نۇر-سۇلتانعا Covid-19, پنەۆمونيا جانە باسقا دا بىرقاتار اۋرۋلاردى ەمدەۋگە ارنالعان ءدارى-دارمەكتەردىڭ تاعى ءبىر پارتياسى كەلدى. بۇگىن ەلورداعا جۇك ۇشاعىمەن ء(ۇندىستاننان) جانە جۇك كولىكتەرىمەن ءدارى-دارمەكتەر جەتكىزىلدى. دارىلەردىڭ جالپى سالماعى 23 توننادان اسادى. بۇل تۋرالى قالا اكىمدىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.
بۇل تاۋارلار گۋمانيتارلىق كومەك ەمەس, ولاردى ءدارىحانا جەلىلەرىنىڭ ديستريبيۋتورلارى ساتىپ العان. ۇكىمەت پەن اكىمدىك ءدارى-دارمەكتى ساتىپ الۋ جانە جەتكىزۋ پروتسەدۋرالارىن جەڭىلدەتۋ, لوگيستيكا بويىنشا قولداۋ كورسەتەدى.
ەلوردا اكىمى التاي كولگىنوۆتىڭ تاپسىرماسى بويىنشا ءدارىحانا جەلىلەرىنىڭ ديستريبيۋتورلارىنا ءدارى-دارمەكتەردى ساتىپ الۋعا اينالىم قاراجاتى ءبولىنىپ, تاسىمالداۋعا كومەك كورسەتىلۋدە.
وسىلايشا, بۇگىن ءدارىحانا جۇيەلەرiنىڭ ديستريبيۋتورلارىمەن ەلورداعا كسارەلتو, ينگاۆيرين, كلەكسان, پاراتسەتامول, ترومبو اسس, ازيتروميتسين, انافەرون, سۋمامەد, ليدوكوين, كارديوماگنيل, تسەفترياكسون, ەرگوفەرون جانە ت.ب. جەتكىزدى.
ءىرى ءدارىحانا جەلىلەرىن ءدارى-دارمەكپەن قامتاماسىز ەتۋ جۇمىستارى جۇرگىزىلۋدە. ەسكە سالا كەتەيىك, وسى اپتانىڭ باسىندا ەلورداعا جۇك ۇشاعىمەن 30 توننادان استام ءدارى-دارمەك جەتكىزىلگەن بولاتىن. سونداي-اق جاقىن كۇندەرى ەلورداعا 22 توننادان استام ءدارى-دارمەك كەلەدى. ءدارىحانالاردى ءدارى-دارمەكتەرمەن قامتۋ جۇمىستارى تۇراقتى نەگىزدە جۇرگىزىلەتىن بولادى.