ءا.قاستەەۆ اتىنداعى مەملەكەتتىك ونەر مۋزەيىندە «ايناسىز اۆتوپورترەت» دەپ اتالاتىن ۆيرتۋالدى كورمە اشىلدى. مۋزەيدىڭ «تەنگري ۋماي» زاماناۋي ونەر گالەرەياسىمەن بىرلەسكەن كەزەكتى جوباسى بەلگىلى سۋرەتشى رۋستام ءحالفيننىڭ شىعارماشىلىعىن قامتىعان. ەكسپوزيتسيادا قىلقالام شەبەرىنىڭ 1980-2008 جىلدارداعى شىعارماشىلىق ءومىربايانىنىڭ ءارتۇرلى كەزەڭدەرىمەن تانىسۋعا بولادى.
حالفين – ناعىز ونەردە ەشقانداي شەكارا بولمايدى دەپ پايىمداعان سۋرەتشى. ول ەلىمىزدەگى جاڭا بەينەلەۋ تىلدەرى مەن تاسىلدەرىن مەڭگەرۋدە العاشقىلاردىڭ ءبىرى بولىپ, ءوزىنىڭ اينالاسىندا العىر زياتكەرلىك ورتا قالىپتاستىردى. 1980-ءشى جىلداردىڭ ورتاسىندا جۇبايى, سۋرەتشى ليديا بلينوۆامەن بىرگە پاتەرلىك كورمەلەر ۇيىمداستىرىپ, زاماناۋي سۋرەت ونەرىنىڭ ءورىس جايۋىنا دا سۇبەلى ۇلەس قوستى.
– ونىڭ ستيلىندە ءتۇس پەن فون, ابستراكتسيا مەن بەينەلىلىك اراسىنداعى شەكارا جويىلادى. ورىس اۆانگاردىنىڭ سوڭعى وكىلدەرىنىڭ ءبىرى ۆلاديمير ستەرليگوۆپەن, كەيىنىرەك ونىڭ ىزباسارلارىمەن بايلانىس ءحالفيننىڭ شىعارماشىلىق دۇنيەتانىمىنىڭ كوكجيەگىن كەڭەيتتى. ول الدىمەن كەسكىندەمەنىڭ كوركەم كورىنىس تابۋى ءۇشىن ساۋلەت ونەرىن زەرتتەپ, ال كەيىن ءوزىن كوكەيكەستى ونەردىڭ وكىلى رەتىندە جاريالادى. حح عاسىردىڭ كورنەكتى فيلوسوفتارىنىڭ شىعارمالارىن زەرتتەۋمەن اۋەستەندى. اتاپ ايتقاندا, فرانتسۋز پوستمودەرنيزم فيلوسوفتارىنىڭ ەڭبەكتەرى ونى ءوز دەنەسىن زەرتتەۋگە يتەرمەلەدى. كەسكىندەمەدەگى زەرتتەۋ جۇمىسى ءحالفيندى الدىڭعى داۋىرلەردەگى كەسكىندەمە سالاسىنداعى ۇلكەن جەتىستىكتەردى تۇسىنۋگە تارتتى. ونىڭ ەڭبەكتەرىندە ماتيسس, سەزانن, مالەۆيچ, ۆەلاسكەستىڭ شىعارمالارىنا سىلتەمەلەر بار, دەيدى ونەرتانۋشى ەكاتەرينا رەزنيكوۆا.
كورمەدەگى «ايناسىز اۆتوپورترەت» توپتاماسىنا بىرىكتىرىلگەن كورىنىستىك ادام مۇسىندەرى ءبىر قاراعاندا تۇسىنىكسىزدەۋ كورىنەدى. سالا ماماندارىنىڭ سوزىنشە, بۇل تۋىندىلاردىڭ دا وزىندىك فيلوسوفياسى بار. ونداعى سىزىقتاردىڭ كەسكىنى قول مەن جامباستىڭ ءيىلىسىن, اينالاداعى الەمنىڭ ەرىگىش فورمالارىمەن «كوز كەسكىنىن» بىلدىرەدى. زاتتار مەن قۇبىلىستاردىڭ جاسىرىن ءمانىن تۇسىنۋگە ۇمتىلۋ, بولمىس زاڭدىلىقتارىن ءينتۋيتيۆتى ءبىلۋ, سۋرەتشىنىڭ ءوزى ونىڭ ءبىر بولىگى بولىپ تابىلاتىن عالامنىڭ كوركەم مودەلىن ىزدەۋگە جەتەلەيدى.
سوپاق-كۇمبەزدى جۇيەنىڭ اسەرىنەن جاسالعان كەسكىندەمە – تازا ەكسپەريمەنت, وندا پەيزاج كەڭىستىگى نىسان-ورتانى, كەڭىستىك پەن ءتۇستى باقىلاۋعا ارنالعان ورىسكە اۋىسادى. مۇندا زاتتار ءوز تىعىزدىعىن جوعالتادى, سالماقسىزدىققا يە بولادى. قالىپتاسقان جولمەن ءجۇرۋدى جەتكىلىكسىز دەپ ساناعان شەبەر مالەۆيچ پەن ستەرليگوۆتىڭ يدەيالارىن دامىتا تۇسكەن.
كورمەدە «سۋرەتشىنىڭ تەرىسى» جوباسىنىڭ بىرنەشە ينستاللياتسياسى ۇسىنىلعان. حالفين مەن ونىڭ سەرىكتەستەرى ءتۇرلى ماتەريالداردان جاساعان ارتەفاكتىلەر توپتاماسى جىل سايىن وڭىپ كەتەتىن بولعان. كوركەم ەمەس ماتەريالدار قولدانىلعان بەينەلى تۋىندىلاردىڭ اۆتورلىق ينتەرپرەتاتسياسى شىنايى ءۆيزۋالدى پىكىرلەر تۋدىرادى.
الماتى