اتىراۋ وبلىسىندا دارىگەرلەرگە قاتىستى داۋ شىقتى. قۇلسارى پەرزەنتحاناسىندا كەسەر تىلىگى ارقىلى بوسانعان ساۋلە باپاەۆا بالامدى اۋىستىرىپ جىبەردى دەپ جەرگىلىكتى دارىگەرلەردى كىنالاپ وتىر. بۇل تۋرالى Nur.kz حابارلادى.
س. باپاەۆانىڭ ايتۋىنشا, وتادان كەيىن اق حالاتتىلار وعان "پەرزەنتىڭىز قىز, بىراق ءولى تۋىلدى" دەپتى. الايدا, قولىنا ەر بالانىڭ مۇردەسىن ۇستاتقان. ءتىپتى ونىڭ دا ىشكى ورگاندارى مۇلدەم باسقا سابيدىكى بولىپ شىققان. وسى باسسىزدىققا اشىنعان ەرلى-زايىپتىلار بالاسىن الىپ, جاتىرىن كەسىپ تاستاعان دارىگەرلەردى سوتقا بەرگەنمەن, قىلمىستىق ءىس 5 جىلدان بەرى جۇرگىزىلمەي كەلەدى.
وسى داۋ شىعا سالىسىمەن پەرزەنتحانادا شەتىنەپ كەتكەن 10 ءسابيدىڭ مۇردەسى قازىپ الىنىپ, تەكسەرۋدەن وتكىزىلگەن. بىراق, ولاردىڭ ءبىر دە بىرەۋى ساۋلەنىڭ بالاسى بولماي شىققان. ال اناسى نارەستەنىڭ ءتىرى ەكەنىنە سەنىمدى. ءتىپتى قىزى دارىگەرلەردىڭ بىرىندە بولۋى دا مۇمكىن ەكەنىن ايتادى.«مەنىڭ كۇماندى ادامدارىم – وسى جىلوي پەرزەنتحاناسىنىڭ دارىگەرلەرى بەيىسوۆا بالگۇل, مامبەتوۆا ساۋلە, تاعى دا ءبىر كۇدىك كەلتىرەتىنىم مامبەتوۆا ساۋلە. ول ۇيگە كەلگەن ساتىندە بالدارىڭىز قايدا, كىمگە ۇقسايدى, سىزگە ۇقساي ما, جولداسىڭا ۇقساي ما دەپ قايتا- قايتا سۇراي بەردى. نە سەبەپتى ول سۇرادى؟ مۇمكىن مەنىڭ ءتىرى قىزىمنىڭ قايدا ەكەنىن ءبىلىپ, وسكەندە وسىلارعا ۇقساپ قالماس پا ەكەن دەپ سۇراپ وتىرعان بولار؟», - دەيدى زارداپ شەگۋشى س. باپاەۆا.
قازىر وسى ىسكە بايلانىستى قوزعالعان قىلمىستىق ءىس 8 تومعا جەتىپتى. دەگەنمەن, 5 جىلدان بەرى سوڭعى نۇكتەسى قويىلماي كەلەدى. ەرلى-زايىپتىلار وسى ىسكە قاتىسى بار تەرگەۋشىلەردى دە سوتقا بەرگەن. «بىزگە قوڭىراۋ شالعان ادام سەندەر بەيىتتى اشپاي اق قويساڭدارشى دەگەن ءۋاج ايتتى. ودان دا ءبىز سەندەرگە ءسىزدى ءبىرىنشى قابىلداعان دارىگەردى جىعىپ بەرەيىك دەدى. كەيىن ول تەلەفوننىڭ قايدان سوعىلعانى انىقتالدى. ول دۆد-نىڭ تەرگەۋشىلەر ءبولىمىنىڭ باستىعى قاشكەنوۆ ەسمۇقاننىڭ كابينەتىنەن سوعىلعان بولىپ شىقتى», - دەيدى زارداپ شەگۋشى نۇرلان اشىقباەۆ.
وسى وقيعاعا وراي, قازىر ءىستىڭ قالاي جۇرگىزىلىپ جاتقانىن بىلمەك بولىپ قۇقىق قورعاۋ ورگاندارىنا حابارلاستىق.«قازىرگى كەزدە وسى ىسكە بايلانىستى سوت مولەكۋليارلىق ساراپتاما تاعايىندالدى. جالپى, پروكۋراتۋرا ورگاندارىمەن ءىس زەردەلەنۋدە», - دەيدى اتىراۋ وبلىستىق پروكۋراتۋراسىنىڭ باسقارما باستىعى بالنۇر ەسەنگەلدينوۆ.
ساۋلە مەن نۇرلان بىلىعى كوپ ءىستىڭ سوڭىنا جەتۋ ءۇشىن جاتىردى مەديتسينالىق ساراپتاماعا جىبەرگەن ەكەن. «ەگەر جاتىر مەنىكى بولىپ شىقپاسا, ەكسپەرتيزانى باسقا جەرگە جاساتامىز»,- دەيدى ساۋلە.
دارىگەرلەردىڭ كەسىرىنەن جۇيكەسى جۇقارعان انا ەندى اق حالاتتىلاردى سوتقا بەرمەك. ال وسى وقيعاداعى باستى كەيىپكەر -جىلوي اۋداندىق ورتالىق اۋرۋحاناسى پەرزەنتحانا بولىمشەسىنىڭ مەڭگەرۋشىسى ساۋلە مامبەتوۆا ءوزىنىڭ بىردە وتادا ەكەندىگىن, ەندى بىردە قولىنىڭ مۇلدە بوسامايتىندىعىن ايتىپ, سۇحبات بەرۋدەن باس تارتتى.
باقىتبەك كەنەش ۇلى.