يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك قاماليەۆ يدم اۆتوموبيل جولدارى كوميتەتىنىڭ توراعاسى سايرانبەك بارماقوۆپەن بىرگە الماتى جانە شىعىس قازاقستان وبلىستارىنداعى رەسپۋبليكالىق ماڭىزى بار "تالدىقورعان-وسكەمەن" تاسجولىنىڭ قايتا جاڭارتۋ جۇمىستارى جۇرگىزىلىپ جاتقان ۋچاسكەلەرىن تەكسەردى, دەپ حابارلادى مينيسترلىكتىڭ ءباسپاسوز قىزمەتى.
ۇزىندىعى 763 شاقىرىمدى قۇرايتىن "تالدىقورعان – وسكەمەن" اۆتوموبيل جولىن قايتا جاڭارتۋ جۇمىستارى جالعاسىپ جاتىر. ەلدەگى ەپيدەميولوگيالىق جاعدايعا قاراماستان, جولشىلار كۇشەيتىلگەن رەجيمدە جۇمىس ىستەۋدە. بۇگىنگە دەيىن ماماندار 14856 مىڭ تەكشە مەتردەن استام جەر قازۋ جۇمىستارىن اياقتاپ, 272 سۋ وتكىزۋ قۇبىرى مەن 29 مال وتپەسىن سالدى. سونداي-اق, جولدىڭ 287 شاقىرىمىندا قيىرشىق تاس جانە قۇم قوسپاسىنان جاسالعان جولدىڭ توسەمە قاباتى, 256 شاقىرىمىندا جول نەگىزىنىڭ تومەنگى قاباتى, 238 شاقىرىمىندا جوعارى كەۋەكتى ءىرى تۇيىرشىكتى اسفالت-بەتوننان جاسالعان جول نەگىزىنىڭ جوعارعى قاباتى جانە 190 شاقىرىمىندا تىعىز ءىرى تۇيىرشىكتى جول جابىندىسىنىڭ تومەنگى قاباتى جايلاستىرىلدى. بۇدان بولەك, مۇندا جول وتپەلەرى, كوپىرلەر مەن جول ايىرىقتارى سياقتى 30 جاساندى قۇرىلىمنىڭ قۇرىلىسى ءجۇرىپ جاتىر.
جول ەلدىڭ وڭتۇستىگى مەن شىعىسىن بايلانىستىراتىندىقتان, ونىڭ ەكى ءوڭىردى دامىتۋدا ماڭىزى زور. ول – نەگىزگى كولىكتىك كۇرە جولداردىڭ ءبىرى. تاسجول الماتى وبلىسىنداعى قويلىق ەلدى مەكەنىن, شىعىس قازاقستان وبلىسىندا شىنقوجا, ۇشبيىك, اياگوز ەلدى مەكەندەرىن اينالىپ وتەدى.
قۇرىلىسىن جۇمىستارىن "CITIC Cinstruction Co.Ltd", "ك-دورستروي" جانە "Todini Central Asia" جشس جۇزەگە اسىرۋدا. جۇمىستاردىڭ ساپاسىن "گك ينجينيريگ" جانە "ZS Enginering" كومپانيالارى باقىلايدى.
ەسكە سالايىق, جوباعا سايكەس "تالدىقورعان – وسكەمەن" تاسجولىنىڭ 32 شاقىرىمى ءتورت جولاعى بار 1 تەحنيكالىق ساناتتاعى, ۇزىندىعى 731 شاقىرىمدى قۇرايتىن جول ۋچاسكەسى 2 جولاعى بار ءىى تەحنيكالىق ساناتتاعى جولعا سايكەستەندىرىلمەك. وسىلايشا جۇرگىزۋشىلەر كوپ ۇزاماي تالدىقورعاننان وسكەمەنگە دەيىن 6-7 ساعات ىشىندە جەتە الاتىن بولادى.
بۇدان بولەك, قايتا جاڭارتۋ جۇمىستارىنىڭ اياسىندا 6 كوپىر, تەمىرجول ارقىلى وتەتىن 3 جول وتپەسى, جارىقتاندىرىلاتىن 11 جول ايىرىعى, 276 قۇبىر, دەمالىس الاڭدارى, ەلدى مەكەندەر ماڭىندا ورناتىلاتىن اۆتوپاۆيلوندار سالىناتىن بولادى. بۇگىنگى تاڭدا ۋچاسكەلەردەگى جۇمىستارعا تەحنيكانىڭ 2 مىڭنان استام بىرلىگى مەن 4 مىڭعا جۋىق ادام جۇمىلدىرىلعان. قۇرىلىس جۇمىستارى 2022 جىلى اياقتالادى دەپ جوسپارلانۋدا.
جۇمىس ساپارى بارىسىندا "QazAvtoJol" ۇك" اق مەن مەردىگەرلىك ۇيىمدار وكىلدەرىنىڭ قاتىسۋىمەن كوشپەلى كەڭەس ءوتتى. شارا اياسىندا جول ۋچاسكەلەرىندەگى قايتا جاڭارتۋ جۇمىستارىنىڭ بارىسى مەن قارقىندىلىعى ماسەلەلەرى تالقىلاندى.