ماعزۇم مىرزاعاليەۆ الداعى دەمالىس كۇندەرى ۇلتتىق پاركتەر مەن دەمالىس ايماقتارىنا رەيد جاسالاتىنىن ەسكەرتتى, - دەپ حابارلايدى Egemen.k.
ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ قورشاعان ورتانى لاستاپ, تابيعاتقا اياۋسىزدىق تانىتقاندارعا سالىناتىن ايىپپۇل مولشەرى كوبەيەتىنىن ايتتى. ونداي زاڭ بۇزعان ازاماتتارعا جەرگىلىكتى اتقارۋشى ورگاننىڭ كومەگىمەن ءدال سول جەردە ايىپپۇل سالۋ جوسپارلانىپ وتىر.
ءمينيستردىڭ ايتۋىنشا, سوڭعى ۋاقىتتا قازاقستان اۋماعىندا تىركەلگەن تابيعاتتى لاستاۋ جانە جان-جانۋارلارعا قورلىق كورسەتۋ فاكتىلەرى ولارعا قاتىستى ەكى ءتۇرلى شارا قولدانۋعا تۇرتكى بولىپ وتىر. ونىڭ ءبىرىنشىسى اعارتۋشىلىق بولسا, ەكىنشىسى – جازالاۋ.
"وكىنىشكە قاراي, سوڭعى اپتادا تابيعاتقا اياۋسىزدىق تانىتقان جايتتاردىڭ كۋاسى بولدىق. اقتاۋداعى يتبالىقتاردى ۇرىپ-سوعۋ فاكتىسى, بۋرابايداعى ءۇيىلىپ جاتقان قوقىستار, الماتىداعى وسى جىلى عانا جوندەۋدەن وتكەن بوتانيكالىق ساياباقتى قيراتۋ فاكتىلەرى, الماتى ماڭىندا ورنالاسقان "پەرۆويمايداعى" قىزىل كىتاپقا ەنگەن لوتوستاردى ج ۇلىپ, ينستاگرامعا جاريا ەتۋ, سونداي-اق بىرەگەي كوبەيتۇز كولىنەن تۇز شىعارۋ جانە ساتۋ فاكتىلەرى... بۇل تەك بىزگە بەلگىلى بولعان جايتتار. وسىمەن قالاي كۇرەسەمىز؟ ونىڭ ەكى ءتاسىلى بار. ءبىرىنشىسى – ەكولوگيالىق ءبىلىم بەرۋ. ءبىز حالىقتىڭ ەكولوگيالىق وي-ساناسىن وزگەرتىپ, ءوزىمىز ۇلگى بولىپ, بالالاردى تابيعاتقا ۇقىپتى قاراۋدى ۇيرەتۋىمىز كەرەك", - دەيدى مىرزاعاليەۆ.
ەكولوگيا ءمينيسترى ۇيرەتۋدى قاراپايىم دۇنيەلەردەن باستاۋ كەرەك ەكەنىن ايتتى. ماسەلەن, قوقىستى لاقتىرماي, ورتەمەي, الىپ كەتۋ, بالالاردى وسىمدىكتەر مەن جانۋارلاردى كۇتۋگە ۇيرەتىپ, ءاربىر ادام تابيعاتتى قورعاۋ قىزمەتىنە بەلسەندى قاتىسۋ كەرەك دەيدى.
"ەكىنشى ءتاسىل – ايىپپۇل سالۋ. سوڭعى كۇندەرى تۋريستەردىڭ كوبەيگەنىن بايقادىق. بىراق, تۋريستەر بارعان جەرلەردە كوپ قوقىس قالدى. بىزگە «قوقىس كونتەينەرلەرىن قويىڭىزدار» دەپ ءجيى ايتادى. الايدا, تاجىريبە كورسەتكەندەي, ءبىز نەعۇرلىم كوپ كونتەينەر قويساق, ازاماتتار سوعۇرلىم كوپ قوقىس شاشادى. وسىعان وراي, ءبىز ايىپپۇل سالۋعا ءماجبۇرمىز. ىشكى ىستەر مينيسترلىگىمەن وسى سۇراقتى پىسىقتادىق. الداعى دەمالىس كۇندەرىنەن باستاپ مونيتورينگ جاساپ, قورشاعان ورتانى لاستاعان ازاماتتار بولسا, ولارعا جەرگىلىكتى جەرلەردە شارا قابىلداۋ ءۇشىن ۇلتتىق پاركتەر مەن دەمالىس ايماقتارى بويىنشا رەيد جۇرەدى. قوقىس تاستاعاندارعا ايىپپۇل سالامىز. بۇگىن مەن مەملەكەت باسشىسىمەن سويلەستىم. پرەزيدەنت تابيعاتقا زيان تيگىزگەن زاڭ بۇزۋشىلارعا قاتىستى جاۋاپكەرشىلىكتى كۇشەيتۋ جانە ايىپپۇل مولشەرىن ۇلعايتۋ جاعىن قاراستىرۋدى تاپسىردى", - دەدى مىرزاعاليەۆ.