تۇرىك ينۆەستورلارى قازاقستاندا وكپەنى جاساندى جەلدەتۋ اپپاراتتارىنىڭ ءوندىرىسىن جولعا قويماقشى. مەملەكەتارالىق كەلىسسوزدەر اياسىندا قازاقستان رەسپۋبليكاسىنىڭ تۇرىك رەسپۋبليكاسىنداعى ەلشىلىگىنىڭ بەلسەندى قاتىسۋىمەن Biosys كومپانياسىنان Biyovent ءوجج اپپاراتىنىڭ ءوندىرىسىن يگەرۋ مۇمكىندىگى قاراستىرىلۋدا.
بۇگىندە «قازاقستان ينجينيرينگ» ۇك» اق «KAZAKH INEVST» ۇك» اق-نىڭ كومەگىمەن «قازاقستانAselsan ينجينيرينگ» جشس بىرلەسكەن قازاق-تۇرىك كاسىپورنىندا مەديتسينالىق قۇرال ءوندىرىسىن ۇيىمداستىرۋ مۇمكىندىگىن قاراستىرىپ جاتىر.
«COVID-19 بويىنشا اۋرۋدىڭ ءوسۋى اياسىندا دەنساۋلىق ساقتاۋ ورگاندارى قوسىمشا 3-4 مىڭ ءوجج ساتىپ الۋدى جوسپارلاپ وتىر. بۇل اپپاراتتاردىڭ سەريالىق ءوندىرىسى 2020 جىلدىڭ ساۋىرىندە تۇركيادا ىسكە قوسىلدى. بۇگىنگى تاڭدا Biyovent ءوجج نۇر-سۇلتان قالاسىنىڭ جۇقپالى اۋرۋلار ورتالىعىنا سىناق جۇرگىزۋ ءۇشىن ۇسىنىلعان. زەرتتەۋ ناتيجەلەرى بويىنشا ءوندىرىستى وقشاۋلاۋ تۋرالى شەشىم قابىلدانادى», دەپ اتاپ ءوتتى «KAZAKH INVEST» ۇك» اق № 2 جوبالارمەن جۇمىس دەپارتامەنتى جوباسىنىڭ جەتەكشىسى ءامىر احمەتوۆ.
ماماندار اتاپ وتكەندەي, Biosys – تۇركياداعى بيومەديتسينالىق جابدىقتاردى ازىرلەۋشى جانە ءوندىرۋشى كومپانيا. ءوجج تۇركيا كاسىپورىندارىنىڭ تەك ىشكى وندىرىستىك مۇمكىندىكتەرىن پايدالانا وتىرىپ ازىرلەنگەن جانە وندىرىلگەن. بۇل اپپارات تۇركيا رەسپۋبليكاسى عىلىم, ونەركاسىپ جانە تەحنولوگيالار مينيسترلىگىنىڭ جانە بيلكەنت تەحنوپاركىنىڭ كومەگىمەن 5 جىلدىق عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردىڭ ناتيجەسى.
Biyovent ءوجج زياتكەرلىك قاۋىپسىزدىك جۇيەسى مەن ىڭعايلى ينتەرفەيسى بار. قۇرىلعى ءارتۇرلى پاتسيەنتتەر توبىمەن (نەوناتالدى, بالالار, ەرەسەك) ۇيلەسىمدى, كەڭەيتىلگەن ءاداپتيۆتى باقىلاۋدىڭ وزىق الگوريتمدەرىن قولدانادى. اپپاراتتى قىسقا مەرزىمدە 100-گە جۋىق ينجەنەردىڭ قاتىسۋىمەن ASELSAN, Bilkent, Biosys, Arçelik تۇرىك كومپانيالارىنىڭ كونسورتسيۋمى پىسىقتادى.