ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «قازگيدرومەت» رمك ديرەكتورى دانارا الىمباەۆا تامىز ايىنىڭ اۋا رايى بولجامىن جاريالادى.
«تامىز – جازدىڭ سوڭعى ايى. اۋانىڭ ورتاشا تەمپەراتۋراسى تامىز ايىندا شىلدە ايىنا قاراعاندا سولتۇستىكتە 2-2,5 گرادۋسقا, ال وڭتۇستىك وبلىستاردا 1 گرادۋسقا تومەن بولادى. قازاقستاننىڭ سولتۇستىگىندە اۋانىڭ ورتاشا ايلىق تەمپەراتۋراسى 16-20 گرادۋسقا, وڭتۇستىككە قاراي جوعارىلاي وتىرىپ قيىر وڭتۇستىكتە 27-29 گرادۋسقا جەتەدى. كونسۋلتاتيۆتى بولجامعا سايكەس جازدىڭ سوڭعى ايى كليماتتىق نورما شاماسىندا بولادى دەپ كۇتىلۋدە. تامىزدا اۋانىڭ ورتاشا ايلىق تەمپەراتۋراسى قازاقستان اۋماعىنىڭ باسىم بولىگىندە قالىپتى بولادى. سولتۇستىك جارتىسىندا نورما – 17-22 گرادۋس», دەدى دانارا الىمباەۆا.
ونىڭ ايتۋىنشا, شىعىس ايماقتاردىڭ تاۋلى-بوكتەرلى اۋداندارىندا 15-16 گرادۋس, باتىس جانە وڭتۇستىك ايماقتاردا 23-27 گرادۋس شاماسىندا ساقتالادى. اۋا تەمپەراتۋراسى قالىپتى شامادا بولادى.
«وسىعان قاراماستان اۋا ماسسالارىنىڭ ءجيى الماسۋىنا بايلانىستى جاۋىن-شاشىنسىز ىستىق كۇندەر مەن سالقىن, جاۋىندى كۇندەر قاتار بولادى. بۇل سكانديناۆيا ايماعىنان سۋىق اۋا ماسسالارىنىڭ ەنۋىنە جانە جەرورتا تەڭىزى مەن يراننان شىعاتىن وڭتۇستىك تسيكلوندارمەن بايلانىستى. تامىز ايىندا جاۋىن-شاشىن مولشەرى رەسۋپبليكانىڭ باسىم بولىگىندە قالىپتى بولادى. رەسپۋبليكانىڭ وڭتۇستىگىندە قالىپتى – 2-9 مم, باتىس پەن ورتالىق – 11-24 مم. نورمادان كوپ كۇتىلەتىن وڭىرلەر: سولتۇستىك قازاقستان وبلىسىندا – 40-53 مم, قوستاناي وبلىسىندا – 17-55 مم, اقمولا وبلىسىندا – 20-41 مم, پاۆلودار وبلىسىنىڭ سولتۇستىك باتىسىندا – 23-40 مم, قاراعاندى وبلىسىندا – 11-17 مم, باتىس قازاقستان جانە اقتوبە وبلىستارىنىڭ سولتۇستىگىندە – 17-27 مم, الماتى وبلىسىنىڭ تاۋلى جانە تاۋ-بوكتەرلى اۋداندارىندا – 18-90 مم», دەدى «قازگيدرومەت» رمك ديرەكتورى.