيرلەرىنىڭ مەرزىمدەرى جىلجىدى. باس باپكەردىڭ ايتۋىنشا, قازاقستان قۇراماسىنىڭ جوسپارلانعان ەكى جولداستىق ويىنىنىڭ وتپەي قالۋى قۇرامانىڭ كەيىنگى وقۋ-جاتتىعۋ پروتسەسىنە كەرى اسەر ەتەدى.
– جوسپار بويىنشا كۇز ايلارىندا ۋەفا ۇلتتار ليگاسىنىڭ ىرىكتەۋ ويىندارىنا قاتىسامىز. سونىمەن قاتار ۋەفا-نىڭ بەكىتىلگەن كەستەسى بويىنشا چەرنوگوريا قۇراماسىمەن جولداستىق ويىن وتكىزەمىز. جارىس كۇنتىزبەسى وتە تىعىز. قازاقستاندىق كوماندالار ءۇشىن باستى ماسەلەلەردىڭ ءبىرى – ۇزاق جول, ۋاقىت ايىرماشىلىعى جانە جەرگىلىكتى كليماتقا بوي ۇيرەتۋ. دەگەنمەن قيىندىقتاردى ارتقا تاستاي الامىز. جاز مەزگىلىنە جوسپارلانعان ەكى بىردەي جولداستىق كەزدەسۋدىڭ وتپەي قالعانى ۇلتتىق قۇراماعا كەرى اسەرىن تيگىزدى. ويتكەنى وسى ماتچتار ارقىلى ۇلتتىق قۇراماعا ۇمىتكەر ويىنشىلاردىڭ قازىرگى جاعدايلارىن باعالاۋ مۇمكىن بولاتىن ەدى.
دەسە دە ميحال بيلەك ۇلتتىق قۇرامانىڭ جاتتىقتىرۋشىلار شتابى ۇلتتار ليگاسىنداعى قارسىلاستاردىڭ الەۋەتىن تولىق زەرتتەپ ۇلگەرگەنىن ايتادى.
– قارسىلاستارىمىزدىڭ قارىمىن تولىق زەرتتەپ بولدىق دەپ تە وتىرا بەرۋگە بولمايدى. كۇن سايىن جاڭا اقپاراتتاردى ىزدەۋ جۇمىستارىن ءارى قاراي جالعاستىرامىز. چەرنوگوريا قۇراماسى تۋرالى دا اقپاراتتار بار. ەڭ باستىسى, قازاقستان چەمپيوناتىن قايتا جالعاستىرۋ ارقىلى جاعدايدى جاقسارتۋعا تىرىسامىز. حالىقارالىق كەزدەسۋلەر الدىندا ويىن تاجىريبەسىنىڭ ماڭىزى زور. جارىس جالعاسىپ, ويىنشىلار بابىنا ەنگەننەن كەيىن العا قويىلعان مىندەتتەر تۋرالى ءسوز قوزعاۋعا بولادى. قازىرگى ۋاقىتتا بولجام جاساپ, قورىتىندى شىعارۋ قيسىنعا كەلمەيدى, – دەپ قورىتىندىلادى سۇحباتىن قازاقستان ۇلتتىق قۇراماسىنىڭ باس باپكەرى ميحال بيلەك.