ەرالى توعجانوۆ ەلورداداعى مەديتسينا مەكەمەلەرىن ارالادى

پرەمەر-ءمينيستردىڭ ورىنباسارى بارعان العاشقى نىسان امبۋلاتورلىق-ەمحانالىق جانە ستاتسيوناردى الماستىراتىن كومەك كورسەتەتىن, سونداي-اق جەدەل مەديتسينالىق جاردەم شاقىرتۋلارىنا قىزمەت كورسەتەتىن №9 قالالىق ەمحانا بولدى. بۇگىنگى تاڭدا ەمحانادا 95 مىڭ تۇرعىنعا قىزمەت كورسەتىلەدى.  

پاندەميا كەزىندە ەمحانادا فيلتر-كابينەتتەر مەن پروۆيزورلىق ءبولىم ۇيىمداستىرىلدى, بۇل جەرلەردە پتر-زەرتتەۋ ءۇشىن بيوماتەريال الىنىپ, سونداي-اق قاجەتتى ەم تاعايىندالادى.  

سونىمەن قوسا, ۆەدومستۆوارالىق كوميسسيا باسشىسى Damumed ءموبيلدى قوسىمشاسى ارقىلى ىسكە قوسىلعان پاتسيەنتتەردى تەگىن ونلاين-قابىلداۋدىڭ جۇمىسىمەن تانىستى. قازىرگى كەزدە 19 ۇيىم وسى قىزمەتكە قوسىلعان. بولاشاقتا نۇر-سۇلتان قالاسىنداعى 31 مەديتسينا ۇيىمى ونلاين-كونسۋلتاتسيالار جۇرگىزەتىن بولادى.  

بۇدان وزگە, ەمحانادا جەدەل جاردەمگە تۇسەتىن جۇكتەمەنى جويۋ ماقساتىندا بەس ءموبيلدى بريگادا ۇيىمداستىرىلعان. بۇل ءموبيلدى توپتار COVID-19 جانە پنەۆمونيامەن سىرقاتتانۋعا كۇماندى ناۋقاستارعا ۇيدە قىزمەت كورسەتەدى, دارىگەرلەر تەكسەرىپ, پتر-زەرتتەۋدەن وتكىزۋ ءۇشىن بيوماتەريال الىنادى جانە قاجەتتى ەم تاعايىندالادى.

سونىمەن قاتار, ە. توعجانوۆ جەدەل مەديتسينالىق جاردەم قالالىق ستانتسياسىنا باردى. 2016 جىلدان بەرى ستانتسيادا كەپىلدەندىرىلگەن تەگىن مەديتسينالىق قىزمەت كولەمى اياسىندا اۋرۋحاناعا دەيىنگى شۇعىل مەديتسينالىق كومەك كورسەتىلەدى. قازىرگى كەزدە مۇندا 1 414 مەديتسينا قىزمەتكەرى جۇمىس ىستەيدى, 80 بريگادا مەن 124 اۆتوكولىك قۇرالى بار.

ايتا كەتەيىك, بۇگىنگى تاڭدا جەدەل جاردەم كومەگىنە جۇگىنەتىندەردىڭ سانىنىڭ ازايعانى بايقالىپ وتىر. ەگەر 22 ماۋسىمدا وعان تاۋلىگىنە 4,3 مىڭ ادام جۇگىنسە, 16 شىلدەدە 1,9 مىڭ ادام جۇگىنگەن. ونىڭ ىشىندە كۆي بويىنشا جۇگىنۋ سانى تاۋلىگىنە 500-دەن 254-كە دەيىن تومەندەگەن. جەدەل جاردەمدى شاقىرتۋلار سانى تاۋلىگىنە 3 مىڭنان 1,3 مىڭعا دەيىن قىسقارعان.

پرەمەر-ءمينيستردىڭ ورىنباسارى ە. توعجانوۆ بۇدان باسقا №2 قالالىق كوپسالالى اۋرۋحانانىڭ جۇمىسىمەن تانىستى, بۇل اۋرۋحانا پاتسيەنتتەردى بارلىق بەيىندەر بويىنشا قابىلدايتىن بىردەن-ءبىر ەمحانا بولىپ وتىر. اۋرۋحانا جەدەل مەديتسينالىق كومەك بويىنشا دا, ادامداردىڭ وزدىگىنەن جۇگىنۋى بويىنشا دا تاۋلىك بويعى رەجيمدە پاتسيەنتتەردى قابىلداۋدى قامتاماسىز ەتەدى. تاۋلىك ىشىندە ورتا ەسەپپەن 300-گە جۋىق پاتسيەنت مۇندا جۇگىنەدى — 200 ادام جەدەل مەديتسينالىق جاردەم بويىنشا, 100 ادام وزدىگىنەن جۇگىنۋ جانە ەمحانالاردان باعىتتالۋى بويىنشا.

سونىمەن قاتار اۋرۋحانادا كوروناۆيرۋس ينفەكتسياسىمەن اۋىرعاندارعا ارنالعان 30 ينفەكتسيالىق توسەك-ورىن, سونداي-اق جانساقتاۋ بولىمىندە قاجەتتى مەديتسينالىق جابدىقتارمەن, ونىڭ ىشىندە ءوجج اپپاراتتارىمەن جاراقتالعان 9 توسەك-ورىن بار.  

نۇر-سۇلتان قالاسىنداعى №2 كوپسالالى اۋرۋحانانىڭ ماماندارىنىڭ شتاتى 1700-دەن اسا جوعارى بىلىكتى قىزمەتكەردى قامتيدى, ونىڭ ىشىندە 500 — دارىگەر. اۋرۋحانىنىڭ 200-دەن اسا قىزمتكەرى اۋىرعان, ونىڭ ىشىندە 150 ادام ساۋىعىپ, جۇمىسىنا ورالعان.  

مەديتسينا قىزمەتكەرلەرىمەن كەزدەسۋ كەزىندە ە. توعجانوۆ مەديتسينا قىزمەتتەرىنىڭ بارلىق قىزمەتكەرلەرىنە العىس ءبىلدىرىپ, ولاردىڭ كۇندەلىكتى ەرەن ەڭبەگىن اتاپ ءوتتى جانە ولاردى بۇگىنگى كۇننىڭ قاھارماندارى دەپ اتادى.

سونىمەن قوسا, پرەمەر-ءمينيستردىڭ ورىنباسارىمەن اڭگىمەلەسۋ كەزىندە دارىگەرلەر ارىپتەستەرىنىڭ اتىنان مەديتسينا قىزمەتكەرلەرىنە ۇستەمە اقى تولەۋگە قاتىستى الاڭداۋشىلىقتارىن ءبىلدىردى, بۇل ماسەلەگە قاتىستى ە. توعجانوۆ مەديتسينا قىزمەتكەرلەرىنە بارلىق قاجەتتى تولەمدەر تولىق كولەمدە اۋدارىلاتىنىنا سەندىردى.

سونىمەن قاتار, مەديتسينا مەكەمەلەرىن دارىلىك پرەپاراتتارمەن ودان ءارى قامتاماسىز ەتۋ ماسەلەسى تالقىلاندى. بۇگىنگى تاڭدا مەديتسينا مەكەمەلەرى دارىلىك زاتتارمەن 100% قامتاماسىز ەتىلگەن. ۆەدومستۆوارالىق كوميسسيانىڭ باسشىسى دەنساۋلىق ساقتاۋ مينيسترلىگى مەن "سك-فارماتسيا" جشس-عا ەلىمىزىدڭ بارلىق مەديتسينا مەكەمەلەرىندە دارىلىك پرەپاراتتاردىڭ ايلىق قورىن قامتاماسىز ەتۋدى تاپسىردى.

ەلورداداعى ستاتسيونارلاردىڭ جۇكتەمەلەنۋى وتكەن ايمەن سالىستىرعاندا سالىستىرعاندا 34%-عا تومەندەگەنىن اتاپ وتكەن ءجون, سونداي-اق توسەك-ورىندار سانى 2 705 بىرلىككە ارتقان.