اكادەميك كەنجەعالي ساعاديەۆ ومىردەن ءوتتى

"وكىنىشكە قاراي, جاپپاي تاراعان اۋرۋ ءبىزدىڭ وتباسىمىزعا دا جەتتى. ونى تانيتىنداردىڭ ءبارى ونىڭ تەرەڭ وي-ءورىسىن, جان دۇنيەسىن جانە جاقىن ادامدارىنا دەگەن قامقورلىعىن جاقسى بىلەدى. وتە جاقسى ءومىر سۇرگەن ۇلى ادام", - دەدى ونىڭ وتباسى.

ولار جەرلەۋ راسىمىنە تەك وتباسى مۇشەلەرى قاتىساتىنىن ايتتى. كەنجەعالي ساعاديەۆتى ەسكە الۋعا ارنالعان باسقا ءىس-شارالار 2021 جىلى 25 شىلدەدە وتەدى. بۇل ونىڭ وسيەتى ەكەن. 

كەنجەعالي ساعاديەۆ 1938 جىلى 18 اقپاندا قوستاناي وبلىسى, اقكول اۋىلىندا دۇنيەگە كەلگەن.

1960 جىلى قازاق مەملەكەتتىك ۋنيۆەرسيتەتىنىڭ ەكونوميكا فاكۋلتەتىن بىتىرگەن. 1966 جىلى پلەحانوۆ اتىنداعى ماسكەۋ حالىق شارۋاشىلىعى ينستيتۋتىنىڭ اسپيرانتۋراسىنا ءتۇستى.

1977 جىلى ەكونوميكا عىلىمدارىنىڭ دوكتورى, 1978 جىلى پروفەسسور, 1994 جىلى قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى اتاعىن الدى. قازاقستان عىلىمى مەن تەحنيكا سالاسىنىڭ قۇرمەتتى قىزمەتكەرى رەتىندە تانىلعان.

ول قازاقستانداعى 5 ءىرى جوعارى وقۋ ورنىن باسقاردى. تسەلينوگراد اۋىلشارۋاشىلىق ينستيتۋتى مەن ت.رىسقۇلوۆ اتىنداعى قازاق ەكونوميكالىق ۋنيۆەرسيتەتىنىڭ رەكتورى بولىپ جۇمىس ىستەدى. قازاق ۇلتتىق اگرارلىق ۋنيۆەرسيتەتى مەن حالىقارالىق بيزنەس ۋنيۆەرسيتەتىنىڭ جانە حالىقارالىق اقپاراتتىق تەحنولوگيالار ۋنيۆەرسيتەتىنىڭ پرەزيدەنتى بولدى.

ۇلتتىق عىلىم اكادەمياسىنىڭ باس عالىم-حاتشىسى جانە پرەزيدەنتى بولىپ سايلاندى. تەحنولوگيالىق دامۋ جونىندەگى ۇلتتىق اگەنتتىكتىڭ ديرەكتورلار كەڭەسىنىڭ توراعاسى اتاندى.

پارلامەنت ءماجىلىسىنىڭ ءۇشىنشى (2004-2007 ج) جانە ءتورتىنشى (2007-2011 ج) شاقىرىلىم دەپۋتاتى بولىپ سايلانىپ, ماجىلىستەگى قارجى جانە بيۋدجەت كوميتەتىنىڭ توراعاسى بولدى (2004-2007 ج.).

اكادەميك ساعاديەۆ ءوزىنىڭ عىلىمي مەكتەبىن قۇردى. 445-تەن استام عىلىمي جۇمىستىڭ, ونىڭ ىشىندە 20 مونوگرافيا مەن وقۋلىقتاردىڭ اۆتورى. ونىڭ رەسپۋبليكالىق گازەت-جۋرنال بەتتەرىندەگى جاريالانىمدارى كوپكە ءمالىم.

ول عالىم جانە ەكونوميست رەتىندە حالىقارالىق ارەنادا تانىمال. اقش-تىڭ نيۋ-يورك اكادەمياسى مەن امەريكالىق ەكونوميكالىق عالىمدار قاۋىمداستىعىنىڭ مۇشەسى, پاكىستان عىلىم اكادەمياسىنىڭ اكادەميگى, حالىقارالىق جوعارى ءبىلىم اكادەمياسىنىڭ اكادەميگى بولىپ سايلانعان.