ادام كاپيتالىنان ارتىق ەشتەڭە جوق

وسىلايشا ۇنەمدەلگەن 3 ملرد تەڭگە قارجى ادام كاپيتالىنا جۇمسالماق.

تارقاتىپ ايتار بولساق, شىمكەنت قالاسىنىڭ اكىمدىگى ەل اۋماعىندا توتەنشە جاعدايدىڭ ەنگىزىلۋىنە بايلانىستى باسىم ەمەس بيۋدجەت شىعىستارىن وڭتايلاندىرۋ ماقساتىندا 2020 جىلدىڭ بيۋدجەتىن قايتا قارادى. ەكى رەت ناقتىلاۋدىڭ ناتيجەسىندە 3 094,5 ملن تەڭگە وڭتايلاندىرىلدى. قىسقارتىلعان شىعىننىڭ ىشىندە تەح­نيكالىق قۇرالداردى ساتىپ الۋعا, ءتۇر­لى ءىس-شارالاردى وتكىزۋگە, قالانى ابات­تان­دىرۋعا ارنالعان قارجى بار.

ۇنەمدەلگەن قارجى ىندەتكە قارسى كۇرەس شارالارىنا, اۋرۋحانالاردى دا­رى­لىك زاتتار مەن مەديتسينالىق قۇرال-جاب­دىقتارمەن قامتۋعا باعىتتالدى. ناق­تىلاپ ايتقاندا, 1 647,5 ملن تەڭگە دارى­لىك زاتتار مەن مەديتسينالىق قۇرال-جابدىقتار ساتىپ الۋعا, مەديتسينا قىز­مەتكەرلەرىن ۋاقىتشا باسپانامەن قام­تاماسىز ەتۋگە جانە كولىكپەن تاسى­مال­داۋعا, وتتەگى ستانساسىن ورناتۋعا بو­لىنسە, 236,3 ملن تەڭگە قالانى دەزينفەك­تسيالاۋ جۇمىستارىنا, ال 2 050 ملن تەڭ­گە جۇقپالى اۋرۋلار گوسپيتالىنىڭ قۇرى­لىسىنا جۇمسالماق.

سونداي-اق شىلدە ايىندا قالالىق بيۋدجەتتىڭ قارجىسىن ناقتىلاۋ جۇ­مىستارى قولعا الىنادى. ەپيدەميا­لىق جاعدايعا بايلانىستى بيۋدجەت شى­عىندارىنا تالداۋ جاسالىپ, جالپى 7 214,6 ملن تەڭگە وڭتايلاندىرىلادى دەپ جوس­پارلانۋدا. ناقتىلاۋ كەزىندە مادەني ءىس-شارالار وتكىزۋ, قالانى كوگالداندىرۋ-اباتتاندىرۋ, قىزمەتتىك ءىسساپارلار, مەملەكەتتىك مۇقتاجعا جەر تەلىمدەرىن الۋ, قۇرىلىس جۇمىستارى سياقتى شى­عىندار قىسقارتىلادى. اتالعان قار­جى دەنساۋلىق ساقتاۋ سالاسىنىڭ ماتە­ريالدىق-تەحنيكالىق بازاسىن نىعايتۋعا باعىتتالادى.

 

ءدارى-دارمەكتىڭ ءبىر ايلىق قورى جاساقتالدى

تۇنەۋگۇنى ءدارى-دارمەك ىزدەپ تۇڭىلگەن, ءدارىحانا جاعالاپ دارمەنسىز كۇي كەشكەن جۇرتتىڭ جانايقايى قاتتى شىققانى بەلگىلى. وسىنداي كۇيگە تاپ بولعان ازا­ماتتار جاقىندارىن ايتىپ كەلمەس ىندەت­تەن امان الىپ قالۋ ءۇشىن الەۋمەتتىك جەلىدە قاجەتتى ءدارى-دارمەكتىڭ ۇزىن-سو­نار ءتىزىمىن جازىپ, اعايىننان اراشا, كوپ­شىلىكتەن كومەك سۇراعانىن كوز كورىپ, قۇلاق ەستىدى.

وسىنداي قىسىلتاياڭ ساتتە قالا بيلىگى جەلى بەلسەندىلەرىنىڭ ءاربىر وتىنىشىنە بەيجاي قاراعان ەمەس. قايتا سول سىننان ناتيجە شىعارۋ ءۇشىن شاھارداعى ءدارى-دارمەك قورىن جاساقتاي باستادى. ارنايى رەيدتىك جۇمىستار جۇرگىزىپ, قاسقالداقتىڭ قانىنداي بولعان اسا قاجەتتى دارىلەردى ءدارىحانا سورەلەرىنە قويعىزدى. باعاسىن قاتاڭ باقىلاۋدا ۇستادى. وسىلايشا, شىمكەنت قالاسىنىڭ قويمالارىندا ءبىر ايلىق ءدارىنىڭ قورى جاساقتالدى. شەتەلدەن 3 ميلليونعا جۋىق ءدارى-دارمەك جەتكىزىلدى.

بۇل تۋرالى قالا اكىمى مۇرات ايتەنوۆ ۇكىمەتتىڭ سەلەكتورلىق وتىرى­سىندا مالىمدەدى. جيىندا قالادا اتقا­رىلىپ جاتقان ەپيدەمياعا قارسى شارالار مەن مەملەكەت باسشىسى بەرگەن تاپسىرمالاردىڭ ورىندالۋ بارىسىن باياندادى. وندا اكىم قالاداعى ءدارى تۇراقتىلىعىن ساقتاۋ ماقساتىندا ءۇندىستان, رەسەي, ۋكراينا مەن وزبەكستان ەلىنەن 2 ملن 676 مىڭ فلاكون ءبىرىنشى كە­زەكتەگى ءدارى-دارمەك پەن 16 ملن 700 مىڭ ماسكا جەتكىزىلگەنىن اتاپ ءوتتى.

«مەملەكەت باسشىسىنىڭ حالىقتى ءدارى-دارمەكپەن قامتۋ جونىندەگى تاپسىر­ماسىنا سايكەس قالادا ءتورت مونيتورينگ توبى قۇرىلىپ, 348 دارىحاناعا تەكسەرۋ جۇرگىزىلدى. ناتيجەسىندە, زاڭسىز ءدارى-دارمەك ساتۋمەن اينالىسقان 50 دەرەك انىقتالدى. ونىڭ ىشىندە 12 قىلمىستىق ءىس تىركەلىپ, تەرگەۋ امالدارى باستالدى. قالادا كوتەرمە ءدارى-دارمەك ساتۋمەن اينالىساتىن 10 ءىرى فارماتسەۆتيكالىق كومپانيا جانە 560 ءدارىحانا جۇمىس ىستەيدى. شەتەلدەن ءدارى-دارمەك الىپ كەلۋگە اتال­عان فارماتسەۆتيكالىق كومپانيالارعا بىرجولعى رۇقسات بە­رىلدى», دەدى قالا اكىمى.

 

شەتەلدىك دارىگەرلەر وڭ باعالادى

ىندەتتىڭ الدىن الۋدا ەلىمىز شەتەلدىڭ مەديتسينا ماماندارىمەن تىعىز قارىم-قاتىناستا جۇمىس ىستەپ كەلەدى. سونىڭ دالەلى رەتىندە جۋىردا شىمكەنت قالاسىنا كورشىلەس رەسەيدەن ءبىر توپ مەديتسينا مامانى كەلگەن بولاتىن. اپتاعا جۋىق ۋاقىت ىشىندە سالا بىلگىرلەرى وتاندىق دەنساۋلىق ساقتاۋ سالاسى ماماندارىنىڭ جۇمىسىمەن تانىسىپ, وڭ باعاسىن بەردى.

كۇنى كەشە شىمكەنتتەگى اقپارات­تىق-كوممۋنيكاتسيالىق ورتالىقتا وتكەن جيىن­دا قالالىق دەنساۋلىق ساقتاۋ باس­قارماسى باسشىسىنىڭ مىندەتىن اتقا­رۋ­شى تيمۋر ۆارزيلوۆ پەن رەسەيدەن كەلگەن جوعارى دارەجەلى رەانيماتولوگ دەنيس تسۆەتكوۆ قالاداعى ەپيدەميالىق احۋال توڭىرەگىندە باياندادى.

جيىن بارىسىندا ت.ۆارزيلوۆ قالادا ەپيدەميالىق جاعداي تۇراقتانىپ, ناۋ­قاس­تارعا قاجەتتى مەديتسينالىق كومەك ۋاقتىلى كورسەتىلىپ جاتقانىن جەتكىزدى. ال شىمكەنتكە ارنايى تاجىريبە الماسۋ ماق­ساتىندا كەلگەن جوعارى دارەجەلى رەانيماتولوگ د.تسۆەتكوۆ جەرگىلىكتى دارى­گەرلەردىڭ كوروناۆيرۋسقا قارسى اتقارىپ جاتقان جۇمىستارى تۋرالى ءوز ويىمەن ءبولىستى.

«بايقاعانىمىز, قازىرگى ۋاقىتتا جەر­گىلىكتى دارىگەرلەر شتاتتىق رەجىمدە جۇ­مىس ىستەپ, اۋرۋحاناعا تۇسكەن كەز كەلگەن ناۋقاسقا ساپالى مەديتسينالىق كومەك كورسەتۋدە. ناۋقاستاردىڭ ستاتسيونارعا كەلىپ تۇسكەن ۋاقىتىنان باستاپ, تولىق ەمدەۋ جۇمىستارىنىڭ جۇرگىزىلۋىن كورىپ شىقتىق. شىمكەنت قالاسىنداعى اۋرۋحانالاردا ينتەنسيۆتى تەراپيانى قاجەت ەتەتىن اۋىر جاعدايداعى ناۋقاستار جان­­ساقتاۋ بولىمىندە ەم الۋدا. بۇعان قوسا, ولارعا رەسپيراتورلىق تەراپيا بو­­يىنشا ەم جۇرگىزىلەدى ەكەن. بۇل وتە جاقسى. الەمدىك مەديتسينا دەڭ­گە­­يىندە قولدانىلىپ جاتقان ەمدەۋ تا­سىل­­­دەرىنىڭ ءبىرى – جاساندى تىنىستان­دىرۋ مەن ينۆازيالىق تىنىستان­دىرۋ اپپاراتىن قول­دا­نا وتىرىپ, اۋىر جاعدايداعى ناۋ­قاس­تى امان الىپ قالۋ. بۇل ءتاسىلدى جەر­گىلىكتى ماماندار جاقسى مەڭگەرگەن. شىم­كەنت­تە ناۋقاستارعا كاسىبي مەديتسينا ما­مان­دارىنىڭ كومەگى قولجەتىمدى. قالا تۇرعىندارىنا ايتارىم, اۋرۋ باستالعان ساتتەن باستاپ مەديتسينالىق كومەككە جۇگىنىڭىزدەر», دەدى رەسەيلىك دارىگەر.

رەسەيدەن كەلگەن مەديتسينا ماماندارى قالاداعى بىرنەشە مەديتسينا ۇيىمىن ارالاپ, ەمدەۋ تاكتيكاسى بويىنشا جەر­گىلىكتى دارىگەرلەرمەن تاجىربيە الماسىپ جاتىر. جالپى, شەتەلدەن جەتى مامان كەلگەن. ونىڭ ۇشەۋى رەانيماتولوگ-دارىگەر جانە تورتەۋى ينفەكتسيونيست.

 

ىندەتتىڭ بەتى قايتا باستادى

اي باسىنداعىداي ەمەس, سوڭعى اپتادا شىمكەنتتە كوروناۆيرۋس نە پنەۆمونيامەن اۋىرعانداردىڭ قاتارى ازايا تۇسكەن. قارا جامىلعان ازالى حابار دا سيرەي باستادى. سوڭعى مالىمەت بو­يىنشا COVID-19 ىندەتىمەن شىمكەنت قالاسىندا جالپى 4453 ادام تىركەلگەن.

وتكەن تاۋلىكتە ۆيرۋس جۇقتىرعان 43 ادام تىركەلىپ, ءوسىم 1 پايىزدى قۇرادى. جا­زى­­لىپ شىققاندار سانى – 2770. ياعني, ناۋقاستاردىڭ 62 پايىزى ەمدەلىپ شىق­قان. بۇل جونىندە قالا اكىمى مۇرات ايتەنوۆ پرەمەر-مينيستر اسقار ءما­مين­­نىڭ توراعالىعىمەن وتكەن ۇكىمەت وتى­­­رىسىندا باياندادى.

سەلەكتورلىق رەجىمدە وتكەن جيىندا اكىم قالاداعى ەپيدەميالىق جاع­دايدى تۇراقتاندىرۋ ماقساتىندا ينفەك­تسيالىق جانە پروۆيزورلىق ستاتسيونارلاردا قىسقا مەرزىمدە قوسىمشا 3 050 توسەكتىك ورىن ۇيىمداستىرىلىپ, ورىن سانى 3 860-قا جەتكىزىلگەنىن, ونىڭ ىشىندە 650 ينفەكتسيالىق, 3 210 پروۆيزورلىق توسەكتىك ورىن بار ەكەنىن ايتتى. سونىمەن قاتار رەانيماتسيالىق 30 ورىن سانى 151 ورىنعا دەيىن ۇلعايتىلعانىن جەتكىزدى.

قالا باسشىسى قالاداعى اۋرۋحانا­لارعا قوسىمشا 58 ءوجت اپپاراتى مەن 250 «بوبروۆ» تىنىس الۋ اپپاراتى جانە 26 رەانيماتسيالىق مونيتور الىنعانىن, رەانيماتسيالىق ورىندار 134 ءوجت اپپاراتىمەن جانە وتتەگىمەن قامتىلعانىن, ورىن سانى 861-گە جەتكەنىن مالىمدەدى.

بۇعان قوسا مۇرات ايتەنوۆ تۇماۋ جانە وكپە قابىنۋ بەلگىلەرىمەن جەدەل جاردەم شاقىرۋشىلار سانى 26,6 پايىزعا ازايعانىن, ستاتسيونارلاردا ەم الۋشىلار سانى 31,5 پايىزعا تومەندەگەنىن, ستا­تسيونارلارداعى توسەكتىك ورىننىڭ جۇك­تەمەسى 90,3 پايىزدان 47,5 پايىزعا دەيىن كەمىگەنىن اتاپ ءوتتى.

 

ناۋقاسقا جان, الىپساتارعا مال قايعى...

ءار كەزەڭدە ەل ىشىندە توپالاڭدا تو­قاش ۇرلايتىندار تابىلىپ جاتادى. مىنە, سونداي ەل باسىنا كۇن تۋىپ, ادام شىعىنى بولىپ جاتقان تۇستا دا قۇلقىننىڭ ق ۇلى بولعاندار ارامىزدا ءالى ءجۇر. جەرگىلىكتى بيلىك تاراپىنان قانشاما تەكسەرۋ جۇ­مىستارى جۇرگىزىلسە دە, قۋلىعىن اسىرىپ, ءدارى-دارمەكتى زاڭسىز ساقتاپ, ساتقان ءىس-ارەكەتتەر تىيىلماۋدا. جۋىردا وسىنداي كەلەڭسىزدىكتىڭ الدىن الۋ ماقساتىندا مەديتسينالىق پرەپاراتتاردى زاڭسىز ساۋدالاعان 11 دەرەك انىقتالدى. بۇل جو­نىندە شىمكەنت قالالىق پروكۋراتۋرا وكىلدەرى مالىمدەدى.

مەملەكەت باسشىسىنىڭ تاپسىرماسىن ورىنداۋ ماقساتىندا شىمكەنت قالاسىنىڭ پروكۋراتۋراسى پوليتسيا, ەكونوميكالىق تەرگەۋ, مەملەكەتتىك كىرىس­تەر, تاۋارلار مەن قىزمەتتەردىڭ ساپاسىن باقىلاۋ دەپارتامەنتتەرى جانە پروكۋراتۋرا قىزمەتكەرلەرى قاتارىنان موبيلدىك توپ قۇرىلعان. موبيلدىك توپتىڭ تەكسەرۋى بارىسىندا ازاماتتاردىڭ مەديتسينالىق پرەپاراتتاردى زاڭسىز ساتۋىنىڭ 11 دەرەگى جانە ءدارىحانالاردىڭ دارىلىك زاتتاردى زاڭسىز وتكىزۋىنىڭ 7 دەرەگى انىقتالدى. ونىڭ ىشىندە 14 دەرەك قىلمىستىق كودەكستىڭ 214-بابىمەن (زاڭسىز كاسىپكەرلىك) تىركەلىپ, تەرگەپ-تەكسەرۋ جۇرگىزىلۋدە.

جالپى سوماسى 16,5 ملن تەڭگە بولاتىن 22 مىڭنان استام دارىلىك پرەپارات اينالىمنان شىعارىلدى. بارلىق كىنالى تۇلعالارعا قاتىستى زاڭدا قاراستىرىلعان جاۋاپكەرشىلىككە تارتۋ بويىنشا شارالار قولدانىلۋدا.

قالا پروكۋرورىنىڭ توراعالىعىمەن دارىلىك پرەپاراتتاردى زاڭسىز وتكىزۋ ما­سەلەلەرىنە قاتىستى ءماجىلىس وتكىزىلىپ, مو­بيلدىك توپتىڭ جۇمىسىن جانداندىرۋ جونىندە بىرقاتار شەشىم قابىلداندى. الدا بۇل باعىتتاعى جۇمىستار ءالى دە جال­عاسىن تاپپاق.

 

كاسىپكەرلەر ايانىپ قالعان جوق

ۇلتىمىزدىڭ قانىندا بار قايى­رىمدىلىقتى بەرىك ۇستانعان ىزگى نيەتتى ازاماتتار ىندەتپەن كۇرەس شاراسىنا بىلەك سىبانا كىرىسىپ كەتتى. سول اتىمتاي جومارت ءبىر شوعىردىڭ ىشىندە شىمكەنت قالاسىنىڭ كاسىپكەرلەرى دە كوروناۆيرۋسپەن كۇرەس شارالارىنا ۇلەس قوسۋدا. قايىرىمدى جاندار «شىمكەنت – قايىرىمدى قالا» الەۋمەتتىك-قايى­رىمدىق قورىنا بۇگىنگە دەيىن 100 ملن تەڭگەدەن استام قارجى بولگەن. بۇل تۋرالى قور ديرەكتورى داۋرەنبەك قۇربانيازوۆ مالىمدەدى.

ونىڭ ايتۋىنشا, بۇل قارجىعا 5 دانا وكپەنى جاساندى تىنىستاندىرۋ ء(وجت) اپپاراتى الىنعان. قۇرالداردىڭ تورتەۋى جاڭا جۇقپالى اۋرۋحاناعا, بىرەۋى كارديو­لوگيالىق ورتالىققا ورناتىلعان. بۇگىندە وسى ماقساتقا جۇمسالعان قارجى كولەمى 90 ملن تەڭگەنى قۇرايدى.

سونىمەن قاتار قىزمەتتىك بورىشىن وتەۋ بارىسىندا قازا بولعان دارى­گەر­­لەردىڭ وتباسىنا دا «شىمكەنت – قايى­رىمدى قالا» قورى تاراپىنان قار­جىلاي قولداۋ كورسەتىلدى. كۇنى بۇگىنگە دەيىن قور­دىڭ كومەگىمەن قوسىمشا اشىل­عان پرو­ۆيزورلىق ورتالىقتارداعى توسەكتىك ورىنعا ارنالعان 30 كەرەۋەت پەن 2400 ليتر مينەرالدى سۋ الىنعان. الداعى اپتادا 10 مىڭ بەتپەردە مەن 1000 دانا مەدي­تسينالىق كيىم تاراتۋ جوسپارلانىپ وتىر.

«شىمكەنت – قايىرىمدى قالا» قو­رىنىڭ نەگىزگى ماقساتى – الەۋمەتتىك, ما­دەني, عىلىمي, سپورتتىق, ءبىلىم بەرۋ ماق­ساتتارىنا قول جەتكىزۋ, ازاماتتاردىڭ دەنساۋلىعىن ساقتاۋ, قورشاعان ورتانى قورعاۋ. بۇل قور كوروناۆيرۋس ينفەكتسيا­سىمەن كۇرەستە ۇلكەن الەۋمەتتىك كومەك كورسەتىپ كەلەدى.

قيىن كەزەڭدە جاسالعان جاقسىلىق جاريا بولسا, اينالا جاقسى ىسپەن جارىسقا تۇسەدى ەكەن. كاسىپكەرلەردەن باستاۋ العان جاقسى باستاماعا وتاندىق قۇرىلىس سالاسىنداعى كوشباسشى BI GROUP كومپانياسى دا اتسالىستى. جۋىردا اتالعان مەكەمە شاھارداعى اۋرۋحانالارعا ءوجت اپپاراتىن سىيعا تارتتى.

شىمكەنتتە BI GROUP قۇرىلىس كوم­پانياسى كوروناۆيرۋس ىندەتىنىڭ الدىن الۋ جانە دارىگەرلەردى قولداۋ ماقسا­تىن­­دا مەديتسينالىق ۇيىمدارعا ەكى جاساندى تىنىس الۋ اپپاراتىن سىيلادى. وسىلايشا, كومپانيا وكىلدەرى اپپاراتتى قالالىق كارديولوگيالىق ورتالىق جانە №2 قالالىق اۋرۋحاناعا تابىستادى.

«اۋرۋحانادا 280 ورىندىق پروۆي­زورلىق ورتالىق اشىلعان بولاتىن. پنەۆ­مونيا جانە جرۆي-ءدىڭ اسقىنعان تۇرىنەن ەم الىپ جاتقان ناۋقاستار سانى 170. وتاندىق كاسىپكەرلەردىڭ قول­دا­ۋىنا العىس ايتامىز», دەيدى №2 قالا­لىق اۋرۋحا­نانىڭ باس دارىگەرى سارسەن پەرنەبەكوۆ.

كومپانيا وكىلى تيمۋر ۋرازباەۆ ال­داعى ۋاقىتتا اۋرۋحاناعا قاجەتتى اپپا­رات­پەن بىرگە وتتەگى كونتسەنتراتسياسى بو­يىنشا دا كومەكتەسۋدى جوسپارلاپ وتىر­عانىن جەتكىزدى.

شىمكەنتتەگى ءىرى مۇناي وڭدەۋ زاۋىتى – «پەترو قازاقستان» كومپانياسى دا بۇل جاقسى باستاماعا ءۇن قاتتى. اتالعان مەكەمە «شىمكەنت – قايىرىمدى قالا» الەۋمەتتىك قورىمەن بىرلەسە Covid-19 ينفەكتسياسىمەن كۇرەستىڭ الدىڭعى ساپىندا جۇرگەن مەديتسينالىق ۇيىمعا گۋمانيتارلىق كومەك كورسەتتى.

اتالعان كومپانيا وكىلدەرى №2 قا­لالىق اۋرۋحاناعا قاراستى پروۆيزورلىق ستانتسيونارعا 10 مىڭ مەديتسينالىق بەتپەردە مەن 1000 قورعانىش كوستيۋمىن تارتۋ ەتتى. جۇقپالى ىندەتپەن كۇرەستە ەڭبەك ەتىپ جۇرگەن دارىگەرلەرگە العىسىن بىلدىرگەن سەرىكتەستىك وكىلى رينات اقبەر­ديەۆ كومپانيا تاراپىنان الداعى ۋاقىتتا تاعى دا قولداۋ بولاتىنىن جەتكىزدى.

بۇگىندە قالاداعى پروۆيزورلىق ورتا­لىقتاردا 3610 ورىن بولسا, ونىڭ 260-سى – وسى №2 قالالىق اۋرۋحا­نادا. قازىر مۇندا 200 ناۋقاس ەم قابىلداپ جاتىر. بۇل ورتالىق قاجەتتى ءدارى-دارمەكتەر, تىنىس الۋ قوندىرعىلارىمەن تولىق قامتىلعان. قالا اكىمدىگى تاراپىنان پروۆيزورلىق ستانتسيونارعا قوسىمشا 6 ءوجت اپپاراتى جەتكىزىلگەن بولاتىن.

 

ەكمو اپپاراتى قولدانىلادى

شىمكەنت قالاسىنداعى كارديولو­گيالىق ورتالىقتا پنەۆمونياعا شالدى­عىپ, دەنساۋلىعى كۇرت تومەندەگەن ناۋقاس­تاردى ەكستراكورپورالدى مەمبرانالى وكسيگەناتسيالىق (ەكمو) اپپاراتىنا قوسىپ ەمدەپ وتىر. ماماندار بۇل قۇرىلعىنى ءوجت اپپاراتىنا قوسىمشا كومەك رەتىندە ناۋقاستارعا قوسۋدا.

«ەكمو اپپاراتى – وكپە قابىنىپ, جۇمىسى قاتتى ناشارلاعان كەزدە قان­دى وتتەگىمەن قامتاماسىز ەتەدى. ياعني ادامنىڭ كۇرە تامىرلارىنان ارنايى تۇتىكشەلەر ارقىلى اپپاراتقا قوسىپ, ەكمو-عا قۇيىلعان قانعا قاجەتتى دەڭ­گەي­دە وتتەگى بەرىلەدى. سوسىن قايتا ادام اعزا­سىنا جىبەرىلەدى. وسىنىڭ ارقاسىندا قان اينالىمى جاقسارادى. اتالعان قۇرىلعى ناۋقاسقا دەر كەزىندە كومەك كورسەتۋگە مۇمكىندىك بەرەدى», دەيدى شىمكەنت قالا­لىق كارديولوگيالىق ورتالىقتىڭ ديرەكتورى ەرماعانبەت قۋاتباەۆ.

قالالىق كارديولوگيالىق ورتالىق جانىنان اشىلعان ەكمو ورتالىعىنا شاھاردىڭ وزگە اۋرۋحانالارىنان دەن­ساۋ­لىعى كۇرت ناشارلاعان ناۋقاستار جەت­كىزىلەدى. ولار دا وسى تاسىلمەن ەمدەلۋ­دە. كۇنى بۇگىنگە دەيىن بۇل اپپاراتقا 5 ناۋ­قاس قوسىلىپتى. قازىر ءبىر ناۋقاستىڭ دەن­ساۋلىعى جاقسارعان. دارىگەرلەر ەندى ءبىر اپتادا ۇيىنە قايتارۋدى جوسپارلاپ وتىر.

پنەۆمونيانىڭ ەل اراسىندا كەڭىنەن تارالۋىنا وراي ەكمو ورتالىعىندا 35 ورىن دايىندالعان. قازىر وندا ناۋقاستار ەم الىپ جاتىر. جۇيەلى جۇ­مىستىڭ ارقاسىندا كۇنى بۇگىنگە دەيىن قالالىق كارديولوگيالىق ورتالىقتىڭ بىردە-ءبىر قىزمەتكەرى جامان ىندەتتى جۇق­تىرماعان.