وسىدان جيىرما جىلداي ۋاقىت بۇرىن باتىستىڭ ءبىر ونەر قايراتكەرىنىڭ: «مەن جيىرما ءبىرىنشى عاسىردا ءومىر سۇرمەيتىنىمە قۋانامىن, ويتكەنى ول عاسىر وتە كۇردەلى بولادى» دەگەن ءسوزىن وقىعان ەدىم. ول – جيىرماسىنشى عاسىردىڭ ادامى. كەزىندە جازىپ قويماعان سوڭ اتى-ءجونىن ۇمىتتىم. بىراق ءسوزى ەسىمنەن شىققان ەمەس. ونىڭ بۇلاي دەۋىنە نە سەبەپ بولدى ەكەن دەپ ويلايمىن كەيدە.
بىلاي قاراعاندا, تىرشىلىك پەن تۇرمىس جەڭىلدەگەن سوڭ ءومىر دە جەڭىلدەۋى ءتيىس قوي. ءبىر ەسەپتەن سولاي بولىپ تا كەلە جاتقان سەكىلدى. ماسەلەن, قازىرگى عاسىر تۋرالى شىعارما جازعان ءبىر وقۋشى بىلاي دەيدى:
«مەن ءححى عاسىردا ءومىر سۇرگەنىمە وتە قۋانامىن. شىن ءسوزىم! مەن «بۇرىنعى ءومىر جاقسى ەدى» دەپ ايتاتىن ادامداردى مۇلدەم تۇسىنبەيمىن. ويتكەنى قازىرگىدەن ارتىق ءومىر جوق ەكەندىگى انىق. سول ارتىقشىلىقتىڭ ءبىر-ەكەۋىنە توقتالسام, سونىڭ ءوزى جەتىپ جاتىر. مەن ءوزىم قاجەت ەتكەن جەرلەردىڭ بارلىعىنا ماشينامەن تەزدەتىپ بارا الامىن.
ال بۇرىنعى ءومىردى اڭسايتىن ادامداردىڭ بارلىعى ونداي جەرلەرگە ىلبىگەن ات-اربامەن ساعاتتار, ءتىپتى كۇندەر بويى ءجۇرىپ زورعا جەتەتىن.
مەندە ينتەرنەتتى پايدالانۋ مۇمكىندىگى بار. وزىمە قاجەتتى اقپاراتتىڭ بارلىعىن سودان الا الامىن. جۇيكەسى ابدەن توزعان قارت مۇعالىمنىڭ (ول حح عاسىردىڭ ادامى عوي) بەتىنە قاراپ وتىرا بەرمەيمىن.
مەن ۇيدەن شىقپاي-اق كەز كەلگەن تاۋاردى ساتىپ الا الامىن. بۇرىنعى زامانداعىداي وعان تاپسىرىس بەرىپ, ايلار بويى كۇتىپ جۇرمەيمىن. ەگەر مەن باسقا ەلگە بارعىم كەلسە, جولعا جينالۋىما جانە سول ەلگە جەتۋىمە ارى كەتسە ەكى-ءۇش كۇن كەتەدى. باياعىنىڭ ادامدارى سەكىلدى ات-ارباعا ءمىنىپ الىپ, ايلار بويى قورقىنىشتى ساپاردى باستان كەشىرىپ جۇرمەيمىن.
ساناي بەرسەڭ, بۇل زاماننىڭ ارتىقشىلىقتارى جەتىپ جاتىر عوي. ءتىپتى قاقساعان ءتىسىڭدى جۇلعىزىپ تاستاۋ دا قازىر قيىن ەمەس. انەستەزيا جاسايتىندىقتان ونى قالاي ج ۇلىپ العانىن دا اڭعارماي قالاسىڭ. ال بۇرىنعىنىڭ ادامدارى قاقساعان ءتىسىن قورقىنىشتى تىستەۋىكپەن جۇلعىزۋ ءۇشىن كەمىندە ءبىر بوتەلكە ۆيسكي ىشكەن بولار. ءتىپتى ولاردىڭ ۆيسكي ىشۋگە دە جاعدايى كەلە بەرمەگەنى انىق. سوندا قاي عاسىر دۇرىس؟ وسىدان-اق وزدەرىڭىز قورىتىندى شىعارا بەرىڭىزدەر».
ارينە, بۇل شىعارمادان سان سالالى ومىرگە تەك تەحنولوگيالىق جەتىستىكتەر تۇرعىسىنان عانا باعا بەرە الاتىن جەتكىنشەكتىڭ كوزقاراسى اڭعارىلادى. تەحنولوگيالىق جەتىستىكتەر جوق جەردىڭ بارلىعى وعان قورقىنىشتى كورىنەتىندەي. ال جيىرماسىنشى عاسىردىڭ ەكىنشى جارتىسىندا ومىرگە كەلگەن ءبىزدىڭ كوبىمىزگە سول جيىرماسىنشى عاسىرىمىز جاقسى سەكىلدى. بالكىم, بۇل جاستىق شاعىمىز سول عاسىردا وتكەندىكتەن شىعار. ونىڭ ۇستىنە, ول كەزدە بولاشاققا دەگەن سەنىم مەن كوڭىلدىڭ تازالىعى قانداي ەدى. ال قازىر سول بار ما؟ تەحنولوگيالار ارقىلى تۇرمىس جەڭىلدەگەنىمەن ۋايىمنىڭ, قاۋىپ-قاتەرلەردىڭ كوبەيگەنىن اڭعارۋعا بولادى. بەينە ءبىر شىتىناپ كەتۋگە ءسال تۇرعان شىنى الەمنىڭ ىشىندە كەلە جاتقاندايمىز.
ارينە, زامان تۋرالى ءبىر ادامنىڭ بەرگەن باعاسى ەكىنشى ءبىر ادام ءۇشىن سۋبەكتيۆتى كورىنۋى مۇمكىن. ويتكەنى ادامدار ارقيلى ءومىر سۇرەدى. تاڭداۋى دا ءارتۇرلى. ماسەلەن, ماعان جيىرما ءبىرىنشى عاسىردىڭ ياندەكس تاكسيىنىڭ ىشىندە كەلە جاتقاننان گورى جيىرماسىنشى عاسىردىڭ ترامۆايىنىڭ ىشىندە كەلە جاتقان الدەقايدا ۇنايدى.
شىنىن ايتقاندا, جوعارىداعى ونەر قايراتكەرىنىڭ «جيىرما ءبىرىنشى عاسىر وتە كۇردەلى بولادى» دەگەن ءسوزىنىڭ ءمانىن ەندى تۇسىنە باستاعاندايمىن. جيىرما ءبىرىنشى عاسىردا تۇرمىس جەڭىلدەگەنىمەن, ءومىر ءسۇرۋ كۇردەلەنە تۇسكەن. ادامزات مەديتسينانىڭ كۇشىمەن ىندەت اتاۋلىنى جەڭدىك دەپ ماسايراعانداي ەدى. قايداعى جەڭگەن!.. ەندى ىندەت تە كۇردەلەنە تۇسكەندىگىن بايقاۋعا بولادى.
ارينە, جاسامپاز ادام بالاسىنىڭ اقىل-ويى مەن كۇش-قايراتىنان, ونىڭ قازىرگى قول جەتكىزگەن مۇمكىندىكتەرىنەن ءۇمىت كۇتەمىز. بۇل ىندەتتىڭ دە ەمى تابىلار. جالپى وسى كوروناۆيرۋستان كەيىن ورتاق كەدەرگىلەر مەن قاۋىپ-قاتەرلەردى ەڭسەرۋ جولىندا ادام بالاسى بىرىگە باستاۋى مۇمكىن. بالكىم, الداعى ءومىر وزگەرەر. ءومىردىڭ ساپالى جاڭا قاعيداتتارى پايدا بولار. بىراق جاڭا قاۋىپ-قاتەرلەردىڭ دە باس كوتەرە بەرەتىنىن, ءتىپتى ولار كوروناۆيرۋس سەكىلدى ويلاماعان جەردەن پايدا بولۋى مۇمكىن ەكەنىن دە جوققا شىعارا المايمىز. جيىرما ءبىرىنشى عاسىر وسىنداي قۇبىلىستارىمەن كۇردەلى بولاتىن سەكىلدى.